Qaanaami umiarsuarmut qaaqqusineq iluatsilluartoq

Ilisimatuussutsikkut umiarsuup R/V Sannap Qaanaap eqqaani angalanera iluatsillugu Qaa-

naarmiut takornariaqqullugit qaaqquneqarput.

Pulaartitsinermi Qaanaarmiut imartaminni, ilisimatusarnerit ingerlanneqartut pillugit paasisaqarnissaat siunissamilu immap qanoq ikkumaarneranik oqaloqatigiinnermik pilersitsinissaq siunertarineqarpoq.

Taamatut Pinngortitaleriffik tusagassiutitigut nalunaaruteqarpoq.

Aaqqissuussaq iluatsilluarpoq, inuillu meeqqaniit utoqqarnut 100-t sinnerlugit amerlatigisut umiarsuarmut pulaarput. R/V Sanna aatsaavissuaq taamak avannarpasitsigisup imartaani, imarpimmi misissuinermini immikkuullarissumik pisartut paasiniarlugit misissuivoq.

- Pulaartut umiarsuup misissuisarfiinut takornariartinneqarput, ilisimatusartut qanoq immamik misissugassamik katersisarnerat, planktoninillu tappiorannartunik misissuisarnerat, kiisalu timmissat imarmiut najukkamiittut qanoq misissorneqartarnersut qanimut takutinneqartut, Halumi Daorana oqaluttuarpoq. Taanna Sila-studiemi erbiologimik ilinniartuuvoq umiarsuarmullu qaaqqusinermut aaqqissuisuulluni.

Taanna Qaanaami peroriartorpoq, aaqqissuussinerullu nalaani nunaqqamminut uumasut saqqummersinneqartut pillugit, namminneq sumiorpaluutini atorlugu oqaluttuuppai.

Immap avatangiisaanik maannakkut misissuineq

Kikkut tamarmik peqataasinnaanissaat anguniarlugu umiarsuaq marloriarluni ullormi tassani, tamanut ammatinneqarpoq. Illoqarfimmi nivinngaavinnut allagarsiisimalluni, aamma illoqarfiup Facebokiatigut qaaqqusisimalluni, Halumi Daorana oqaluttuarpoq. Aaqqissuussaq siulleq ullaap tungaani ingerlanneqarmat inuit talittarfimmi piareersimapput, ualikkullu aaqqissuussaq ingerlanneqarmat marloriaammik amerlanerusut takkupput.

- Qaanaami innuttaasut naapissinnaagatsigit iluareqaarput, Siorapalummullu unnukkut ingerlaqqileratta ingerlassimasatsinnik naammagisimaarinnilluta tamatta misigisimavugut, u, Sanna-p naalagaata Rink Heinrickip taama oqaluttuarpoq.

Immap avatangiisaani maannakkut qanoq pisoqarneranik aamma silaannaap allanngoriartornerata sermillu aakkiartornerata kingunerisaanik siunissami Qaanaap eqqaani imartaq qanoq allanngornissaanik paasinninnerunissaq pillugu, ilisimatusarnermi pingaarnertut siunertarineqarpoq.

Immap iluani tigussaasumik kemiskmillu paasissutissanik uuttuineq, immallu sarfarnera inuussutissartaalu umiarsuarmi misissuiffigineqarput. Zooplanktoninik katersineq, imaanilu uumassusillit tappiorannartuusut tunngavii nalunaarsorneqarput, kiisalu imaani uumassusillitpinngorartinneqartartut, aalisakkat mikinerit aammalu timmissat imarmiut amerlasuut akornanni ataqatigiinnerat pillugit misissuinernik angalaneq suliaqarfiuvoq.

Pikialasorsuup imartaani siunissami avatangiisinik piujuartitsiniarneq tapersersorsinnaajumallugu paasissutissanik tatiginartunik katersinissaq siunertaralugu angalaneq aaqqissuussaavoq.