Rasmus Lyberthip 75-iliinini persuarsiutigaa

Rasmus Lyberth inuuissiornerminut atatillugu Aalborgimi Københavnimilu sapaatip-akunnerata naanerani tusarnaartitsivoq.

Rasmus Lyberthip tusarnaartut tiguartisippai.

Assi: Jesper Hansen

Jesper Hansen Jesper Hansen Nammineerluni sulisoq tusagassiortoq

Saqqummersinneqarpoq 13. Septembari 2026 - 08:16

Kalaallip erinarsortartup ilisimaneqarluartup Rasmus Lyberthip 75-iliinini malunnartinniarlugu aggustip 21-ani sapaatip akunnerata naanerani marloriarluni tusarnaartitsivoq. Arfininngormat Aalborgimi tusarnaartitsivimmi Musikkens Husimi sapaammilu Københavnimi Det Kongelige Teaterimi.

Tusarnaartitsisartuuvoq misilittagaqarluartoq 1970-ikkunniilli tusarnaartitsisalernerminiit tusarnaartut erinarsuutinik soorlu Erningaamik, aammali nutaanik – ilaatigut Tunumi nipilersornermut festivalertitsinermut siullermut Ikumamut tunngatillugu Lyberthip aggustimi tusarnaartitsineraneersunik – appisimaarfigai.

Ussassaarut

Rasmus Lyberthip tusarnaartut danskiunerusut soorunami aamma oqaaqqissaarpai.

- Ilissi oqaaseq ataasiinnarluunniit paasisinnaannginnassiuk sequnngerlusi takorluueqataaniaritsi!

Tusarnaartut inersimalluartut

Ussassaarut

Taava tusarnaariartut pisarnermisut taamaaliorput. Aalborgimi tusarnaartut amerlanersaat nipilersortartoq aallartimmalli nuannarinnittuupput. Tusarnaatitsivimmi Musikkens Husimi inersuarsuarmi 50-it ataallugit ukiullit amerlanngitsut tusarnaarput.

Rasmus Lyberth tusarnaartitsinermi sungiusimasatsinnit nikisarnerullunilu rockerpalaarneruvoq. Ingammik erinarsuut Nuannaarnerup Nipaata nipilersortut pikkunavissumik atorpaat - tusarnaariallu ersaattaateqataapput.

Rasmus Lyberthip tusarnaartuni tiguartisippai – tusarnaartitsimmallu suut tamarmik iluatsipput.

Julie erinarsoqataasoq

Tusarnaartitsinerup naalernerani Julie Berthelsen aamma scenemut qaqivoq.

Julie Berthelsen tusarnaartitsinerup naalernerani tusarnaartitsivimmut qaqivoq Rasmus Lyberthilu erinarsoqatigigalugu Inuit Nunaat atorpaat.

- Ukiuni kingullerni marlunni nipilersoqatigiittaqaagut. Tamannalu ilikkagaqarfigeqaara, Rasmus Lyberth oqarpoq.

- Uangattaaq ilikkagaqaqaanga, Julie Berthelsen akivoq.

Taava Sumekkut atugaat inuit tamarmik nuannarisaat Inuit Nunaat marluullutik erinarsorpaat, tusarnaartullu killitsisimaqaat.

- Erinarsuut taanna taamani allanneqarnermisulli ullumikkut pingaaruteqartigaaq, Rasmus Lyberth naqissusiivoq.

Rasmus Lyberthip 75-inik ukioqaleraluarluni erinarsortartutut isiginnaartitsisartullu sulinini unitsinnianngilaa. Sapaatip akunnerata tulliani franskit filmiliaanni peqataassalluni Uummannamut angalassaaq.

- Tamannalu pissutigalugu nujalerisumiinnikuunngilanga. Tamanna ilitsersuisup aalajangigaraa, eqqumiitsuliortoq nujakkaallunilu ummassimasoq nassuiaavoq.

Pisartagaqarneq

Allaaserisaq tamaat atuarniarukku atuisunngortariaqarputit! Iserit!

Sermitsiaq.gl – Nittartagaq

Sermitsiaq.gl-imi allaaserisat tamakkiisumik atuarsinnaalissavatit
Qaammammut kr. 59.00
Ukiumut kr. 650.00

ATUISUNNGORIT

Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.