Qaqortup eqqaani SAR-imik ujaasineq, Sisimiullu eqqaani nuna ikuallattoq

Kalaallit Nunaanni Politiit ulloq unnuarlu kingulleq, annertuunik marlunnik ulapputeqartut, pigaartut pisortaat Poul Kreutzmann Sermitsiamut oqarpoq.

Sisimiut eqqaani nuna ikuallattoqaqqittoq siullertut oqaatigaa. Ikuallanneq illoqarfimmit nalunaaquttap-akunnera ataaseq avannamut umiatsiamik angalaffigineqarsinnaasumi, sumiiffimmi innuttaasut ornigarluartagaanni aallartittoq, pigaartut pisortaat oqarpoq.

Qatserisartut ikuallaffimmiipput, ikuallattorli angujuminaappoq, taamaattumik qatserisartut qamitsinissamut atortunik amerlanerusunik pissarsinissartik utaqqivaat, Poul Kreutzmann oqaluttuarpoq, taassumalu naatsorsuutigaa ikuallattoq piffissami qaninnermi qaminneqarnissaa.

Sisimiut eqqaani nuna juunimi ikuallappoq, pigaartullu pisortaata pinngortitami panernersuaqartillugu, pinngortitami angalaartartut innermik atuissatillugit grillernermilu mianersoqqullugit kajumissaaqqippai.

Aammattaaq Kujataani SAR-imik suliaqarneq pillugu pigaartut oqaaseqarpoq.

Angut 81-inik ukiulik Igalikup Qaqortullu akornanni umiatsiamik angalanermini apuuffissaminut apuutinngitsoq politiit nalunaaqutaq 02.07 nalunaarfigineqarnerisa kingorna, ujaasineq aallartinneqarpoq.

Angut 81-inik ukiulik ajunngitsoq paasineqarmat, nal. 06.00 missaani ujaasineq taamaatinneqarpoq. Taassuma putsernerani oqquisariaqarsimanera pissutaalluni piffissaliussap nalaani apuussinnaasimanngilaq.