Russit qarasaasiakkut saassussinerannik pasilliutinut aallartitaq ilumuunnginneraavoq
Illersornissaqarfiup paasiniaasartui FE sisamanngornermi naliliinerat naapertorlugu russit naalagaaffianut attuumassutillit russinut tapersersortaasut qarasaasiakkut saassussisuusimaneragaapput.
Illersornissamut ministeri Troels Lund Poulsen (V) sisamanngornermi tusagassiortunik katersortitsinermi oqarpoq "akuersaarneqarsinnaanngilluinnartoq", russit sinnerlugit Danmarkimi qarasaasiatigut saassussisoqarnera.
Foto (arkiv): Nils Meilvang/Ritzau Scanpix
Ruslandip Danmarkimi aallartitaa, Vladimir Barbin, ilumuunnginneraavoq, russit tapersersortaasa eqimattat russit naalagaaffiannut attuumassuteqartut marloriarluni qarasaasiakkut Danmarkimut saassussinernut attuumassuteqarneragaanerat pillugu.
Taanna allakkatigut akissuteqarluni taamak oqarpoq TV 2-mut aamma DR-imut.
Vladimir Barbin isumaqarpoq, pineqartoq "pissutissaqanngilluinnartumik pasilliinerusoq".
- Danskit tungaannit uppernarsaatinik saqqummiussinikuunngilaq russit Danmarkimut qarasaasiatigut saassussinernut peqataasimanerannut pasilliutaanut uppernarsaataasinnaasunik, allakkatigut akissuteqarnermi aallartitaq taama oqarpoq TV 2 naapertorlugu.
Taanna pasilliutit pillugit oqalliseqataarusunngilaq.
Akissuteqarnermi Vladimir Barbinip aamma Danmark isornartorsiorpaa, hackerit gruppiat IT Army of Ukraine danskit nunaannit aallaavilimmik Ruslandimut qarasaasiatigut saassussinerannut unitsitsiniarsimannginnerarlugu . DR taamak allappoq.
Aallartitaq oqaaseqarpoq, Illersornissaqarfiup paasiniaasartuisa (FE) sisamanngornermi saqqummiummassuk paasisimallugu, Danmarkimut qarasaasiatigut saassussinerit marluk russit tapersersortaanit russit naalagaaffiannut attuumassuteqartunit ingerlanneqarsimasut.
Saassussineq siulleq imeqarfimmut Køge-miittumut siorna pisimavoq.
Saassussinermi imeqarfiup naqitsineranut sunniuteqarpoq, erngup aqqutaa naqitsinerup sakkortuallaalerneratigut qaartinneqarpoq. Tamatumalu malitsigisaanik atuisut arlallit imermik pilersorneqarsinnaajunnaarlutik.
Saassussinerit aappaanni kommuninut naalagaaffimmilu nunap immikkoortuinut qinersinermi nittartakkanut sakkortuumik saassussisoqarpoq.
Kommunit arlallit taamani misigaat nittartakkatik sakkortuumik saassunneqarnermit ajutoortut.
- Akuersaarneqarsinnaanngilluinnarpoq, russit tungaannit Danmarkimi qarasaasiatigut saassussisoqarnera, illersornissamut ministeri Troels Lund Poulsen (V) sisamanngornermi tusagassiortunik katersortitsinermi oqarpoq.
Tusagassiortunik katersortitsinermi illersornissaqarfiup paasiniaasartuisa aamma hackerit gruppii atii saqqummiuppaat.
Illersornissaqarfiup nalilerpaa, gruppi prorussik Z-Pentest vandværkimut saassussisimasoq, gruppi NoName057 (16) novembarimi kommunini naalagaaffimmilu nunap immikkoortuinut qinersinermi nittartakkanut saassussisimasoq.
TV 2 naapertorlugu sisamanngornermi Nunanut Allanut Ministereqarfiup Vladimir Barbin oqaloqatigiumallugu aggersarnikuuaa.
