Ussassaarut

Saarullik pisisinnaassutsimik siuariartitsivoq, aaqqissuusseqqinnissamilli pisariaqartitsineq allanngunngilaq

Aalisakkat akiisa qaffasinnerat maannakkorpiaq Kalaallit Nunatta aningaasaqarneranut iluaqutaasoq, Aningaasaqarnermut siunnersuisooqatigiit ukiup affaanut nalunaarusiaminni saqqummeqqammisumi allapput. Innuttaasulli ikinnerusut utoqqaaneruleriartortullu pisortat missingersuutaannik tatisivoq. Tamanna siunissamut aaqqissuusseqqinnissamik pisariaqartitsisoq, siunnersuisooqatigiit mianersoqqussutigaat.

Saarullinniarneq ilimagisamit pitsaanerusumik ingerlavoq, inuussutissarsiortunullu tamanut avammut niuernermi akit aatsaat taama qaffasitsigisut ilimagineqarput.

Assi: Oscar Scott Carl

Morten Okkels Morten Okkels Tusagassiortoq

Saqqummersinneqarpoq 10. Septembari 2026 - 15:02

Ussassaarut

Aalisarneq tupaallannartumik pitsaasumik ineriartorpoq, inuinnaallu atuinerat ukiut arlallit aasigiiaareerluni annertuseriarpoq.

Taama Kalaallit Nunaanni Aningaasaqarnermut siunnersuisooqatigiit 2026-mut ukiup affaata aappaanut nalunaarutaanni, sisamanngornermi saqqummiunneqartumi oqariartuutit isumalluarnerit ilaat nipeqarput. Ukiuni pingasuni 1 procenti ataallugu annikitsuaqqamik siuariartoqareersoq, ukioq manna aningaasaqarneq 1,3 procentimik siuariassasoq, 2027-milu 1,5 procentimik siuariassasoq, Siunnersuisooqatigiit ilimagaat.

Siuariarnerulli aaqqissuusseqqinnissanik, aningaasaqarnermik imminut napatinnerulersitsisumik pisortallu isertitaasa aningaasartuutaasalu ungasinnerusoq isigalugu oqimaaqatigiinneranik qulakkeerinnittumik pisariaqartitsisoqarnera allanngortinngilaa. Tamanna Aningaasaqarnermut siunnersuisooqatigiit siusinnerusukkut aamma sammisareerpaat.

Aalisakkanut qalerualinnullu Kalaallit Nunaata nunanut allanut tunisaanut akit nioqqutissanit nunap eqqussutaanit annertunerujussuarmik qaffariarput.

Tamatuma avammut tunisanit isertitat nunanit allanit nioqqutissanik amerlanerusunik pisissutaasinnaanerat kinguneraa. Inuiaqatigiit pisisinnaassusiat taamaattumik siuariarnermi kisitsisit nalinginnaasut takutitaannit annertuneruvoq.

Ussassaarut

Ingammik saarullinniarneq akinik pitsaasunik pisanillu amerlanerusunik atugaqarfiulluni ingerlalluarfiuvoq.

– Ataatsimut isigalugu aalisakkat qaleruallillu avammut tunineqarnerisa akii aatsaat taamak qaffasitsigisussatut isikkoqarput, 2027-mili ineriartorneq nalorninarneruvoq, tamatumanilu nunarsuarmi aalisakkat akii apeqqutaajumaassapput, siunnersuisooqatigiit allapput.

Suliffissat amerlanerusut akillu qaffakkiartuinnartut

Aningaasaqarnerup siuariartornerata suliffeqartut amerlinissaat ilimanarsisippaa. Pissutsinilu maanna atuuttuni tamanna nunanit allanit suliartortut amerlanerusut pisariaqartinnerannik kinguneqassasoq, siunnersuisooqatigiit naliliipput.

NALUNAARUSIAQ EQIKKARLUGU

ANINGAASAQARNIKKUT INISSISIMANEQ

Aalisarneq ingammik saarullinnik qaffasissunik akigititaqarluni pisallu amerliartorlutik iluarisimaarnartumik ineriartorpoq. Peqatigisaanik atuineq 2025-p kingorna annertuumik qaffariarpoq.

2025-p kingorna avammut tunisat akii eqqussukkat akiinit annertuumik qaffariarput, tamatumalu inuiaqatigiinni pisisinnaassutsip annertuumik siuariarnera kinguneraa.

Tamanna tunuliaqutaralugu ingerlatat 2026-mi 1,3 procentimik 2027-milu 1,5 procentinik annertusinissaat ilimagineqarpoq. Tamanna ukiuni arlalinni 1 procent ataallugu siuariarnerit kingorna pivoq.

Taamaalilluni suliffissaqartitsinerup annertusiartornissaa ilimanaateqarpoq, tamannalu pissutsi maannakkutut itsillugit sulisartunit nunanit allaneersunit amerlanernik pisariaqartitsiffiussaaq.

2025-mi akit qaffakkiartornerat 3,7 procentiuvoq, 2026-milu 2027-milu 3 procentit missaannut apparnissaa ilimagineqarpoq

ANINGAASAQARNERMI POLITIKI

Naalagaaffimmik isumaqatigiissutip malitsigisaanik Aningaasanut inatsisissatut siunnersuut aningaasartuuteqarfinnik arlalinnik pingaarnersiueqqinnissamik siunnerfeqarpoq.

Pisortat aningaasaqarnerat innuttaasut utoqqaaneruleriartornerannit ilungersunartorsiortinneqarpoq, politikilu allanngunngippat nunatta karsia 2030-kkut naaneranni ukiumut 400-500 mio. kr-nik amigartooruteqartassaaq.

Aningaasaqarnerup imminut napatinnerulernissaa anguniarlugu pisortallu aningaasaqarnerata patajaatsuunissaa qulakkeerniarlugu suli annertuumik aaqqissuusseqqinnissamik pisariaqartitsisoqarpoq.

Missingersuutinut inatsit ataatsimut isigalugu aningasaqarnikkut politikikkut aalajangernernut pitsaanerusumik tunngavissamik pilersitsivoq, pisortallu aningaasaataasa aalaakkaanerulernerannut patsisaaqataalluni.

Issuaaffik: Kalaallit Nunaanni Aningaasaqarnermut siunnersuisooqatigiit, 2026-mi ukiup affaanut kingullermut nalunaarusiaq

Peqatigisaanik akit qaffakkiartornerat 2025-mi 3,7 procentinit 2026-mi 2027-milu 3 procentit missaannut appassasoq ilimagineqarpoq. Tassa akit qaffakkiartornerat ingerlaannassaaq, kigaannerusumilli qaffakkiartussapput. Ineqarnermut akiliutit qaffasinnerusut, erngup innaallagissallu akia qaffasinnerusoq akit qaffakkiartorneranut annertuumik sunniuteqarput.

Takornariartitsinerup ineriartortinnissaanut periarfissat annertoorujussuupput. Tamatumanili naammassinnissinnaassutsip periarfissallu aasaanerani qaammatinit ukiup sinneranut siaruartinneqarnerat pisariaqassaaq, siunnersuisooqatigiit erseqqissaapput.

Aaqqissuusseqqinnerit piffissaagallartillugu ingerlanneqassasut

Tassa maannakkorpiaq aningaasaqarnikkut ajornartorsiortoqanngilaq, ungasissumilli sammisumik ilungersunartoqarpoq: politiki tamaaginnassappat aningaasartuutit isertitanit sukkanerusumik qaffakkiartussapput.

Innuttaasut ikiliartorput utoqqaaneruleriartorlutillu, ikinnerusullu suliffeqarsinnaasutut ukioqarput. Tamanna akileraarutinik isertitanik tatisivoq, peqatigisaanullu ilaatigut peqqissutsimut utoqqalinersianullu aningaasartuutit annertusiartorput.

– Politiki taamaaginnassappat 2030-kkut naaneranni nunatta karsia ukiumut 400 – 500 mio. kr-nik amigartooruteqartassasoq, siunnersuisooqatigiit allapput imalu inerniliillutik:

– Aaqqissuusseqqinnernik sulisinnaasunik nukittorsaasunik, tunisassiorsinnaassutsimik pitsanngorsaasunik, ilinniarsimassutsimik qaffassaalluniluunniit aningaasartuutit annertusiartornerannik killiliisumik, annertuumik pisariaqartitsisoqarpoq.

Aaqqissuusseqqinnerit piffissami ungasippallaanngitsumi ingerlanneqartariaqartut, Aningaasaqarnermut siunnersuisooqatigiit erseqqissaapput, taakkumi aningaasaqarnermut tamakkiisumik sunniuteqalernissaannut piffissaq ingerlaqqaartarpoq.