SDU-p dronit Issittumi annaassiniarnermi atornissaat misilittaraa

Dronet annaassiniutissat Syddansk Universitetip (SDU) Issittumi misilerarpai. Misileraalluni suliniut, Arcsar, Alexandra Institutti aamma Issittumi Sakkutooqarfik suleqatigalugit ingerlanneqarpoq.

SDU Taama tusagassiutitigut nalunaarummi allappoq.

2025-mi septembarimi droninik 32-riarluni tingisitsisoqarpoq, taakkulu Kalaallit Nunaanni annaassiniarnermi droninik atuinissamut silassorissuusiarlu tunngavigalugu paasissutissanik katersuinissamut periusissiat misilinniarlugit ingerlanneqarput.

Suliniuteqarnermi Issittumi annaassiniarnerit pitsanngorsarneqarnissaat neriuutigineqarpoq. Dronit ilaatigooriarlutik namminneq aqunneqarsinnaassallutillu qulimiguulimmik timmisartortartumut dronemillu aqutsisumut assinik ingerlaannaq nassiussisarsinnaassapput.

Suliniut SDU-p dronileriffiani immikkut ilisimasalimmit Jussi Hermansenimit siulersorneqarpoq.

Misissuinermi dronit nalinginnaasumik nioqqutaasut atorneqarput, taakkulu issittumi annaassiniarnermi qanoq atorneqarsinnaanersut misissorneqarsimasoq Jussi Hermansen oqaluttuarpoq.

- Assiliivik kiassiutilik annaassiniarnermi atorneqarsinnaanersoq atorneqarsinnaannginnersorluunniit pingaarnertut paasiniarlugu dronit atortorissaarutillu nalinginnaasumik nioqqutaasut Issittumi misilerarpagut, Jussi Hermansen oqarpoq.

- Seqernup qinngorneri avatangiisillu nillissusaat pingaarnertut apeqqutaapput, assiliivimmi kiassiutilik qinngornernik aappaluttunik takunnissinnaavoq.

Naak suliniut Arcsar issittumi ingerlanneqaraluartoq misilittakkat inerneri nunanut allanut aamma atuussinnaassasut ilimagineqarpoq.

/ritzau/