Senatorit ataatsimeereerlutik tusagassiortunik katersortitsisut: USA-p iligisani pisariaqartippai

Senatorit sisamat tusagassiortunut nunaqavissunit allamiunillu tusagassiortunik 25-t missaanniittunut ataasinngornermi nal. 10.15 katersortitsissapput.

Aamma nunanut allanut sillimaniarnermullu ataatsimiititaliami ilaasortat Pipaluk Lynge aamma Erik Jensen isiginnaartitsisartorlu Viggo Mortensen, Donald Trumpip Kalaallit Nunaata tinguarnissaanut oqaasiinik isornartorsiuisutut ilisimaneqartoq, issiapput.

Senatorit tassaapput Alaskamit Lisa Murkowski, Mainemit Angus King, Michiganimit Gary Peters aamma New Hampshiremit Maggie Hassan. Taakku Nuummiinnerminni inuussutissarsiortut, Inatsisartuni ilaasortat Naalakkersuisullu ataatsimeeqatigaat.

Angalaneq angusaqarfiulluarlunilu puigunaatsoq

Angus Kingip, Mainemi senatoriusup, Kalaallit Nunaannut tikeraarnerat angusaqarfiulluartoq oqaatigalugu tusagassiortunik katersortitsineq aallarnerlugu oqarpoq:

- Angalaneq angusaqarfiulluarpoq. Pituffimmi aallartippugut politikkerillu ICC-lu ataatsimeeqatigalugit, ilikkagaqarluarlutalu. USA-mi avannarlerneersugut sisamaalluta senatoriuvugut, maannakkullu pisut sioqqullugit Kalaallit Nunaat soqutigisaralutigu. Issittumi periusissiap pingaaruteqarnera ukiuni qulini oqaluuseraarput, oqarpoq, nangipporlu:

- USA-p Kalaallit Nunaanni isumannaallisaanikkut soqutigisaata nunap tiguarneqarneranik kinguneqartussaanngilaq. Qaammatini kingullerni pisut taamaattut pisariaqanngillat, Angus King erseqqissaavoq.

Senatorit sisamat taakkua qulimiguulimmik sermersuaq seqernullu tarrilernera takornariarsimagaat Angus King aamma oqarpoq, misigisarlu nuannerluinnartuunerarlugu.

- Inuuninni misigisat puigunaannerpaat ilagaatm oqarpoq.

Isumannaallisaanermut politikki isumaqatigiissutigigaat

Nunanut allanut sillimaniarnermullu ataatsimiititaliami siulittaasoq Pipaluk Lynge ataatsimiinneq ingerlalluarsimallunilu oqaloqatigiinneq pitsaasuusoq Sermitsiaqmut oqarpoq. Issittumi isumannaatsuunissaq illersornissallu qulakkeerniarlugit illuatungeriit tamarmik piumassuseqarluartut oqaatigaa:

- Isumannaallisaanermut tunngasut uagutsinnut aamma pingaaruteqarput, tamannalu senatorillu oqaloqatigiissutigaarput. Aammali kommuninut innuttaasunullu iluaqutaasumik isumaqatigiissuteqartoqarnissaa uagutsinnut pingaaruteqarpoq, Pipaluk Lynge oqarpoq.

Murkowski "Issittumi senatoritut" ilisaritinneqartoq

Alaskami senatori Lisa Murkowski "Issittumi senatoritut" ilisaritinneqarpoq.

Tusagassiortunut najuuttut arlaleriarluni Kalaallit Nunaannut tikeraartarsimanini oqaatigaa.

- Kalaallit Nunaanni innuttaasunut: Ulluni makkunani nalorninartorsiorfiusuni qanoq isumakuluuteqartiginersi anniaatigingaarpara. Sorsunnersuup aappaata kingorna tatigeqatigiinneq ineriartortinneqarnikoq oqaasimininnguit atorlugit annikillisinneqarpoq, Lisa Murkowski oqarpoq.

Kalaallit Nunaata USA-llu akornanni tatigeqatigiinneq ineriartorteqqinniarlugu senatorit pingaarutilimmik inissisimaffeqarnerat naqissuserpaa.

- Præsidenterput qanorluunniit oqaraluarpat Kongressimi pingaarutilimmik inissisimaffeqarnerput eqqaasitsissutigerusuppara. Isumaqarpungalu tamatta soqutigisaqaqatigiilluta suleqatigiittariaqartugut, tamannalu ataqqinninnermik oqaloqatiginninnermillu aallaveqarlunilu naammassineqassaaq, oqarpoq.

Senator Peters: Ikinnguteqarnissaq ileqarnissarlu pingaaruteqarpoq

USA-p aamma iligisani pisariaqartikkai, senatori Gary Peters Demokraatineersup tamanna erseqqissarpaa.

- Ikinnguteqartariaqavippugut. Kalaallit Nunaanni innuttaasut ikinngutigaavut, aamma Danmarkimi innuttaasut ikinngutigivagut. Ajoraluartumik præsidenteqarpoq tatiginnikkunnaarsitsisumik. Taamaattumik sisamaalluta ullumi maaniippugut. Tamanna alloriarnerpassuit ilagaat, Gary Peters oqarpoq, nangipporlu:

- Kalaallit Nunaannut oqariartuutiga imaappoq: Nalussanngilarsi USA-mi ikinnguterpassuaqarlusi.

Republikanerit ajornartorsiutaat ammasumik eqqartoraa

Republikanerit sinnerlugit senatoriusoq Lisa Murkowski, præsidentip Donald Trumpip aqutsilerusulluni oqaatigisaqattaagaanut isornartorsiuisunut amerlanngitsunut ilaavoq.

Parteeqatini ammasumik kajumissaarpai:

- Partiitsinni ilaasortat ilaat Donald Trumpimut akerlilersuisutut isigineqarnissartik kissaatiginngilaat, kisianni Republikanerinut ilaasortaqatikka arlallit oqaloqatiginikuuakka, taakkulu ima oqarput: Killissaqarpoq maani; NATO-mi iligisat tiguaaffiginavianngilagut, Lisa Murkowski oqarpoq.

Amerikamiut politikerii partii apeqqutaanani Kalaallit Nunaannut tikeraaqqullugit USA-llu iligisai pillugit paasisaqarneroqqullugit kajumissaarpai.