Isumaginninnermut, suliffeqarnermut, ineqarnermut, attaveqaasersuutinut isorliunerusunullu naalakkersuisup Aqqaluaq B. Egedep Disko Linep umiarsuup innaallagiatortuullunilu dieselitortup Maliina Ittuup, Qaqortumi mittarfik nutaaq apriilimi ammarpat, atorunnaarniarlugu aalajangernera maanna qisuariarfigaa.
Talittarfimmi sarfalersuuteqannginnera aalajangersimasumillu taliffissaqannginnera pissutaatinneqarpoq.
Isumaginninnermut, suliffeqarnermut, ineqarnermut, attaveqaasersuutinut isorliunerusunullu naalakkersuisup Aqqaluaq B. Egedep Disko Linep umiarsuup innaallagiatortuullunilu dieselitortup Maliina Ittuup, Qaqortumi mittarfik nutaaq apriilimi ammarpat, atorunnaarniarlugu aalajangernera maanna qisuariarfigaa.
Talittarfimmi sarfalersuuteqannginnera aalajangersimasumillu taliffissaqannginnera pissutaatinneqarpoq.
- Umiarsualivimmi pissutsit taamaannerat tupaallaatigineqarsinnaanngilaq. Umiarsualiviit ajornartorsiutitaqanngitsumik Disko Linemit suliffeqarfinnillu allanit atorneqartut ullut tamaasa takusarparput. Namminersorlutik Oqartussaniit suliffeqarfik sarfamik taliffissamillu atuinissamut immikkut ittumik pisinnaatitaaffilersinnaanngilaat, innuttaasut suliffeqarfiillu allat akigalugit, Aqqaluaq B. Egede oqarpoq.
- Disko Line ukiorpassuarni Kalaallit Nunaanni sullissereerpoq, taamaattumillu Naalakkersuisut paasiuminaatsippaat ingerlatseqatigiiffiup qanoq ililluni umiarsualivinni pissutsit ilisimasimannginnerai. Kiffartuussinissamut isumaqatigiissummi ersarissumik allassimavoq, umiarsualiviit pioreersut Disko Line-mut atugassanngortinneqarsimasut.
Pisortaaneq isumaqataasoq
Disko Linemi pisortaanerup Michael Højgaardip Aqqaluaq B. Egedep oqaasii apeqqusinngilai.
- Nutaarsiassartaqanngilaq. Kiffartuussinissamik isumaqatigiissutip oqaasertai nalunngilavut, Michael Højgaard oqarpoq.
- Umiarsuup pissutsit maanna atuuttut atorlugit illersorneqarsinnaasumik ingerlanneqarsinnaanersoq uppernarsiinnarparput – taamaattumillu Qaqortumi mittarfissaq nutaaq ammarneqarpat angallassineq unitsinniarlugu aalajangerpugut. Maliina Ittuk Qeqertarsuup Tunuani angallassissutaassasoq pulersaarutaanikuugaluarpoq, maannakkorpiarli pituttorfiginissaa qunugigallarparput.
- Naalakkersuisut sivisuumik oqaloqatigaavut – aamma Itisuarsummi talittarfiliornissamut pilersaarutit peqataaffigilluarsimavavut. Suliarli taannali suli ingerlanneqanngimmat ingerlatsinerup illersorneqarsinnaanissaa qulakkeersinnaanagu inerniliupparput – taamaattumillu Maliina Ittuk atorunnaarsipparput, pisortaaneq oqarpoq.
Siunissaq nalorninartoq
Maliina Ittuup siunissami qanoq pineqarnissaa suli aalajangerneqanngilaq, Michael Højgaardilli umiarsuup nunanut allanut tunineqarsinnaanerata periarfissaanera mattutinngilaa.
Maliina Ittuk Disko Linep umiarsuaataasa annersaraat, 113-inik ilaasoqarsinnaavoq – pilersaarutaasimagaluarporlu Ilulissat Qeqertarsuullu akornanni angallaffiulluartartumi atornissaa.
Maliina Ittuk umiarsuaavoq dieselimik innaallagissamillu atuisoq. Batteriia nalunaaquttap akunnerini marlunni nipaqanngingajattumik ingerlasinnaavoq, mingutsitsinnginnerusumillu siunertaqarnermut tapertaalluni, soorlu Ilulissani takornariarpassuarnit soqutigineqartumut siunertaqarluni.
- Takornariallu tamanna iluarissaqigaat qularinngilarput. Takornariat avatangiisinut pingaartitsiartorput – ukiunilu aggersuni tamanna pingaarutilimmik unammillissutissaassaaq, Maliina Ittuk siorna Faaborg Værftimit siorna naammassineqarmat Michael Højgaard oqarpoq.
