Seqernup pulanera Kalaallit Nunaanniit pingasunngornermi takuneqarsinnaavoq

Seqineq pingasunngornermi annertuumik pulasinnaavoq, sumiiffiillu ilaanni seqernup pulalluinnarnissaa ilimanaateqarsinnaavoq.

Nuummi marsimi 2025-mi assilisaq, seqineq taamani aamma pulavoq. Nuummi qaammatip seqinermut pulanermini 87 procentia qaangerpaa. Pingasunngornermi seqernup 79 procentia qaangernissaa naatsorsuutigineqarpoq, allaaserisami takussutissiaq takuuk.

Assi: Johan Nilsson/TT/Ritzau Scanpix

Thomas Munk Veirum Thomas Munk Veirum Tusagassiortoq

Saqqummersinneqarpoq 12. Aggusti 2026 - 09:36

Qilak allaaqqissappat, qilammi qaqutigorluinnaq pisartoq misigineqarsinnaavoq. Qaammat seqinermut ualikkut assiunnerani, seqineq pulassaaq.

Seqernup qanoq pulatiginera sumiiffiit apeqqutaallutik misigineqarsinnaavoq, nunallu ilaani seqernup pulanera annertunerussaaq allanilu annikinnerusinnaalluni.

Allaaserisami matumani takuneqarsinnaavoq seqineq qaqugu pulassanersoq qaqugulu pulanerpaassanersoq, sumiiffinnilu assigiinngitsuni qanoq pulatigissanersoq aamma takuneqarsinnaavoq.

Ussassaarut

Seqernup pulanera Ittoqqortoormiini annertunerpaassaaq, seqineq tamakkiisumik pulassaaq. Kitaanili seqernup pulanera annikinnerusinnaavoq.

DMI-p silassamik ilimasaarutaa naapertorlugu Qaanaami avannarpasinnerusumi Kujataanilu pingasunngornermi seqinnilernissaa ilimagineqarpoq.

Kalaallit Nunaata kitaata sinnerani ajoraluartumik qulisimalernissaa ilaannikkullu siallertarnissaa ilimasaarutigineqarpoq, taamaattorli nuissaniit seqineq nuisarsinnaasoq, DMI naliliivoq.

Tunumi Tasiilami seqinnarissaaq Ittoqqortoormiinilu nuianissaa ilimagineqarpoq.

Ittoqqortoormiit eqqaanni Scoresby Sundimi pingasunngornerup ullaavani umiarsuarmik takornariartaatsit 15 ipput.

Sermitsiami siusinnerusukkut allaaserineqarpoq umiarsuarnik takornariartaatinik ingerlatseqatigiiffippassuit seqernup pulanera "inuunermi ataasiaannarluni“ misigisassaasutut nittarsaassutigaat.

Seqernup pulanera isiginnaassagukku, isitit illersorniarlugit seqinersiutit seqinermut illersuutitallit atornissai eqqaamassavat. Seqinersiutit nalinginnaasut naammannginneri pissutigalugit, seqernup pulaneranut isarussat atorneqarnissaat ilisimatuunit innersuutigineqarpoq.