Kommunalbestyrelsemut apriilip aallaqqaataani qinersisoqarnerata kingorna Kommune Qeqertalimmi borgmesterinngorniuttoqallarmat Simigaq Heilmann (D) borgmesterinngortussatut isikkoqanngikkaluarpoq.
Siumumilli borgmesterissatut innersuunneqartussanngortoq partiit suleqatissaasa ataatsimoorfigiunnaarmassuk Simigaq Heilmann borgmesterinngortussanngoriasaarpoq.
Kommunalbestyrelsemut apriilip aallaqqaataani qinersisoqarnerata kingorna Kommune Qeqertalimmi borgmesterinngorniuttoqallarmat Simigaq Heilmann (D) borgmesterinngortussatut isikkoqanngikkaluarpoq.
Siumumilli borgmesterissatut innersuunneqartussanngortoq partiit suleqatissaasa ataatsimoorfigiunnaarmassuk Simigaq Heilmann borgmesterinngortussanngoriasaarpoq.
Taama pisoqarnerani Kommune Qeqertalik Demokraatineersumit siullermeerluni borgmestereqalerpoq.
Kommunerisanni 2025-mi suna eqqaamanerpaaviuk?
- Eqqaasinnaasakka amerlaqaat, taamaakkaluartoq ukioq kingumut qiviarlugu eqqaarusuppara sulilluta aallartinnerput, takorloortarpara soorlu natilersorluni. Nammineq nutaaviullunga, suleqatit tamarmik nutaat piffissaq immitsinnut ilinniarfiusoq siunnerfilersorlutalu aallartikkatta pikkunarpoq nuannerujussuarlunilu, borgmesteri taama oqarpoq.
Simigaq Heilmannimut borgmesterinngoriasaarneq sungiunniarnarsimavoq. Sunami unammillernarnerpaasimanersoq aperineqarami ima akivoq.
- Uannut unammillernarnerpaaq tassaavoq utaqqilaarsinnaaneq. Suna tamaat ingerlaannaq aaqqissinnaanngimmat tulleriaarinissaq, suliallu ilai piffissamik tiguseqqaarlutik atuutilertarmata piviusunngortikkusutannut ilungersortarnermut naammagittarluni utaqqisinnaaneq unammillernarisarpara.
Naatsorsuutigisaminit angusaqarnerusoq
Naak pernaamminik borgmesterinngoraluarluni naatsorsuutigisaminit angusaqarneruvoq.
Suliassaq suna ukioq manna naammassinngitsoorpiuk?
- Naammassinngitsuugaqarsorinngilanga, killormuuanik isumaqarpunga naatsorsuutigisanniit angusaqarnerulluta, naak suli soorunami anguniakkagut tamakkinngikkaluarigut, isumaqarpunga politikkikkut aqqummik titarsilluta.
Illit borgmesteritut suna ukioq manna iluatsinnerpaasoriviuk?
- Suleqatikkuminartuunera sulininni iluatsinnerpaasutut taarusuppara, innuttaasut illoqarfinni sisamani, nunaqarfinnilu arfineq-pingasuni, qinikkat assigiinngitsunik kinaassusillit, kommunimilu suleqatit assigiinngitsorpassuarnik piginnaasallit tamaasa iluatsittumik sulissaguma suleqatigisinnaasussaavakka. Taamaammat tusarnaarsinnaassuseqarnissaq, oqaloqatikkuminarnissarlu pingaarutilerujussuartut isigisarpakka. Isumaqartarpunga taakkua sakkussaasut iluatsissinnaanngissorisat iluatsissinnaalernissaannut, Simigaq Heilmann oqarpoq.
Kommunerisarni aappaagu 2026-mi suna pingaarnertut suliniutigerusuppiuk?
- Sorpassuupput, immikkulli eqqaarusuppara ataqatigiinnerulernissaq. Maluginiarnikuuara innuttaasut pisortanut tatiginninnerat annikittuararsuusoq, sulisutta sulinerminni pitsaasunik sakkussaqarlutik innuttaasunik pitsaanerpaamik sullissisinnaalernissaat pingaartillugu suliarerusuppara, Simigaq Heilmann taama naggasiivoq.
