Siumup tunuarnera naalakkersuisoqataasut qisuariarfigaat: Atassutip naalakkersuisoqatigiinniinnertik ataatsimiissutiginiaraat
Naalakkersuisooqataasup Atassutip suleqatigiinneq ingerlatiinnassanerlugu suli oqaatigisinnaanngilaa. Inuit Ataqatigiit siulittaasuata Múte B. Egedep Siumup suleqatigiinnermut ilaajunnaarnera uggoraa.
Aqqalu C. Jerimiassenip Siumup naalakkersuisooqatigiinnit aninerata kingorna partiip sunik pilersaaruteqarnera suli oqaatigiumanngilaa.
Assi: Arnaq Nielsen.
Atassutip siulersuisuunerisa naalakkersuisooqatigiinnermut tunngatillugu qanoq iliortoqarnissaa ullumi ataatsimiissutigaat.
Partiip siulittaasua Aqqalu C. Jerimiassen Sermitsiamut oqarpoq.
Atassutip IA-p D-llu naalakkersuisuutitaat Folketingimut qinigassanngortinnerat aamma isornartorsiorpaa, partiilu isumaminik allanngortitsisimanngilaq:
- Qanoq iliornissarput oqaloqatigiissutigissavarput, tamatumalu kingorna Naalakkersuisut siulittaasuat ataatsimeeqatigissavara.
- Aamma suut naaperiutigisinnaanerat oqaloqatigiissutigissavarput, aalajangiusimavarpulli naalakkersuisup naalakkersuisutut sulinissaa, Aqqalu C. Jerimiassen Siumup naalakkersuisoqatigiinnit aninera saqqummiunneqareersorlu Sermitsiamut oqarpoq.
Múte: Eqqunngitsumik oqalunneq akuerineqarsinnaanngillat
Siumup tunuarnerata kingorna Demokraatit, Inuit Ataqatigiit (IA) aamma Atassut naalakkersuisoqatigiinni kiserngorupput. Siumup aalajangernera Inuit Ataqatigiit siulittaasuata Múte B. Egedep uggoraa:
- Piffissami najummatseqqaffimmi pissutsinilu ilungersunartuni naalakkersuisoqatigiit suleqatigiinnerat taama aalajangiiffigineqarnerat ajuusaarutigaara, Múte B. Egede oqarpoq.
IA-p Siumup siulittaasuata Aleqa Hammondip naalakkersuisunut ilaasortat marluk, Naaja H. Nathanielsenip (IA) aamma Anna Wangenheimip (D), folketingimut qinigassanngortinnerminni inatsisinik unioqqutitsinerunerarlugu oqaasii akuerineqarsinnaanngitsut aamma erseqqissarpaa:
- Inuit Ataqatigiit Demokraatillu kukkusimasutut Siumup siulittaasuata oqaatigisaa eqqunngitsuliorneruvoq, akuerisinnaanngilarpullu, oqarpoq.
IA naalakkersuisoqatigiinni suleqataaginnassasoq Múte B. Egede oqarpoq.
