Siumut aqqartartumut pisumut akuliuttoq: Sooruna maaniittoq?

Amerikamiut aqqartartuat arfininngormat Nuup eqqaaniittoq pillugu, Siumut Naalakkersuisunut arlalinnik apeqquteqarpoq.

Siumut innuttaasut toqqissisimanissaat eqqarsaatigalugu Naalakkersuisunut apeqquteqartoq, partiip Inatsisartuni nunanut allanut sillimaniarnermullu ataatsimiititaliamut ilaasortaa Erik Jensen allakkani ammasumi oqarpoq.

Partiip aqqartartoq taanna kisimiinnersoq, arlariinersut, sunik imaqarnersoq sunalu siunertaralugu nunatta sineriaaniinnersoq ilaatigut paaserusuppaa.

Siumup Issittumi Sakkutooqarfik (AKO) aqqartartup angalaneranik ilisimatinneqarsimanersoq, aammalu Kalaallit Nunaata eqqaani aqqartartut allat angalanerat naammattumik nakkutigineqarnersut aamma paaserusuppaa.

Issittumi Sakkutooqarfimmiit oqaaseqarusunngitsut

Sermitsiamiit aqqartartoq pillugu Issittumi Sakkutooqarfimmut assingusunik apeqqutinik nassiussivugut, Illersornissamilli Pisortaqarfiup nunani allani pissutsit oqaaseqarfigerusunngilaat.

Issittumi Sakkutooqarfik ima paasissutissiivoq:

"Napparsimmaviliaassineq Amerikami oqartussaasut qanimut suleqatigalugit ingerlanneqarpoq.

Illersornissaqarfiup nunat allat akisussaaffii oqaaseqarfigineq ajorpai. Taamaattumik saaffiginnissummut akissutinik allanik ilassutissaqanngilagut.”

Aqqartartup Nuup eqqaaniittoq Facebookikkut saqqummiunneqarmat tamanit paasineqarpoq, tassani Issittumi Sakkutooqarfimmiit amerikamiut aqqartartuanni inuttamik ataatsimik Nuup avataani 7 sømilinik ungasitsigisumiittumiit napparsimmaviliaassisoqarsimanera nassuiaatigineqarluni.

Aammattaaq pisup ilaa takornariat angallataanniit sanioqquttumiit immiunneqarsimavoq, immiussarlu Facebookimi siammarterneqarluni.

Paasissutissanik piaartumik apuussisoqartarnissaa kissaatigineqartoq

Præsident Donald Trumpip Kalaallit Nunaata USA-mit tiguarneqarnissaanik oqariartuuteqartarnerata kingunerisaanik Kalaallit Nunaata/Danmarkip USA-llu akornanni pissutsit ilungersunarsinikuunerisa kingorna taama pisoqarpoqæ

Erik Jensenip Siumumeersup iligiit ikioqatigiissinnaanerat tupinnanngitsoq allakkani ammasumi oqarpoq:

“Kisianni eqqarsaaterpassuit piffissamilu matumani nunatsinni najummatsisimanartut imaannaanngiffianni,

isumaqarpunga paasissutissanik piaarnerpaamik apuussisoqartarnissaa pingaartuusoq.”