Siumut Danmarkip Kalaallit Nunaanni aningaasarsiorsimaneranik misissuisoqarnissaanik piumasaqartoq
Danmarkip Kalaallit Nunaannik piginnittuunermigut aamma politiit eqqartuussiviillu ammanerannik sivitsortitsinermigut qanoq aningaasarsiortigisimanera misissuiffigineqassasoq Siumup piumasaraa.
- Eqqartuussiviit politiillu Kalaallit Nunaanni tamarmi nalunaaqutaq 8-miit 16-imut ammasassapput, Ineqi Kielsen RADIO IIII-mut oqarpoq, kalaallillu inatsisitigut isumannaatsuunerata nukittorsarneqarnissaa piumasaqaatiminut tunngavilersuutigaa.
Toqqorsivimmit assi: Leiff Josefsen
Siumut Danmarkimi naalakkersuisuulersussanut piumasaqartoq Siumup siulittaasuata tullia folketingimut qinigassanngortittoq Ineqi Kielsen Radio IIII-mi apersorneqarluni oqarpoq:
- Danmarkip Kalaallit Nunaannit qanoq iluanaaruteqartiginera ammasumik misissuiffigisariaqarparput, Ineqi Kielsen oqarpoq Danmarkillu Kalaallit Nunaannik pigisaqarnini aningaasarsiutigineraa qularutiginagu nangilluni oqarpoq.
Taamaammat misissuineq taamaattoq Danmarkip Kalaallit Nunaannut ataatsimut tapiissutaasa qaffannissaannut atorneqarsinnaasoq Ineqi Kielsen isumaqarpoq:
- Danmarkimi isumaqatiginninniarnissatsinnut periarfissaqalissaagut, Ineqi Kielsen oqarpoq, taassumalu maanna nunamut tapiissutit 4,6 milliardit koruunit missaanniittut naammanersut apeqquserpaa.
- Nunamut tapiissutinik apeqqusiiuarneq, matumani kalaallit qallunaanut qujamasunnerusariaqaraluarnerannik oqalunneq, qatsulluinnarpara, oqaluttuarpoq Kalaallit Nunaatalu Danmarkimit pisiarisartagai ilaat, soorlu salami, qisuit, biilit qamuteralallu, eqqaavai.
Ammasarfiit sivitsorneqassasut
Misissuinerup saniatigut Kalaallit Nunaanni tamarmi pisortat allaffeqarfiisa ammasarfiisa sivitsorneqarnissaat siulittaasup tulliata aamma piumasaraa:
- Eqqartuussiviit politiillu Kalaallit Nunaanni tamarmi nalunaaqutaq 8-miit 16-imut ammasassapput, Ineqi Kielsen RADIO IIII-mut oqarpoq, kalaallillu inatsisitigut isumannaatsuunerata nukittorsarneqarnissaa piumasaqaatimini tunngavilersuutigaa.
Siumup piumasaqaatai piviusunngortinneqartariaqartut taamaammallu partiip naalakkersuisunngortitsinissamut qinigaasinnaanissaanut pisariaqartut Ineqi Kielsen apersorneqarnermini erseqqissumik oqarpoq:
- Trumpip Kalaallit Nunaat pillugu oqaaseqarnerata kingorna periarfissat ammarneqartut takuarput, taamaammat aamma piumasaqarnerulertariaqarluta ilikkarparput.
Ilaasortat Atlantikup avannaaneersut Danmarkimi nunap iluani politikkimut siornatigut aalajangiisuusimapput, ilaatigut silap pissusianut ministeri Lars Aagaard 2025-mi tatiginnikkunnaarsinneqariaraluarmat Atlantikup avannaaneersut sisamaasunit pingasut tapersersorpaat.
