Siumut erseqqissumik paasisarusuppoq: Sungiusarneq sorsunnissamut piareersarnerusimava?
Danskit sakkutuuisa 2026-mi januuarimi Kalaallit Nunaanni ingerlatsinerat pillugu paasissutissat nutaat saqqummiunneqartut apeqqutinik ingaaruteqartunik pilersitsipput. Tassa qanoq suliarineqarneranik aammalu qanoq paasissutissat Kalaallit Nunaanni innuttaasunut tunniunneqarsimaneranik eqqarsaatigalugu, Siumut isumaqarpoq.
Sakkutuut Nuummi umiarsualivimmi januaarimi alapernaarsuisut.
Assi: Mads Claus Rasmussen/Ritzau Scanpix
Danmarki Amerikamiut Kalaallit Nunaannut saassusseratarnissaannut januaarimi piareersarsimasoq DR-ip sisamanngornermi oqaluttuaraa. Qallunaat sakkutuuisa amerikamiut saassussinissaat pinngitsoortinniarlugu qaartartunik Nuummi Kangerlussuarmilu mittarfinnik aserorterissutigisinnaasaminnik ilaatigut nassataqarsimapput.
DR-ip allaaserisaq danskit naalakkersuisuini, sakkutuut naalagaaffianni atorfilinni qullersaasuni aamma Danmarkimi, Frankrigimi Tysklandimilu paasissutissiisunik tunngaveqarluni allappaa.
Paasissutissat saqqummiunneqartut politikkikkut, ilaatigut Siumumit, qisuariarfigineqarput.
- Eqqortumik paasissutissiisoqarpa?
Pisoq pissutsit qanoq iliuuseqarfigineqarnerannut Kalaallit Nunaannilu innuttaasunut paasissutissiinermut tunngatillugu ilungersunartunik apeqqutinik kinguneqartoq partii isumaqarpoq:
- Siornatigut sakkutuut sungiusarnerattut saqqummiunneqarsimasup piareersarnerit erseqqissut annertuut aammalu sorsunnissamut periarfissaq pillugu piareersarnerusimasut maanna takutippaat. Ilaatigut atorneqarput qaartiterutit aammalu nakorsaqarnikkut piareersaatit – taakkua nalinginnaasumik atorneqartartut ingerlatsinerni piviusuni, sungiusarnerni nalinginnaasuniunngitsoq.
- Ernumanartoq tassaavoq pisoq Kalaallit Nunaanni isumannaallisaanermut pingaaruteqartoq piviusumut sanilliullugu annikinnerusumik saqqummiunneqarsimanera, folketingimut qinigassanngortittut marluk Ineqi Kielsen Ane Lone Baggerilu ataatsimoorussamik tusagassiuutitigut nalunaarummi allapput.
Kalaallit eqqortumik paasissutissinneqarsimanersut ersernerluttoq isumaqarput:
- Taamaattumik erseqqissumik paasisariaqarpoq:Kina aalajangerpa pissutsit “sungiusarneq”mik taaneqassasut? Naalakkersuisut qanoq ilisimasaqarpat, qaqugukkullu?
Iliuuseqartoqarnera Chemnitzip nuannaarutigaa
Folketingimut ilaasortaajunnaaqqammersoq Aaja Chemnitz (IA) DR-ip allaaserisaa pillugu aamma oqaaseqarpoq.
Paasissutissat qaammatialuit matuma siorna pissutsit qanoq ilungersunartigisimanerannik ersersitsisut isumaqarpoq. Sakkutuunik Kalaallit Nunaannukartitsisoqarsimanera, upalungaarsimasullu sulitinneqarnera nuannaarutigalugu allappoq:
- Tamatumani aallaavigivara sakkutuut Nunatta illersornissaanut pisussaaffeqarnerat aamma Issittumi sungiusartarnissat pisariaqartinneqarnerat.
- Danskit naalakkersuisui tusaaniarmata ingerlaannarlu iliuuseqarmata nuannaarutigaara, Aaja Chemnitz Facebookimi quppernermini allappoq.
