Siumut Nalerarlu spiralilersuisimaneq pillugu nalunaarusiat pillugit nalunaaruteqartut: Danmark akisussaatinneqartariaqarpoq

Naalakkersuisut spiralilersuisimaneq pillugu immikkut ilisimasallit nalunaarusiaat tallimanngormat saqqummiuppaat, partiillu illuatungiliuttut marluk Naleraq aamma Siumut qisuariarput.

Danskit naalagaaffiat nunat tamalaat eqqartuussiviannut suliassanngortinneqartariaqartoq Siumut isumaqarpoq.

AAMMA ATUARUK

Inuiannik nungusaanerua? Naamik, isumalioqatigiissitamit anisut oqarput

Arnat namminneq ilaqutaqalernissaminnik sinnattoqarsimagaluartut, timiminnut inuunerminnut siunissaminnullu namminneq aalajangiisinnaassuseqartinnagit akuliuffigineqarsimasut partiip siulittaasuata Aleqa Hammondip erseqqissarpaa.

- Oqaluttuarisaanitsinnilu pisut tamatta inuiattut eqqorneqaatigaavut, Aleqa Hammond tusagassiutitigut nalunaarummi oqarpoq.

Niviarsiaqqat arnallu eqqugaasimasut taarsiiffigineqarnissaat Folketingip akuerimmagu nersualaarpaa, Kalaallit Nunaatali tamanna akueriinnassanngikkaa isumaqarpoq.

Aamma suliat allat arlallit eqqaavai, soorlu inatsisitigut ataataqanngitsut pillugit suliaq, Avanersuarmi pinngitsaaliissummik nutsertitsineq kiisalu Amerikamiut sakkutuuisa Danmarkimit akuerineqarsimasut nunamiittut mingutsitsingaarnerat.

- Taamaattumik Siumut isumaqarpoq, politikkikkut Naalagaaffiup Danmarkip inuiaat nungutinneqarnissaat siunertaralugu iliuuseqarsimanera inerniliutissanngikkipput. Tamanna inatsisitigut naliliinerussaaq, nunat tamalaat akornanni eqqartuussiviup pisinnaatitaasup arlaannaannulluunniit attuumassuteqanngitsup suliarisariaqagaa, taannaavorlu aamma Inatsisartuni partiit tamarmik ataatsimooruttariaqagaat, Aleqa Hammond allappoq.

Naleraq: Nalunaarusiat nutaat naalagaaffiup Danmarkip inuit pisinnaatitaaffiinik unioqqutitsisimaneranut akisussaaffia pillugu apeqqusiipput

AAMMA ATUARUK

Inuiannik nungusaasoqarsimava? Pisortatigoortumik immikkut ilisimasallit taamaannersoq taamaannginnersorluunniit akipput

Naleqqami aamma taama oqartoqarpoq, partiimilu siulittaasoq Pele Broberg taamatut oqarpoq.

Danmarkip inuiannik nungusaaneq pillugu isumaqatigiissut naapertorlugu naalagaaffittut akisussaaffia pillugu eqqartuussut pituttuisoq Naalagaaffiit Peqatigiit Nunat Tamalaat Akornanni Eqqartuussiviannit, ICJ-mit, taamaallaat aalajangerneqarsinnaasoq Naleraq isumaqarpoq.

- ICJ-p eqqartuussutaa qanorluunniit ikkaluarpat Naleqqap ataqqissavaa.

Danmarkip isumaqatigiissutip unioqqutinneqarsimanera nammineq nassuerutiginngippagu naalagaaffiup allap suliaq ingerlateqqittariaqaraa Naleqqap erseqqissarpaa. Kalaallit Nunaata suli naalagaaffiunnginnerput pissutigalugu nammineerluni ingerlateqqissinnaanngilaa, partiimi siulittaasoq Pele Broberg allappoq:

- Naalakkersuisut angalanernut nunanullu allanut attaveqarnermut 9 millionit koruunit sinnerlugit atorsimavaat. Maanna takussavarput attaveqatigiinneq aamma ikinngutitaartornermik kinguneqarnersoq, suliap misissornissaanut peqataarusuttut suliaq eqqartuussivimmi suliarineqarsinnaaqqullugu suleqataarusuttunik

pilersitsisimanersut, Pele Broberg oqarpoq.