Pingajussaaneerinninneq naammassivoq – Kalaallit Nunanni piffissap aalajangersarneqarnera allanngussaaq

Inatsisinik Atuutsitsinermut Ataatsimiititaliap inassutigaa nalunaaquttap UTC-3-mut utertinneqarnissaa, aasaaneranili nalunaaqutaq suli atuutiinnarneqassasoq inassutigaa.

Inatsisartut siunnersuut tamanna malissavaat?

Siumup piffissamik aalajangersaanermut siunnersuutaata pingajussaaneerneqarnera aallartinnerani tamanna erseqqississaaq. Taamaattumik politikerit nunami piffissamik aalajangersaaneq qanoq aaqqinniarnerlugu inaarutaasumik ullumikkut aalajangissapput.

Naalakkersuisut siulittaasuat Jens-Frederik Nielsen (D) siullersaalluni oqaluttarfimmiippoq.

Allannguutigineqartussaq malillugu nalunaaquttap-akunneri nalinginnaasut UTC-3-mut 2027-mi oktobarip 31-aniit allanngortinneqassapput.

Europap nalunaaqutaa nalunaaquttap-akunneranik ataatsimik ulloq taanna aallarnerfigalugu siuartinneqarpoq.

Inatsisissatut siunnersuut akuerineqassappat qanoq kinguneqassanersoq siulittaasup erseqqissaqqippaa, Inatsisartulli aalajangiinerat ataqqiniarlugu uteqqippaa. Tamannalu siuliani aamma taama oqaatigaa.

Siumut ajugaanera nakkarsarneqassanngilaq

Erik Jensen (S) tulliulluni oqalugiarpoq. Siumup eqimattaata oqaluuserisassanngortitaa maanna naammassisinnaagamikku nuannaarutigaa.

AAMMA ATUARUK

Piffissap aalajangersarneqarnerata allanngortinnissaa isumassarsiatsialaanersoq, Naalakkersuisut siulittaasuata erseqqissumik akissutissarsisinnaanngilaa

- Ataatsimiititaliap Siumup siunnersuutaa akuerineqarnissaa innersuutigaa. Innuttaasut amerlasuut atsiornernik katersuinermut peqataapput, tamannalu akiuunnitta ingerlateqqinnissaanut nukissaqalersillutalu nakussatsissutigaarput, Erik Jensen oqarpoq, innuttaasut kiisalu politikeriusimasoq Qupanuk Olsen, nalunaaquttap utertinneqarnissaanut siunnersuuteqaqqaartoq, qutsavigillugit.

- UTC-3-mut uteqqissaagut. Aasaanerani nalunaaqutaq atorunnaarsilluinnarnavianngilarput, Naalakkersuisulli aasaanerani nalunaaquttap atorunnaarsinnissaanut piginnaatitaapput, Erik Jensen oqarpoq, isumaqatigiissullu pitsaalluinnartutut taavaa.

Naleqqamiit Erik Jensen aperineqarpoq, taassuma aasaanerani nalunaaqutaq atuutiinnarnissaa naammaginngilaa, 2023-milu pissutsinut uterneq ajugaanertut nalilerneqarsinnaanersoq apeqqutigaa.

Aasaanerani nalunaaqutaq atorunnaarsinneqarnissaa suli anguniagaasoq maannakkumulli taamaaliortoqanngitsoq, Erik Jensen oqarpoq. Inatsisinut Atuutsitsinermut Ataatsimiititaliap inassutigaa Kalaallit Nunaata EU-p taamaaliornissaa utaqqigaa, taamaasiornikkummi aasaanerani nalunaaquttap akunnermik ataatsimik nikigassutaannginniassammat. Nalerarli isumaqarpoq taamaalilluni EU aalajangertassagaa qaqugukkut Kalaallit Nunaat aasaanerani nalunaaqutaq atorunnaarsissanersoq.

Ataatsimiinneq unitsinneqarallartoq

Ilaasortat ilaasa oqaatsinik atuinerat siulittaasoqarfimmi eqqartorneqassammat ataatsimiinneq unitsinneqarallassasoq Inatsisartut siulittaasuat Kim Kielsen (Attaviitsoq) nalunaaqutaq 10.25 nalunaarpoq.

Siumup Naleqqallu oqallinnerat innersuussutigaa, tassani ataatsimiititaliap sulinera eqqartorneqarpoq, oqallinnerullu nipaa sakkortusiartuinnarpoq. Ataatsimiinneq qaqugu aallarteqqinneqassanersoq oqaatigineqanngilaq.

Ataatsimiinneq 11:55 aallarteqqippoq.

Siulittaasoqarfik ataatsimiillunilu oqaatsit atorneqarnerat suliaraa. Oqaaseq "ajortuliaq" Inatsisartuni oqaluuserisassat suliarineqarnerannut atatillugu atorneqarsinnaanngitsoq siulittaasoqarfiup aalajangerpaa, Kim Kielsen ataatsimiinneq ammaqqinneqarmat oqarpoq.

Oqaaseq “ajortuliaq” assigiinngitsunik isumaqarsinnaavoq.

Aalajangiineq innuttaasunit sunnerneqartoq

- Aqqutaa takivoq, Aki-Matilda Høegh-Dam (N) oqaluttarfimmiitilluni piffissamik aalajangersaanermut inatsisissatut siunnersuutip qanoq sivisutigisumik suliarineqarsimanera pillugu oqarpoq.

Inuit akerliussutsimik takutitsinerisa atsiornernillu katersuinerisa ataatsimiititaliami amerlanerussuteqartut UTC-3-mut uternissamut piareersimanerannut sunniuteqartoq taanna oqarpoq.

Sumiiffiit aalajangersimasut piffissap aalajangersarneqarneranut atatillugu tusarniaaffigineqartarnissaat, Aki-Matilda Høegh-Damip Naleqqap kissaatigigaa saqqummiuppaa.

- Innuttaasut tamarmik piffissamik aalajangersaanissamut ilungersorlutik akiuussimasut qujaffigaakka, oqarpoq 2022-mi nalunaaquttallu allanngortinneqarnera annertuumik kukkunerusoq erseqqissarpaa.

Kim Kielsenili taamanikkut aalajangerneq, amerlanerussuteqartunit tapersersorneqarmat kukkunerusimanngitsoq oqarpoq. Inatsisartut isumaqatigiissut 2022-mi piffissaq UTC-2-mut allanngortippaat.

Naleraq siunnersuutip akuerinissaanut piumassuseqarnersoq Siumup apeqqutigaa.

- UTC-3-mut uternissarput akerlerinngilarput, suliarli paatsiveerusimaarluni ingerlanneqarmat taamaammat sungaartumik taasivugut, Aki-Matilda Høegh-Dam akivoq, tamannalu isumaqarpoq Naleraq akuersinanilu akerliunngitsoq.

Kikkut tamarmik isumaat eqqorneqarsinnaanngilaq

Mimi Karlsen Inuit Ataqatigiinnit siunnersuut innuttaasunit kissaatigineqarmat tapersersorumallugu oqaluttarfimmit oqarpoq.

Taassumali inuppassuit piffissap aalajangersarneqarnerata allanngornera nuannaarutigigaat aamma oqaatigaa.

- Naaperiaanissaq pingaaruteqarluinnarpoq. Nassuerutigissavarpulli kikkut tamarmik isumaat eqqorneqarsinnaanngimmat, Mimi Karlsen oqarpoq.

Aki-Matilda Høegh-Damip apeqquteqaatimigut atsiornernik katersineq 4000-init amerlanerusunik taaneqartoq innersuussutigaa. Tamanna Kalaallit inuiaqatigiit taasisinnaasut 10 procentiisa taasineranik aallaaveqarpoq.

Meeqqat piffissap allangornera, pissutigalugu sinissinnaanngitsut, utoqqatsissutaanngitsoq, Nivi Olsen (D) ataatsimiittarfimmiit oqarpoq. Avannaaneersuunini aallaavigalugu, aasaanerani ulloq unnuarlu seqernup kaaviinnalertarnera meeqqat sungiusimagaat, taassuma tunngavilersuutigaa.

Inatsisissatut siunnersuut 16-it akuersissutigaat, arfineq-marluk aakuerseqataanatillu akerliunngillat. Taamaalillunilu inatsisissatut siunnersuut akuerineqarpoq.

Taamaalilluta aappaagu piffissap aalajangersarneqarneranut UTC-3-mut utissaagut.