Siunnersuisoqatigiit misissuisoqarnissaa sioqqullugu Kalaallit Nunaanni inuit pisinnaatitaaffii pillugit unammilligassat paasissutissiissutigineqartut
Meeqqanik kinguaassiuutitigut atornerluinerit amerlassusaat, aamma qanigisat akornanni arnanut meeqqanullu nakuuserneq pillugu paasissutissanik ilisimasanillu amerlanerusunik pisariaqartitsisoqartoq, Inuit Pisinnaatitaaffii pillugit Siunnersuisoqatigiit nalunaarutigaat.
Nunanit ukunannga aallartitat: Kalaallit Nunaanni inuit pisinnaatitaaffii pillugit Østrigi, Egypten, Georgia, India, Norge, Poleni, Slovenia, Spania, Tyrkia, Canada, Frankrigi, Saudi Arabia aamma Schweiz paasisaqarput.
Assi: Inuit Pisinnaatitaaffii pillugit siunnersuisoqatigiit.
Danmarkip Kalaallit Nunaatalu Naalagaaffiit Peqatigiit isumaqatigiissutaannik naammassinninniarlutik ataatsimut iliuuserisimasaat qanittukkut Naalagaaffiit Peqatigiit Inuit Pisinnaatitaaffii pillugit Siunnersuisooqatigiivinit misissorneqassapput.
Tamanna pissutigalugu Inuit Pisinnaatitaaffii pillugit Siunnersuisoqatigiit (IPPS) Danmarkimi aallartitaqarfiit Kalaallit Nunaanni inuit pisinnaatitaaffiinut tunngatillugu unammilligassat pingaarnerit pillugit ilisimatippaat.
IPPS-imi siulittaasuugallaartup Kelly Berthelsenip qanigisariinni, ingammik arnanut meeqqanullu, nakuusertoqarneranik akiuiniarnermi Naalakkersuisut arlalinnik pitsaasunik suliniuteqarsimasut tamannalu pingaaruteqartoq erseqqissaatigaa.
Taamaakkaluartoq annertuumik sukumiinerusumillu paasissutissanik pisariaqartitsineq suli annertuvoq. Nakuusertoqarsimatillugu naatsorsueqqissaarnermi suiaassuseq, qassinik ukioqarneq imaluunniit nakuuserup suussusia immikkoortinnagit ”nakuusernermik” nalunaarsorneqaannartarpoq.
Tamanna pillugu ajornartorsiutip ersarissumik suussusersinissaa ajornarpoq, taamaammat qanigisanut nakuusernerit pinaveersaatinnissaannut Naalakkersuisut sukumiisumik suliniuteqarnissartik ajornakusoortissinnaallugu, IPPS tusagassiuutitigut nalunaarummi allappoq.
Meeqqat piitsut amerliartortut
Meeqqat kinguaassiuutitigut atornerlunneqarsimasut amerlassusaat aamma paasissutissiissutigineqarput. Ukiuni kingullerni nalunaarutigineqartut ikiliartoraluartut kisitsisit sulia annertusut IPPS-imit oqaatigineqarpoq.
Aammattaaq meeqqat piitsut IPPS-imit isumakuluutigineqarput, kisitsisillu meeqqat inuusuttullu aningaasatigut ajornartorsiortut ukiuni kingullerni amerliartortut takutikkaat innersuussutigineqarput.
Meeqqat kisermaanik angajoqqaallit eqqugaanerugaluartut, angajoqqaanik marlunnik pilersuisullit aamma takussaaneruleraluttuinnartut, siunnersuisoqatigiit naliliipput.
- Neriuppunga nunatsinni inuit pisinnaatitaaffii unammillernartut pillugit ilisimasagut, nunat tamalaat akornanni siammarterinerput, nunatsinni inissisimaffitsinnut ajunngitsumik sunniuteqassasoq, IPPS-imi siulittaasuugallartoq Kelly Berthelsen oqarpoq.
”Inuit pisinnaatitaaffii pillugit misilitsinneq” maajimi 2026-mi pissaaq, tassanilu Naalagaaffiit Peqatigiit Inuit Pisinnaatitaaffii pillugit Siunnersuisoqatigiivisa Kalaallit Nunaanni Danmarkimilu inuit pisinnaatitaaffii pillugit inissisimaneq tamakkerlugu misissuiffigalugulu nalilersussagaat, IPPS paasissutissiivoq.
