Sooruna vikingit Finlandimeersut tusanngisaannarivut?

Vikingit eqqartorneqaleraangata suna eqqaaqqaarneqartarpa?

Inuppassuit immaqa umiatsiat takisuut Nordsøkkut malissiortut takorlooqqaartarpaat. Sorsuttartut Tuluit Nunaanni niullutik ujajaasut, inunnik aallarussisut toqoraasullu. Europap kimmut sineriaa sinerlugu ingerlaartut imaluunniit Savalimmiunut, Islandimut imaluunniit Kalaallit Nunaannut angalasut.

Tamakku ilisarnaatigaat vikinginut danskinut norskinulluunniit attuumatinneqartarnerat taakkumi kimmut imaanut toqqaannartumik attaveqarmata.

Vikingilli kangisinnerusumi inuusut? Tamanna Videnskab.dk-mi atuartartup Finnip eqqumiigaa, taamaattumillu apeqquteqarluni allaffigisimalluta?

»Sooruna Finlandimit vikingit tusarneq ajorivut?«

Apeqqut taanna Søren Sindbækimut, qanganisarsiuumut, vikingit nalaanni pisunik ilisimatusartunut Aarhusillu ilisimatusarfiani prodekaniusumut ingerlateqqipparput.

Nassuiaavoq Finnip apeqqutaanut akissut nunarsuarmi vikingit nalaanni silarsuarmut tunngannginnerusoq, nunarsuarmulli ullumikkut inuuffigisatsinnut tunnganerusoq. Tamanna uterfigissavarput.

Assigiinnik oqaaseqarlutillu kultureqarput

Aallaqqaammut naqissuseriartigu: Finlandimi vikingeqarsimavoq.

Ilami vikingip Islandimit Danmarkimut Norgemulluunniit Finlandimut tikittup innuttaasuni tikitamini kulturi taanna ilisarissavaa, Søren Sindbæk nassuiaavoq.

Immaqalu assigiinngissut ilimagisamit annikinnerujussuuvoq, itisiliivorlu:

Finlandimi Sverigemilu vikingit aamma sorsuttartuullutillu niuertuupput. Tamatuma saniatigut guutii aamma tassaapput Thor, Odin aamma Freja, Søren Sindbæk oqaluttuarpoq.

– Sumiiffiit allat sorpassuarnik niueqatiginissaat pisariaqartippaat, nunallu sananeqaataa peqqutigalugu attaveqarneranni umiatsiamik angalaqaat. Sorsuttartuupput, tamanna ilitsoqqussaalluni, angutit inuusuttut ataqqinartumik inuussagunik aallartariaqartut kuultimik ataqqinaammillu pissarsiniarlutik.

Sumiillu kingoqqisuunerat qiviaannarlugu takuneqarsinnaavoq, qanganisarsiooq nangilluni nassuiaavoq. Assersuutigalugu pinnersaatit atorneqartut vikingit nalaanni kusagineqartuusut Danmarkimi, Norgemi Islandimilu nassaarineqartarput, kiisalu aamma Sverigemi Finlandimilu.

Isorartugaluartorli akunnerminni aamma oqaloqatigiittarput. Vikingit nalaanni nunani avannarlerni oqaatsit ullumikkorniit assigiinnerupput. Taamanikkut ullumikkut danskisuumik taasatsinnik oqaluttarput, Søren Sindbæk nassuiaavoq naangillunilu:

– ­Finlandimi oqaatsit nunani avannarlerni oqaatsinit allanit allaaneroqaat, ullumikkutuulli Finlandimi vikingit aamma svenskisut oqaluttarput, oqaluttuarpoq.

– Vikingi soorlu Harald Hårderåde Ribemiit Ladogap tasialiarsinnaasimavoq, tassanilu ajornaquteqartorsuunngitsumik sumiiffinni inuusut ammit silvillu niuerutigineqarnerat pillugu oqaloqatigisinnaasimallugit.

Kikkut tusaamaneqarnersut oqimaaqatiginngilaq

Finnillu apeqqutaanut uteqqeriarutta: Sooruna Finlandimi vikingit tusaamaneq ajorivut?

Akissutaasinnaavoq Amerikami Tuluillu Nunaanni silarsuaq naapertorlugu inuunerput, Søren Sindbæk nassuiaavoq – piffissami piviusulersaarutit, pissanganartuliat internetimilu tusagassiorfiit sunik imaqassanersut nunanit soorlu Tuluit Nunaannit USA-miillu aalajangerneqarnerusarlutik.

Taamaattumik vikingit tusaamasavut aamma taakkuupput Atlantikukkoortut – Tuluit Nunaanni qeqertanut, Islandimut, Savalimmiunut, Kalaallit Nunaannut Vinlandimullu, soorlu Amerikap timmut sineriaa vikingit nalaanni taama taaneqartartoq. Taamaattumik vikingit taakku Atlantikup imartaanut sineriaqarput, tassalu Danmarkimut Norgemullu.

– Taamaattumik assersuutigalugu Tuluit Nunaanni Danmarkimiluunniit vikingip ilivianik nassaaraanni vikingit pillugit oqaluttuanut inuppassuit nalunngeriigaannut atatinneqarsinnaasarput, taamaattumik nassaat aamma sammineqarnerusarput, Søren Sindbæk oqarpoq.

– Finlandimilu – aamma Sverigemi - vikinginit nassaat nunarsuarmioqatigiinnit maluginiarneqannginnerusarput.

Ujajaanerinnaanngitsoq

Tamannalu uggornartuusoq qangarnisarsiooq isumaqarpoq.

Siullertut, Tuluit Nunaannik aallaaveqartumik vikingit oqaluttuarineqartut tassaanerusarput ujajaasut, inunnik aallarussisut aserorterisullu – ilaatigummi Tuluit Nunaanni taamaaliormata.

– Ujajaaneq vikingit oqaluttuarisaanerisa ilagaat, kisiannili aamma allarpassuupput, Søren Sindbæk oqarpoq.

– Vikingit kunngeqarfinnik pilersitsipput pallittaalisarujussuarnillu sanaartorlutik – umiarsualiullaqqissorsuuppullu niuertorsuullutillu. Ilisimavarput Finlandimi vikingit annertuumik amernik niuertarsimasut, niueqataallu allaat Kangiani qiterlermeerlutik.

Nassaat Finlandimeersut Finlandip avataaniittut

Tamatuma saniatigut Finlandimi Sverigemilu vinkingit nalaannit pissanganartorpassuit suli nassaarineqartarput inuppassuit tusarsimanngisaat, Søren Sindbæk oqarpoq:

– Birka eqqaassanngikkaanni Sverigemi tusagassiuutini vinkingit nalaanneersunik tusagassaqanngisaannangajappoq, qangarnisarsiooq oqaluttuarpoq.

Birka Sverigemi qeqertami Björkömi illoqarfiuvoq niuerfik, ukiumit 750-miit 950 tungaanut pingaaruteqartupilussuaq.

Ilisimaneqaataasa ilagaat ilerrit alutornartorpassuit. Vikingit nalaanni illoqarfik naapittarfiusoq pingaarutilik, Østersømi qanittuanilu, Ruslandimi Nordsømilu niuernermi aqqutit naapiffiat.

– Taamaattorli assersuutigalugu Sverigemi Aska-Hallen taama sammineqartiginngilaq, naak ukiuni kingullerni illorsuarujussuit assallugit nuisinneqarsimasut tassanilu kuultimik qiperugaararpassuarnik nassaartoqarluni, taamaalilluni ilimagineqarluni piffissani pineqartumi Sverigemi sumiiffippassuit pissaaneqarfiunerpaat ilaat tassaniittoq.

Finlandimi pingaarutillit ilagaattaaq sumiiffippassuit vikingit nalaanni kuturikkut Finlandimiittut ullumikkut nunap killeqarfiata avataaniimmata:

­– Finlandimi oqaluttuarisaanermut tunngasut qimerlooraanni sumiiffimmiittorpassuit Ladogap tasia tikkuarpaat ilaatigut illoqarfik niuerfik Staraja Ladoga. Taanna vikingit silarsuaanni niuerfissuit ilagaat, Søren Sindbæk oqarpoq.

– Ullumikkut sumiiffik Ruslandimiippoq, peqqutissaqarluartumillu tikikkuminaalluni qanganisarsiornikkullu assaalluni. Tassaniipput oqaluttuarisaanerup ilarujussua nunap iluani toqqortaq, naggasiivoq.