UPERNAAKKUT ATAATSIMIINNEQ
Soraarnerussutisiaqarnissamut aaqqissuussamut allannguutit isornartorsiorneqaqisut Inatsisartuni akuersissutigineqarput
Soraarnerussutisiaqalernissamut ileqqaartussaatisaanermut allannguutaasinnaasut suleqatigiissitanit immikkut ilisimasalinnit misissorneqarneranni naammattumik ileqqaarsimanngitsut akileraarutitigut akilersuitinneqassanngillat.
Naalakkersuisut soraarnerussutisiaqalernissamut aaqqissuussaq immikkut ilisimasalinnik misissorneqassasoq aalajangerpaat. Aaqqissuussaaneq utoqqalinersianut, tjenestemandit soraarnerussutisiaannut aamma soraarnerussutisiaqalernissamut aaqqissuussamut peqataasussaatitaanermut tunngavoq.
Assi: Oscar Scott Carl
Tjenestemandit soraarnerussutisiaqarnissamut ileqqaartussaatitaanermut ilaassanngillat akileraarutitigullu akilersuititsisarneq unitsikkallarneqarluni.
Taakku Inatsisartut soraarnerussutisiaqalernissamut aaqqissuussap allanngortinnissaanut ataasinngormat oqallinnerminni akuersissutigaat.
Naalakkersuisut soraarnerussutisiaqalernissamut aaqqissuussinerit, ilaatigut utoqqalinersiat, tjenestemandit soraarnerussutisiaat aamma soraarnerussutisianut aaqqissuussaanermut peqataasussaatitaanermut malittarisassat immikkut ilisimasalinnit misissorneqartussanngorlugit suleqatigiissitaliornissaq aalajangerpaat.
Naalakkersuisooqatigiit soraarnerussutisiaqalernissamut aaqqissuussineq nalilersorneqarumaartoq neriorsuipput, Naalakkersuisullu immikkut ilisimasallit suleqatigiissitaasa suliatik naammassinissaata tungaanut annertunerusumik aalajangeerusugatik.
Suliap naammassineqarnissaata utaqqinerani soraarnerussutisianik ileqqaartussaatitaaneq 9 procentimi nikisinneqaqqissanngilaq.
Soraarnerussutisiaqalernissamut aaqqissuussinermut inatsisitigut piumasaqaatigineqartumut allannguutit nutaat ukiumi akileraarfiusumi 2026-mi atuutilissapput.
SORAARNERUSSUTISIAQ ANISSAMUT AAQQISSUUSSINERMUT PINNGITSOORANI ILAANISSAQ PILLUGU INATSISARTUT INATSISAAT
Soraarnerussutisiaqalernissamut pinngitsoorani ileqqaartussaatitaanermik aaqqissuussineq naapertorlugu inuit 18-ileereersimasut tamarmik, Nunatsinni tamakkiisumik akileraartussaatitaasut, soraarninngornissartik tikillugu soraarnerussutisiaqalernissamut aaqqissuussinermut akiliuteqartassapput.
Aningaasat akiliutigineqartussat inuup ukiumi ataatsimi isertitaasa A-t aamma B-t katinnerisa minnerpaamik 9 procentii akiliutigineqartassapput.
Ukiumut 150.000 koruunit ataallugit isertitaqaraanni procentit ikinnerusarput.
Soraarnerussutisiaqalernissamut aaqqissuussap qineqqusaarutaanera
Inatsisartunut siorna qinersinissamut partiit amerlanerussuteqartut soraarnerussutisianut aaqqissuussap atorunnaarsinnissaa qularutiginngilaat.
Aaqqissuussaaneq 2016-imi akuersissutigineqarpoq, innuttaasullu soraarnerussutisiaqalerniarlutik ileqqaagaqartariaqalernerat sivisuumik isornartorsiorneqartarluni.
Taamaattumik Atassut, Demokraatit Nalerarlu inatsisip atorunnaarsinneqarnissaa kissaatigaat, IA-p allannguisoqarnissaa Siumumillu aaqqissuussap nutarterneqartuarnissaa piumasaralugu.
Qinersinerulli kingorna pissutsit allanngulaarput. Demokraatit, IA, Siumut aamma Atassut naalakkersuisooqatigiinnissamut isumaqatigiissutaanni soraarnerussutisiaqalernissamut aaqqissuusseqqinneq isumaqatigiissutigineqarpoq, tamatumunngalu soraarnerussutisiaqalernissamut aaqqissuussinerput peqataasussaatitaanerup nalilersorneqarnissaa – tassa atorunnaarsinneqavinnani - ilaalluni.
Tjenestemandit ileqqaartussaatitaajunnaartut
Tjenestemandit aningaasarsiaminnit soraarnerussutisiaqalernissamut maannamut ileqqaartussaatitaanikuunngillat, immikkulli ittumik tapisiaminniit sulinerunerminniillu isertitaminniit ileqqaartussaatitaallutik.
Aaqqissuussineq nutaaq naapertorlugu tjenestemandit soraarnerussutisiaqalernissamut ileqqaartarunnaarput. Atorfimmili saniatigut allamik suliffeqarunik isertitaminniit soraarnerussutisiassanut ileqqaartussaatitaassapput.
Tjenestemanditut suli soraarnerussutisiaqarsinnaatitaapput, maannali soraarnerussutisiassaminnut ileqqaarusunnerlutik nammineq aalajangersinnaalerpaat.
Akileraartarnermut allagartaq akileraarutissallu
Soraarnerussutisiamut aaqqissuussaanerup ilaa, taas aningaasanik naammattunik ileqqaarsimanngikkaani akileraarutit aqqutigalugit akilersuititsisoqartarnera isornartorsiorneqangaatsiartarpoq. Tassa akileraarutit procenti qaffanneqartaramik.
Aaqqiissut taanna ukiumi akileraarfiusumi 2026-mi aamma 2027-mi atorunnaartoq Inatsisartut maanna aalajangerpaat.
Tassa akileraartarnermut aqutsisoqarfik soraarnerussutisiaqalernissamut aaqqissuussinermut akiligassat naammassineqanngitsut pillugit akiligassamik nassiussisalissaaq.
Naalakkersuisut immikkut ilisimasallit aaqqiissutissamik pitsaasumik maannakkullu atuuttumit akuliunnikinnerusumik siunnersuuteqassasut neriuutigaat.
Tatiginninnginnermik taasititsineq
Naleqqamiit qineqqusaarutit attanneqarlutik soraarnerussutisianut aaqqissuussinermut peqataasussaatitaanerup atorunnaarsinneqarnissaa ukiakkut 2025-mi ataatsimiinnermi siunnersuutigineqarpoq.
Upernaakkut ataatsimiinnermi aappassaaneerneqarmat Naleraq kisiartaalluni allannguutissanut akuersivoq, taamaalillunilu atorunnaarsinneqarnissaa itigartinneqarluni.
Naalakkersuisut siunnersuutaat ataasinngornermi oqaluuserineqarmat Naleqqap Aningaasaqarnermut Akileraartarnermullu Naalakkersuisoq Aqqaluaq B. Egede (IA) tatigiunnaarpaa.
- Aningaasaqarnermut naalakkersuisup oqaatigaa Naleqqakkut pinngitsaalisaasumik soraarnerussutisiaqalernissamut aaqqissuussineq pillugu isummernermik oqaaseqarsimanngitsut. Tamanna eqqunngilluinnarpoq, partiimit oqaatigineqarpoq.
Naalakkersuisoqatigiit Aqqaluaq B. Egede taperserlugu annaappaat. Kukkusumik ataasiaannarluunniit oqaaseqarsimanani aamma oqarpoq.
Naalakkersuisut siunnersuutaat 16-it tapersersorpaat arfineq-pingasullu akerleralugu. Taamaalilluni soraarnerussutisianut aqqissuussap allanngortinnissaa akuersissutigineqarluni.
