Storch ukiuni 51-ini Narsarsuarmi najugaqarpoq: Kiffaanngissusiiarneqassagutta nuunnissarput eqqartorparput  

Storch Lundip Narsarsuarmut 1975-imi januaarip aappaani nuukkami uaneralaannguami pisutut suli eqqaamavaa. Naak amerikamiut sakkutuuisa kingulliup sakkutooqarfiusimasoq 1958-imi qimakkaluaraa amerikamiut tamaaniissimanerat ersarippoq. 

- Amerikarmiorpalaartorujussuusoq suli taamani nuuppugut. Makkua telefonmastit qisuit, ulikkaavikkami sumi tamani. Taavalu orsussanut tankerpassuit kaajallaavillugu peqarami, Storch Lund eqqaamasalersaarpoq. 

Storch Lundip taasaasa saniatigut amerikamiut illorsui taamani aamma takussaapput. Kingorna ineriartortoqapiloorsimasoq eqqaamaavaa.

- Ineriartorneq uani annermik 1980-ikkut aallartinneraninngaanniit pigami. Nutarterisoqangaatsiarpoq. Makkua hangarit, terminalbygningit nutaat sanaartorneqaramik. 

Inuuneq allanngupiloortoq 

Nunaqarfimmili inuuneq ullumikkut allaaneroqaaq. Narsarsuaq atlantiku qulaallugu mittarfittut siorna atorunnaarpoq, suluusalinnullu mittarfittut apriilimi atorunnaarluni helikopterinut mittarfinngorluni. Illersornissaqarfiulli aningaasaliineratigut mittarfik suluusalinnut aggustip arfernani miffigineqarsinnaanngoqqippoq.

-  Angallaffiugallarmat inunnik aqqusaartunik takornarissanillu ulikkaavittaraluaratta, ingammik aasaanerani. Ukioq manna allaanerujussuuvoq.  

Nunaqarfimmiut siorna juulip aallaqqaataani 140-t missaaniissimapput, ukioq manna piffissap taamaalinerani 90-iusut naatsorsueqqissaartarfiup kisitsisaataani takuneqarsinnaavoq. Taamali amerlatiginatik Storch Lundip oqaluttuaraa.

- Inuit tamatta maani immitsinnut nalunnginnatta ilisarisimallutalu. Aamma naatsorsuilaartaratta 40-t missaaniilluta nalunngilarput, taanna oqarpoq. 

Sakkutooqarfinngornissaa ilimagereerpaat 

Taama ikitsigigamik nunaqarfimmi susoqarnera arajutsinngisaannarpaat. Ukioq mannami siusinnerusukkut allamiunik takullattaalerput.

- Aasaq manna amerikarmiunik takullattaarpugut, sissiukkami mittarfimmilu misissuisunik.

Taamaammat susoqalerneranik ilimatsaassaqareersimapput. 

- Siusinnerulaartukkulli ilisimasuppugut taama pisoqalerunartoq. Oqaatigillatsiarneqartarnikuugami amerikarmiut sakkutooqarfeqalernissaq soqutigigaat, Storch Lund oqarpoq. 

Ilimagisaat naqissuserlugu sapaatip-akunnerani uani avammut suaarutigineqarpoq. Amerikamiummi nunaqarfimmut uterlutik sakkutooqarfiliornissartik nunatsinnik Danmarkimillu isumaqatigiissuteqarnermikkut qulakkeerpaat. Tusagaq eqqarsariarnartoq.

- Amerikarmiut præsidentiata oqarneratuut Kalaallit Nunaanni sakkutooqarfinnik angisuunik marlunnik pilersitsinissaq siunertaraat. Taava angisuunik amerikarmiut oqarpata taava immaqa uagutsinnut imaappoq angisoorujussuaq? Taava taamaassappat tamatuma kingunerissavaa suna?, Storch Lund eqqarsarpasilluni oqarpoq.  

Kiffaanngissuseerutilerpugut? 

Nunaqarfik susoqarunnaavissimasoq uummaallattussanngortoq qularnanngilaq, apeqquterpassuilli kaavittuarput.

- Soorunami susoqarnerulernissaa taavalu mittarfittut atuutileqqinnissaa tusarlugu uagutsinnut nuannerpoq. Kisianni aappaatigut innuttaasuusugut uagut maani sakkutooqarferujussuup iluani qanoq periarfissinneqassanersugut apeqquterujussuuvoq. 

- Massakkummi ilaa imatut inuuvugut sumiissinnaalluta aperisaqaqqaarnata. Killilersuiffigineqanngilagut. Kisianni ilisimavarput sakkutooqarfinni, Pituffilluunniit eqqaaginnarutsigu, killilersuinerit annertupput. Maanilu sakkutooqarfimmik pilersitsisoqassappat taanna ilimanartorujussuuvoq, Storch Lund oqarpoq. 

Inuussutissarsiortunut sunniutissaa pissanngatigaa

Nunaqavissut sakkutooqarfinni sullissinissaat isumaqatigiissummi qulakkeerneqarsimasoq naalakkersuisut arlaleriarlugu taasareerpaat.

Storch Lund angallatinik pingasunik attartortagaateqarpoq, siusinnerusukkullu kaffisorniartarfimmik unnuisarfinnillu ingerlatsisimalluni. 

- Soorunami inuussutissarsiortutut periarfissanik annertunerusunik takkuttoqarsinnaanera soqutiginarpoq. Kisianni aamma aappaatigooqarpoq, qanoq nunaqavissuusugut atorniarpaatigut?, taanna oqarpoq.

Apeqqutilli allat initunerulertuarput.  

- Oqarmatami naalakkersuisut sakkutooqarfiup pilersinneqannginnerani amerikarmiunik isumaqatigiinniarnerit ingerlanneqaqqaassasut. Suunukua atugassarititaasut nunaqavissunut? Nunaqavissut uagut minnerpaamik peqataatinneqarlutalu ilisimatinneqartarnissarput kissaatiginarpoq. 

Ukiut 51-it kingorna noorataannaasut

Pituffik 1953-imi sakkutooqarfinngortinneqassammat nunaqavissut pinngitsaalisamik nuutsinneqarnikuupput. Massakkulli pinngitsaalisamik nuutsitsisoqarnavianngitsoq naalakkersuisut erseqqissaatigisaqattaarpaat.

Pinngitsitsaalisamik nuutsinneqanngikkaluarlutik atugassarititaasut allanngorujussuarsinnaanerat nunaqarfimmi ukiorpassuarni najugallip aarleqqutigaa.

-  Naalakkersuisut siulittaasuat oqarpoq pinngitsaalisamik nunaqartuusut peersinneqarnavianngitsut Narsarsuarminngaanniit. Kisianni illuatungerivaa una uanga isumagara malillugu, pinngitsaalisamik peersinneqanngikkaluarluta, kisianni imatut atugassaqartinneqalersinnaavugut sakkutooqarfiunera peqqutigalugu, allaat nammineq qinertariaqalerlugu massuma qimannissaa.

Periarfissarlu taanna ammatippaat.

- Ilaqutariinni eqqartoreerparput toqqartariaqarsinnaajumaaripput, ullumikkutut inuunerput allarujussuarmut saatinneqassappat aamma kiffaanngissuseqarneq oqartussaaqataanerlu sumiinnersut apeqquterujussuanngortussaavoq. 

- Soorunami oqitsuunavianngilaq, kisianni taanna periarfissaq ammatipparput, Storch Lund naggasiivoq.