Naalakkersuisut siulittaasuat Jens-Frederik Nielsen (D) Inatsisartuni ammaanersiornermi septembarip 18-ani oqalugiarnermini, suleqatigiinnissaq qitiusumik oqariartuutaasa ilagaat.
- Politikkikkut isumaqatigiinnginneq demokratiimut ilaavoq pissusissamisoortoq, isumaqatigiinngittarnerit unittoornermut utoqqatsissutaanngisaannassapput, taama oqariartuuteqarpoq.
Naalakkersuisut siulittaasuat Jens-Frederik Nielsen (D) Inatsisartuni ammaanersiornermi septembarip 18-ani oqalugiarnermini, suleqatigiinnissaq qitiusumik oqariartuutaasa ilagaat.
- Politikkikkut isumaqatigiinnginneq demokratiimut ilaavoq pissusissamisoortoq, isumaqatigiinngittarnerit unittoornermut utoqqatsissutaanngisaannassapput, taama oqariartuuteqarpoq.
Naalakkersuisut Inatsisartunut tusarnaarusunnertik, isumaqatiginninniarnissarlu aammalu qinigaaffimmi ataatsimit sivisunerusumik atuuttussanik aaqqiissutissarsiorusunnertik ersersinniarlugu assaminnik isaassipput.
Isumaqatigiinngittarnerit salliutillugit Nunarput tunulliutinngisaannassavarput.
Jens-Frederik Nielsen, Naalakkersuisut siulittaasuat
Ataatsimiinnerulli ammaanersiorneqarnerani oqallinnermi erserpoq politikkikkut siammasinnerusumik suleqatigiinnissaq ajornaatsuinnaanngitsoq.
Jens NapãtôK'-p (N) oqaaseqartartutut oqaaseqareernerani maluginiarpaa partiit allat apeqquteqarusussuseqarnerat killeqarluartoq. Inersuarmiillu apeqqutit amerlanngitsut, tamannalu pissutigalugu Naleqqap oqaaseqartartuata apeqquserpaa partiit allat itisuumik oqallinnissamut piumassuseqarnersut.
– Aperinaveersaaqqeqqissaarlutik inissippasipput, Jens NapãtôK oqarpoq.
Aammattaaq oqaatigaa politikerit partiip inuit nittartakkatigut attaveqaqatigiittarfiisigut toqqaannartumik aallakaatitsinera pillugu Naleqqamik isornartorsiuisartut apeqquteqarlutik periarfissaq manna atorsimasinnaagaluaraat, partiillu isiginnittariaasianik itinerusumik isummersoqqusillutik.
– Inuit attaveqartigiittarfiatigut toqqaannartumik oqaluttarnerput isornartorsiorujussuariarlugu maanna aperisinnaagaluarput suna pineripput, oqarpoq.
NapātôK´-mulli illugiilluni oqaloqatigiinnermik ajornartorsiut tassaaginnanngilaq, inersuarmi qanoq amerlatigisunik apeqquteqartarneq. Taanna isumaqarpoq innuttaasunit ajornartorsiutit ulluinnarni aqqusaarneqartartut, politikkerinit eqqartorneqartariaqartut.
– Inunnut atugassarititaasut eqqartorusukkaluarpagut, oqarpoq.
Naleqqap oqaaseqartartuata naapertorlugu inuit inuunerminni ajornartorsiutiminnik oqaluttuartut politikkerinut inuit nittartakkatigut attaveqaqatigiittarfii aqqutigalugit ataavartumik attaveqartartut. Taamaattumillu Inatsisartuni aamma tamakkua oqaluuserineqartariaqartut.
Napãtôk’-ip isornartorsiuinini naggaserlugu naalakkersuisoqatigiit toqqaannartumik kajumissaarpai.
– Nipangerluni taamatut sulineq nipituallaarujussuarpoq. Nipaqannginneq annertuallaarujussuarpoq. Tamat oqartussaaqataanerannut ulorianarpoq. Illuatungiliuttunut oqarnaveersaarneq kusanaatsuuvoq.
Atassut: Partiitta qalipaataat illikaallalaariarlugit
Politikkikkut oqallinneq partiillu akornanni pissutsit Atassummeersup Aqqalu C. Jerimiassenip qitiusumik sammivai.
Politikkikkut isumaqatigiinngissutit inuttut ataasiakkaatut saassussinermik ineriartortarneri naggataatigullu inuiaqatigiinni avissaartuutsitsilersinnaaneri mianersoqqussutigaa. Taanna naapertorlugu ingammik inuit nittartakkatigut attaveqaqatigiittarfii tamatumunnga annertuumik sunniuteqarput.
– Immitsinnut tulluartoq nassaarisinnaanissaanut avissaartuuteqqaanngikkaluarluta akerartuuteqaanngikkaluarlutalu oqaloqatigiissinnaasariaqarpugut, oqarpoq nangillunilu:
– Tamanna sakkortusisamik akiorniarnissaanut partiitta qalipaataat illikaallalaariarlugit suleqatigiiffigisinnaasariaqarluinnarparput.
Jens-Frederik Nielsen: Marallummik milloorutta inuiaqatigiinni pitsanngorsaataasussat angunavianngilagut
Jens-Frederik Nielsenip oqaaseqaanni naggaserlugu illuatungiliuttut isornartorsiuinerat toqqaannartumik akivaa.
- Suliavut tamaasa naammaginanngitsumik taavasi. Oqaatsivullu isumaqatiginngikkaangassigit nipangersitsiniaasartutut taasarpatsigut. Tamanna ilumuunngilaq.
Naalakkersuisut siulittaasuata oqaatigaa suleqatigiilluarniaraanni illuatungeriit imminnut tusarnaarsinnaasariaqartut.
– Illuatungeriit suleqatigiissappata tusarnaarsinnaassuseqartariaqarpugut. Immitsinnut ungasittorujussuarmik inissisimatilluta marallummik milloorutta inuiaqatigiinni pitsanngorsaataasussat angunavianngilagut.
Siumut: Suleqatigiinnissaq qitiusariaqarpoq
Suleqatigiinneq politikkikkut sulinermi qitiutinneqarnissaa, Siumumit ersarissumik kaammattuutigineqarpoq.
– Suleqatigiinnissaq qitiusariaqarpoq, Erik Jensen (S) oqarpoq.
Taassuma erseqqissarpaa qinersinermi neriorsuutit piviusunngortinneqanngikkaangata inuit uissuummernerat annertunerulersartoq.
Erik Jensen naapertorlugu neriorsuutit piviusunngortinneqanngikkaangata innuttaasut pakatsillutillu kamalersartut. Qinigaaffik manna kisiat pinnagu, aammali qinigaaffiit siuliini neriorsuutit piviusunngortinneqarsimanngitsut tikkuarpaa.
Siumumi politikeri naapertorlugu tamanna inuit nittartakkatigut attaveqaqatigiittarfiini sakkortuumik oqallittariaaseqarnermut nassuiaataalluarpoq.
– Taamaammat inuit attaveqatigiittarfiini oqallinnerup torinngitsumut saattarneranut tamanna tunngaviuvoq.
Suleqatigiinnissamik isaassineq
Taamaattumik ammaanersiornermi oqallinnermi suleqatigiilluarnissaq arlalinnit kaammattuutigineqarpoq, aammali sooq suleqatigiissinnaanerup ajornassusaa isummersorfigineqarpoq.
Naleqqap naalakkersuisooqatigiit illuatungiliuttunik naammattumik oqaloqatigiissinnaaneq piumassuseqarfiginnikkaat isornartorsiorpai. Atassutip kajumissaarutigaa partiit qalipaataat illuartinneqarnissaat. Siumup suleqatigiinneq qitiutinniarlugu erseqqissarpaa, Jens-Frederik Nielsenillu Naalakkersuisut politikkikkut oqaloqatigiinnerup pitsaanerusumik ingerlanneqarnissaanik kissaataat attatiinnarpaa.
Oqallinnerulli aamma takutippaa suleqatigiinnissamik pisariaqartitsinermik isumaqatigiinnginneq qanorlu suleqatigiinnissaq pillugu isumaqatigiinnginneq assigiinngissuteqartut.
Taamaattumik Jens-Frederik Nielsen naggasiinermini nipi allanngornissaa kajumissaarutigaa:
– Oqallinneq pitsaanerunngippat angusaqarnavianngilagut. Uagut assavut isaappavut. Ataqqeqatigiilluta torersumik oqaloqatigiitta.
Naalakkersuisut assammik isaassinerat politikkikkut isumaqatigiissutinik tigussaasunik kinguneqarsinnaanersoq maanna apeqqutaaginnalerpoq.
Illuatungiliuttunut unamminartoq tassaalerpoq isornartorsiuinertik attatiinnarlugu oqaloqatigiinnerlu partiit arlallit namminneq ujartortagaat pilersissallugu.
Taamaammat ammaanersiornermi oqallinneq Naalakkersuisut piffissami aggersumi pilersaarutaannik, oqallinnerinnaanngilaq. Kissaatigineqartumullu tassa, siammasinnerusumik politikkikkut suleqatigiissinnaanerannut misilinneqarpoq.
