Suliniaqatigiiffiup nutaap lupiinit siaruaakkiartortut nungusarusukkai 

Nuummi pisuttuarlutillu biilerusaarsimaguit naasut tunguusat ataatsimoortukkaarlutik sumiiffinni assigiinngitsuni naasimasut takunngitsoorsimasinnaanngilatit.

Naasut taakkua tassaapput naasupiluit lupiininik atillit. Naasut qiviaannarlugit kusanaraluartut nunatta naasuinik inangiisarput.

Taamaammat siaruaatsinnaveersaarnissaat anguniarlugu suliniaqatigiiffik nutaaq pilersinneqarpoq. Suliniaqatigiiffik ateqarpoq CIPKaN. Tuluttut taaguut Caombating Invasive Plants in Kalaallit Nunaat naalisarlugu atsiunneqarsimalluni. 

Suliniuteqartuni siuttuulluni ukiorpassuarni pinngortitalerinermi ilinniartitsisuusoq, maannalu Ilinniartitaanermut Aqutsisoqarfimmi pinngortitalerinermi matematikkimilu siunnersortaasoq Ane Fleischer. 

- Immaqa quianartunngorlugu ima oqaatigisinnaavara nuniattarusuppunga, aamma aqissitortarusullungalu ukalertortarusuppunga siunissami. Kisianni ilungersunarnerusoq unaavoq nunatsinni naasut mianerisassatut takorloortariaqarpagut, taamannak avataaninngaanniit sunnerneqarlutik ipitinneqaleraluttuinnarnerat mianersorfissatut isumaqarfigaara. Aamma nunatta nammineerluni naasui illersussallugit pisussaaffeqarluta paasisariaqaratsigu, Ane Fleischer oqarpoq.  

100.000 euronik tapiissutisisut 

Ane Fleischerip atorfia Ilinniartitaanermut Aqutsisoqarfik suliniummut aamma tunuliaqutaavoq.  

Sulinermini suleqatigisarsimasani Danmarkimiittut peqatigalugit EU-p tapiissuteqartarfianut BESTLIFE2030-mut 2024-mi qinnuteqaramik, 100.000 euronik, tassa 740.000 koruunit missaannik tapiissutisillutik siorna 2025-mi nalunaarfigineqarput. 

Taamaalilluni suliniut siorna aallartisarneqalerpoq. Lupiinit pillugit paasissutissanik siaruarterineq suliniutinut ilaalluni. Assersuutigalugu TV-kkut paasissutissiinernik podcastiliortitsinissarlu takorluugaannut ilaapput. Aammali pisortat sunniuteqarfigisinnaallugit piiaanissamullu aningaasaleeqataasinnaanerannik kinguneqassasoq neriuutigaa.

- Pisortat nassuertariaqarput ajornartorsiut taanna maana piulersoq. Taavalu iliuuseqarniarutta suleqatigeeqqissaartariaqarpugut. Pisortat kisimiissinnaanngillat.

- Neriuuteqarpunga taperserneqassalluta, taavalu aamma innuttaasuusugut ilinniartinneqassasugut, qanoq iliorluta piiaasinnaanerluta, Ane Fleischer oqarpoq

Aporaannani oqaloqatigiinneq 

Suliniaqatigiiffik lupiininik nammineerluni piiaanissamik suliaqarnianngilaq. Pisortalli piiaanissamut iliuuseqaqataanissaat neriuutigaat, assersuutigalugu suliffissarsiortut aasaanerani piiatinneqartarsinnaasut isumassarsiaannut ilaavoq. 

Lupiinit siaruaakkiartuaarnerat siullermeerluni eqqartorneqalernanilu iliuuseqarfiginiarneqanngilaq. Lupiininilli piiaasoqartillugu piiaasut innuttaasut ilaannit appisaluunneqarneq misigisarmassuk CIPKaN-imit paaseqatigiinnissamut aqqutissiueqataaffigisinnaallugu neriuutigaat.

Taamaammat Nuummi innuttaasut oqaloqatigiilluni naapeqatigiinnissamut marlunngorpat juulip 14-iani qaaqquaat. Oqaloqatigiinneq Illorpumi nalunaaqutaq 16.00-miit 18.00-p tungaanut pissaaq.

- Ataatsimiisitsineq aallarniutissatut takorloorpara. Taavalu akerartuunnata suleqatigiillutali suliaqarnissamik anguniagaqarusunnarluni, Ane Fleischer oqarpoq.

Ane Fleischerip ilanngullugu eqqaavaa nunatta sinnerani suleqatissarsiussallutik.