Suliniutit nutaat saqqummiunneqartut: Issittumi tunngaviusumik ilinniartitaanermi ilinniartut amerlanerusut

Nuummi tusagassiortunik katersortitsinermi illersornissamut ministerip Troels Lund Poulsenip naalakkersuisullu Vivian Motzfeldtip Kalaallit Nunaanni illersornissamut immikkoortumi suliniutit nutaat marluk oqaluttuaraat.

Siullertut Kangerlussuarmi Issittumi tunngaviusumik ilinniartitaanermi ilinniartut amerlassusaat 30-nit 50-nut amerlineqassapput.

- Ilinniartitaaneq 22-nik ilinniartoqarluni aallartippoq, sornalu 30-nut amerlineqarput, maannakkullu aasaq mannamit 50-iunissaat aalajangerparput, Vivian Motzfeldt (S) oqarpoq.

- Isumaqatigiissut tulluusimaarutigisupilussuuara. Nunatsinni inuusuttatta suliassamik kivitseqataanissamut piumassuseqarnerat, ilinniartitaanerup takutippaa. Amerlanerpaarpaat ilinniarnertik naammassisarpaat, isumaqatigiissutillu tassunga tunngasortaa nuannaarutigisupilussuuara, Vivian Motzfeldt oqarpoq.

Troels Lund Poulsenip itisiliilluni aamma inuusuttunut Issittumi tunngaviusumik ilinniartitaanermik naammassinnissimasunut upalungaarsimanermut suli ilaanissaannut tunngatillugu sunik neqerooruteqartoqarsinnaanera oqaloqatigiissutigineqartoq oqaatigaa.

Air Greenlandimik isumaqatigiissuteqartoqalersoq

Tamatuma saniatigut Forsvarsministeriets Materiel- og Indkøbsstyrelsip Air Greenlandillu akornanni maani alapernaarsuinermik suliassat pitsaanerusumik aaqqiiviginissaat pillugu timmisartumik attartornissamut isumaqatiginninniarnerit ingerlanneqarput.

Isumaqatigiissut timmisartut marluk atorlugit alapernaarsuinermut tunngassasoq ilimagineqartoq, tamannalu dual-usemik taaneqartartumut ilaasoq, tassani kalaallit suliffeqarfii illersornissaqarfiup suliassanik isumaginninneranut ilanngunneqarnissaat, Troels Lund Poulsenip tusagassiortunik katersortitsinermi oqaatigaa.

- Challengerinik timmisartutta alapernaarsuinernik suliarisarsimasaanik Air Greenlandimik isumaqatigiissuteqaqqajaavugut, Troels Lund Poulsen oqarpoq. Taassuma Naalakkersuisut piffissami sivisunerusumi kissaateqarsimanerat innersuussutigaa.