Sulisitsisut isumakuluutaat: Politikkikkut iliuuseqarnerup kinguneri tupigusuutigineqarput
Naalakkersuisut aamma Sulisitsisut “imminnut akerleriittunik soqutigisaqartut” Inuussutissarsiornermut Aatsitassanullu Ataatsimiititaliami politikerit isumaliutissiissumminni naqissusermassuk Sulisitsisut (GE) tupaallaatigaat.
- Uagut suliffeqarfinni tamallu naalakkersueqataaneranni ataqatigiissaarisuuvugut, tamannalu pillugu akuersaarneqannginnerput ajuusaarutigaara. Sulisitsisuni pisortaq Christian Keldsen oqarpoq.
Assi: Oscar Scott Carl
Inatsisartuni politikerit piffissami “ataatsimoortarinitsinnik” politikkikkut oqariartuuteqartuaannarfiusumi Sulisitsisut inuiaqatigiinni inissisimaffiannik akuerinninnginnerat Sulisitsisut pisortaata Christian Keldsenip tupigusuutigaa.
Ataatsimik anguniagaqarpugut, pisortaanerup LinkedInimi allagaani qulequtaavoq, qulequtaata tullia ima erseqqissaateqarpoq:
“Anguniagaq pinnani - qanoq angunissaa pingaarneruvoq.”
Ataqqineqarneq amigaatigigaa
Christian Keldsen Sermitsiamut, Inuussutissarsiornermut Aatsitassanullu Ataatsimiititap soqutigisat assigiinngilluinnarnerat pillugu nutaarsiassamik saqqummiussisumut, ima oqarpoq:
- Uagut suliffeqarfinni tamallu naalakkersueqataaneranni ataqatigiissaarisuuvugut, tamannalu pillugu akuersaarneqannginnerput ajuusaarutigaara. Suliffeqarfiit 330-t ilaasortaraagut, taakkualu sulisui 8400-upput — tassa sulisartut tamarmiusut 30 procentii.
- Tunuliaqutaasut nunap inatsisartuini, inunnit assigiinngitsunit qinerneqartut, soqutigisat imminnut akerleriittutut oqariartuuteqarneq tusarunikku qularnanngitsumik ajuusaarnassaaq.
Aamma Trumpip USA-p Kalaallit Nunaannik piginnittunngornissaanik piumasaqarneranut atatillugu pissutsinut maanna pissanganartunut innersuussivoq.
Maluginiarnartut
- Kattuffiit kiffaanngissuseqarnerani taamatut tatisisoqartoq piffissami ataatsimoorfiusussami maluginiarnanngitsuunngilaq. USA-mi pissutsit Trumpip siullermeerluni naalakkersuinerata nalaaniittut eqqarsaatigigaanni, taava Trumpip Amerikamiut oqartussaaffii saassuteqattaarpai, kisianni USA-p aaqqissuussaanera ima nukittutigaaq tamat naalakkersueqataanerat taassuma saassussineratut ittoq akiorsinnaalerlugu, pisortaq oqarpoq nangillunilu:
- Kalaallit Nunaanni innuttaaqatigiit qanoq pingaaruteqartigisut eqqaamasariaqarparput, pissutsinilu maanna atukkatsinni qularutiginngilluinnarlugu nukittorsaasariaqarpugut. Ilaannikkut allanik sammisaqartarnerput soqutigisatta assigiinngilluinnarnerannik isumaqanngilaq.
Namminersorlutik Oqartussat suliffeqarfiutaat Namminersorlutillu Oqartussanit pigineqartut sulisitsisut peqatigiiffiannit anisariaqarnersut eqqarsaatiginneqqissaarnermi Sulisitsisut kisimi pineqarnersut, soqutigisaqaqatigiiunngitsullu allat pineqanngitsut Sulisitsisut Kattuffiata pisortaa erseqqissaavoq.
Akerleriittoqanngitsoq
- Taamaammat (Linkedin-imi allakkani, aaqq.) isumaliutissiissutinni Inatsisartuni Naalakkersuisunilu inuiaqatigiit nukittuut inuussutissarsiortullu nukittuut sulissutigineqanngitsut atuarneqassanngitsoq tunngavilersuutigaara. Tamannami sulissutigaarput, taamaammallu imminnut akerleriittoqanngilaq.
"Politikkimit inuussutissarsiortut ilaat soqutigisaqaqatigiinnut aalajangersimasunut ilaasortaajunnaarnissaat kissaatigineqannginnera pitsaasuusoq" Christian Keldsen LinkedInimi allappoq. Tamatumuuna Sulisitsisunut. Ataatsimoorutta nukittunerulissaagut, inuiaqatigiit tamarmik sulisartut kattuffiisa kiffaanngissuseqarnerat iluaqutigissavaat“.
