Sulisut nunaqavissut nunanit allaneersunit taarserneqarnissaat aalajangerneqarsimanngilaq

Nuummi Dronning Ingridip Napparsimmavissuani, DIH-mi, eqqiaasut soraarseriarlugit nunanit allaneersunit taarserneqarpat?

Taamaattoqarnerarlugu tusatsiakkat juunip aallartinnerani siammarterneqareersullu, Inuit Ataqatigiit sinnerlugit Inatsisartuni ilaasortap Paarma Lund Kreutzmannip Naalakkersuisut taamatut aperai.

Peqqissutsimut inunnullu innarluutilinnut naalakkersuisup Anna Wangenheimip (D) peqqinnissaqarfimmi pisortat qanoq pisoqarsimanera pillugu nassuiaasioqqusimallugit Facebookikkut taamani saqqummiuppaa.

Naalakkersuisut siulittaasuat Jens-Frederik Nielsen Paarma Lund Kreutzmannimut akissuteqarluni, DIH-mi eqqiaanermi suliassat ilaat suliffeqarfimmut nunatsinniittumut suliakkiunneqarsimasoq, suliariumannittussarsiornermilu malittarisassat naapertorlugit taamaaliortoqartoq, ilisimatitsissutigaa.

”Peqqinnissaqarfiup paasissutissiissutigaa, sumiiffimmi sulisut sulisartunik nunami allammiunik taarserniarlugit aalajangertoqarsimanngitsoq. Kalaallit suliffeqarfiat, suliassamut neqeroortitsinermi ajugaasup, atugassarititaasut malittarisassallu isumaqatigissutit iluanni sulisoqarnissaq nammineq oqaasissaqarfigaa,” Jens-Frederik Nielsen peqqissutsimut inunnullu innarluutilinnut naalakkersuisoq sinnerlugu allappoq.

DIH-milu sulisut arfineq-marluk soraarsitaasimanerat ilumoorpoq.

Piviusorsiortumik piumasaqaatit malinneqartut

Paarma Lund Kreutzmannip soraarsitsinernut suut tunngavilersuutigineqarsimanersut apeqqutigai.

Sulisut pineqartut ataasiakkaarlugit tusarniaaffigineqarnissaannut allakkatigut paasitinneqarsimasut, Jens-Frederik Nielsenip peqqinnissaqarfimmiit paasissutissiissutigisimagaat oqaatigaa. Tassani soraarsitsinissamik pilersaarutigineqartumut tunngavigisaq allassimalluni, aammalu inaarutaasumik aalajangiisoqannginnerani oqaaseqaatinik nassiussinissamut periarfissinneqarsimallutik.

Soraarsitsinerit eqqiaanermut immikkoortortami aaqqissuussaanikkut allannguinermik tunngavilersorneqarput, tassa suliassat ilaat kalaallit suliffeqarfiutaannut suliakkiunneqarsimallutik, Jens-Frederik Nielsen allappoq.

Taamaalilluni suliffeqarfiup iluani eqqiaasunik pisariaqartitsineq annikillisimalluni.

”Aammattaaq oqaatigineqarpoq, piviusorsiortumik piumasaqaatit soorlu suliamut tunngasut inuttullu piginnaasat tunngavigalugit toqqaasoqartoq kiisalu aalajaatsuuneq, atorfeqarsimanerup sivisussusia eqqarsaatigineqarsimallutik.”

Naalakkersuisut ineriartorneq malinnaaffigaat 

”Naalakkersuisut erseqqissassavaat, ilaatigut inatsisiliornikkut, periusissiatigut inuussutissarsiutillu ineriartortinnerannut sinaakkusiussatigut, sumiiffimmi sulisut ineriartortinniarlugit, pikkorissarniarlugit ilanngutitinniarlugillu pingaarnertut angusassamik toraagaqarluni ataqatigissumillu aaqqissuussamik sulisoqartoq,” Naalakkersuisut siulittaasuat allappoq.

Ingerlatsineq sulisussanillu aalajangiineq polikikkut aalajangiinerunatik peqqinnissaqarfiup akisussaaffigigai aamma tikkuarpaa.

”Taamaattorli ineriartorneq ingerlaavartumik Naalakkersuisut sumiiffimmi suliffissaqarneq pillugu pingaarnertut politikikkut anguniakkat malittaraat, pisariaqarpallu tapersersoqqinnissaanut aaqqiissuteqarnissamut pisariaqassanersoq nalilissallugu.”

Paarma Lund Kreutzmannip peqqinnissaqarfimmi sulisunut nunaqavissunut sulinermi atugassarititaasut pitsaasunik ersarissunillu atugassagartitsinissaq qanoq qulakkeerneqassanersoq naggataagut apeqqutigaa.

Sumiiffimmi sulisunik piginnaanngorsaaneq, sulisussarsiorneq aamma tigumminniinnarniarneq pimoorunnerisigut ilaatigut taamaaliorniartoqartoq, Jens-Frederik Nielsen akivoq.

”Naalakkersuisut soorunalimi allatigut sianiginiassavaat, sulisunut matumani ilanngullugit sumiiffimmi sulisunut iluarsiinerit, paasiuminartut atugassarititaasullu naammaginartut qulakkeernissaannut, inatsisip naleqqussarnissaanut piviusumik pisariaqartitsisoqarnersoq,” siulittaasoq naggasiivoq.