Tassuugu ukiut 20-t
qaangiutissapput kommunet 18-it sisamaannanngortitaanerannit. Kingorna
tallimanngorput.
Siunertap pitsaagaluassusia.
Tassuugu ukiut 20-t
qaangiutissapput kommunet 18-it sisamaannanngortitaanerannit. Kingorna
tallimanngorput.
Siunertap pitsaagaluassusia.
Kommunimi aqutsinerup
ataasiakkaani aaqqissuussaanermigut patajaannerulersinnissaa
piginnaasaqarnerulernissaalu.
Taamanikkut inuit pissaanillit tamarmik
oqartarput kattunnerup kiffartuussineq pitsaanerulersissagaa kommunillu
uummaarinnerulersissallugit.
Siunertap immini ajoquteqanngikkaluassusia!
Aaqqissuussaanerulli
patajaallunilu aqutsinermik piginnaasaqarnerulersitsinera ukiut 20-t
qaangiutilerneranni takujuminaappoq.
Tunumi isorliunerusunilu allani
iluatsinngitsoorpoq ullumikkullu Kommune Kujallermi aqutsisunngortut
nukillaarsaatigaat siulimik suliaminnik sumiginnaasimaneri akileraarutinilu
akiitsorpassuaqalersimaneri.
Aamma kommunini allani aningaasameerneq atuuppoq
suliassarpassuaqarporlu.
Inuiaqatigiit
ingerlaasaannik takorluukkat ilaat pingaartut kusanavissumik
saqqummiunneqartaannarput, allannguinermik pitsaasumik aaqqiissutissanillu
piuminarnerusunik malitseqartussatut.
Piviusunngortitsiniarnerli siunertat toraarlugit ilaanni ingerlasanngilaq.
Nakkutilliinnginneq
Aaqqissuussaanerup
patajaatsup uummaarissullu pilersinniarnerini soorluuna tunngavissat
amigaataasimassasut, kommuniniinnaanngitsumi pingaartumilli aamma
nakkutilliisussani.
Piviusut takutippaat allaffissornikkut pisortaqarfiit
arlaqartut kattunnissaat ataasiinnanngortillugit piuminartumik
ingerlasanngitsoq, piffissaagallartillugu ikiuisoqarneq ajormat,
pisortaqarfiimmi imminnut tikeriaannaaneq ajormata, sinerissami inissisimagamik
imminnut ungasillutik.
Taavami? Sukaterinissaq ajornaqinerluni, immaqa
aningaasaliissutit avataaneersut atorlugit, eqqarsarluarluni innuttaasullu
peqataatillugit?
Nipituumik eqqarsarneq
ajornanngitsitsillaraangami …
Nalinginnaaleriartortut
Erseqqippoq Nuummi aamma
ilungersortoqartoq, pilersaarutaanngitsumik nuuttut, inissianik
amigaateqarnerit, angerlarsimaffeqanngitsuuneq inuttullu
ajornartorsiuterpassuit annertuut ilaatigut atuummata. Aammami sulisussanik ilinniarsimasunik
aalajaatsunillu amigaateqarneq atuuttuartuuvoq.
Nuummi
sanaartornersuaqaraluartoq, sumiiffinnut avinngarusimanerusunut sanilliullugu,
tamaanimi kikkiattuerpalaarneq qangali tusarsaarpiarunnaarsimavoq.
Taarsiullugu
inissiat pisoqalisut, sipaarniarnerit, innuttaasut ikiliartortuinnavissut
suliffissaaleqinerillu atuuttuarsinnarput.
Pissutsit tamakku
nunarsuarmi sumiluunniit aamma atuupput.
Eqiterineq sumiluunniit pisoq
sumiiffinnut qimagakkanut ilinniarsimasunik sulisussaaleqinermik
kinguneqarltarpoq.
Aamma angerlarsimaffeqannginneq, inissiat akiinnaat
piitsuussuserlu illoqarfinni anginerusuni inuit katersuuffiini atuupput.
Ajornanngeqaaq ileqimisaartornissaq oqarlunilu: Qaa, qaa!
Sumiiffinnut kaaffiunngitsunut, filmeriartarfilinnut suliffissaqarfiusunullu.
Kaaffiunngitsunut piisaarfinnulli. Toqqarlugu isigisinnaasamik nakorsalinnut –
iluatsikkaanni. 2026-mi.
Namminermiittut
Imminullu qiviaruit. Pitsaanerulersitsisut tamatigut qallikkut
atukkaniittanngillat imminulli tunngasuni allannguinermiittarlutik.
Ilaanni
atugassarititaasut akuerineqartarput imaluunniit ajuallaatit, kukkussutit
innarluutillu inuunerup ilagiinnarmagit akueriinnagassaasarlutik. Sapiisinngikkaanni allamullu nuulluni. Piumassutsip aqqutissaq titartarpaa.
Ataasiakkaatut
ajunngitsussaq ujartarparput; ataatsimoorfissaqarluarneq, sunngiffimmi
sammisassarissaarneq imaluunniit inissiamik kiserliorfiunngitsumik
inissaqarluartumillu pissarsineq.
Sugaluaqiguvilli
inunngorfippit eqqaani immap qalipaataa puigorniaqinagu. Napasumi imaq allanit
tamanit tungujorneruvoq.
