Suni tamani juullimut orpeqanngilaq

Nuup qiterpasissuani juullimut orpinnik tuniniaavimmut ingerlaarpunga. Apivoq isigisarlu oqaluttualianisullusooq alianaassuseqarpoq.

Amisut eqqaanut apuunninni crêpesit mandelilu kissartut tipigikkamilliuku.

- Anaana pannakaamik pisinnaavunga? Ernerma tipaa naaginnarlugu aperaaq.

Soorunami pisinnaavoq, eqqarsarpunga. Juullileqaarmi. Ukiup taamaalinerani akuersinerusarpunga. Taamaalernerani tungusunnitsut angakkuakkallu inissaqarnerusarput. Ajunngilaq.

Juullimut orpippassuit apummut siassimasut akornanni nikorfavugut. Taamaalillutik inuit orpinnik siassimasunik qanorlu isikkoqarnerat malillugu toqqaanissamut periarfissinneqarput, taamaalillutillu qassutaasanik plastikimiittunik pisisariaqanngillat, neriullutillu siaaruni kusanarumassasoq. Torrak, eqqarsarpunga, ernera nutellamik tapattoq qungujulaqisorlu isigaara.

Nuummi qanoq atugarissaartiginerput eqqarsaatiginngitsoorsinnaanngilara. Sinerissamimi ukioq manna juullip orpiinik tipigeqisunik pisinissamut periarfissaqanngivipput.

Pilersuisoq nunatsinni illoqarfinni nunaqarfinnilu 67-ini pisiniarfilik, ukioq manna pisiniarfimminni juullimut orpinnik eqqussukkanik tuniniaaniartani pisisartuminut nalunaarpoq.

Qisuariaatit assigiinngitsut

Pisisartut arlallit tamanna pakatsissutigalugu oqariartuuteqarput.

- Akuersaarneqarsinnaanngilluinnarpoq!, Atuisoq Uummannameersoq oqarpoq.

- Uggornaqaaq, ingammik peroriartornermi juullip orpiata tipiginnera sungiusimagaanni, arnaq Kangerlussuarmiu oqarpoq.

Angutip Tasiilarmiup aamma juullimut orpiup tikkanik juullip nalaani angerlarsimaffimmik tipigissaasumik naasinnaajunnaarnini uggoraa.

Allali akuersaarneruvoq:

- Ileqqutoqqat allanngortikkuminaattarput. Taamaattorli uanga isumaqarpunga ajunngitsoq orpiit maani nunatsinni Danmarkimeersuut tikisinneqanngikkaluarunik. Sunniutinik ulikkaartarput inuup peqqissusissaannut. Taamaammat nunatsinni atorsinnaasatsinnik pilersuigutta pitsaanerusoraara.

Alla Saattuneersoq inuinnaat allaqatigiittarfiini juullimut orpinnik pisiniarfiit ukioq manna tuniniaaniannginnerat siusinnerusukkut nalunaarutigineqarsimasariaqaraluartoq allappoq, taamaalilluni piareersartoqarsinnaaqqullugu.

- Kakillarnanik toquliulereernikunik qerisunik naneruusiorama pinnersaannartariaqarakku taamannak sanavara. immaqa siumoortumik aasarli nalunaartoqarsimagaluarpat paarnaqutitarsimassangaluarpunga, kisianni sillimaffingisimanngilara ilisimatinneqajaannginnatta, atuisoq allappoq

Coronamit juullimi orpimmut

Greenland Escape Nuummi maanna decembarip qaammataani niuffatsitsisuuvoq.

Suliffeqarfimmik piginnittup Jesper Ørakerip ukiumut juullimut orpinnik 1000-it missaanik tunisaqartarlutik AG-mut oqaluttuaraa.

- Amerlassusaalli nikerartorujussuusarput. Inuit qanoq aningaasaateqartiginerat apeqqutaasarpoq, Jesper Øraker oqarpoq.

Suliffeqarfik aallaqqaammut takornariartitsinermik ingerlataqarsimagaluarpoq, bussinik ingerlatsisarlutik umiarsualiviullu eqqaani tammajuitsussanik nioqquteqartarlutik. Coronali nalliummat takornariallu tikissaarlutik, allatut eqqarsartariaqalerput.

- Orpinnik pisiniartarnerup atuuttup qatsunnera isumaqatigiissutigaarput. Taamanikkut Pisiffimmi Brugsenimiluunniit containerimut iserluni orpiup qanoq isikkoqarnera nalullugu pisisoqartarpoq. Alianaatsortaqanngivippoq, normumik tigusisoqartarpoq orpillu angerlamut apuukkaanni kusanarumaarnera neriuutigiinnartariaqarlugu, taanna oqarpoq.

Jesper ilaqutaalu suliffeqarfimik piginnittut sapinngisannguaminnik juullimut orpinnik passussilluarniartarput. - Orpiit Danmarkimi orpippassuarnit toqqaannarlugu pissarsiarisarpagut, paarilluartarpagullu aqqutaani pilutaajarnaveersaartittarlutigit. Ukiuni kingullerni qanoq assartornissaat ilinniarsimavarput, taamaalilluni aqqutaani ajoqusernaveersaartarlutigit, Jesper oqaluttuarpoq.

Qungujuutissatullu ukiorpassuit matuma siorna qallunaat juullimi orpiinik qeritsitsivikkoortillugit Hong Kongimut nassiussisarnermik suliaqarsimanini ilanngullugu oqaatigaa.

Danmarkimi orpiit toqqorsivinni kissartuniitinneqannginnissaat, Jesperp isumagisarpaa, taamaalillunilu panernaveersaartittarlugit.

- Orpippassuarnit toqqaannartumik containerinut immiunneqartarput umiarsuakkullu nassiunneqarlutik. Suliffeqarfimmi suleqateqarpugut siornatigut Danmarkimi orpeerniartarsimasumik, taakkulu pilersuisuannut toqqaannartumik attaveqarpugut, taanna oqaluttuarpoq. 

Juulli taartup pissaaneruffiani qaammaqqut

Ernerma pannakaatukkani nungummagu orpiit misissorpagut ingerlaqqillutalu. Ukioq manna juullimut nutaamik orpissaqanngitsut eqqarsaatigaakka, juullillu nuannersuanik tipaatsunnartuanillu angerlarsimaffimminni nalliussilluarumaarnerannik kissaallugit.