Tasiilaq ilungersunartorsiortorujussuusoq

Naatsorsueqqissaartarfiup kisitsisaatai naapertorlugit Tasiilami 1.811-nik inulimmi suliffissarsiortut maannakkut 217-iupput.

2025-p naalernerani suliffissaaleqisut 218-iupput, ukiullu siuliinut sanilliullugit aatsaat taama amerlatigalutik.

Taamaattumik ajornartorsiut ilungersunartoq tamanna Kommuneqarfik Sermersuumi kommunalbestyrelsimi qanittukkut oqaluuserineqarpoq.

Naalakkersuisut aamma Kommuneqarfik Sermersooq Tunumi inuussutissarsiorneq siuarsarniarlugu ukiuni kingullerni annertuumik suliniuteqarput. Tamanna ilaatigut Tasiilami aalisakkanik tunisassiorfimmik siorna ammaanikkut pivoq, tamatumalu peqatigisaanik inuussutissarsiutinik ineriartortitsinissamut tapiissutit inuusuttunullu aalisarnermik inuussutissarsiuteqalerusuttunut suliniutinut aningaasaliissutit pitsaanerusut pilersinneqarlutik.

Tasiilamili siunissaq ungasinnerusoq eqqarsaatigalugu ineriartortitsinissamut pilersaarusiorneq iluatsinngitsoorsimasoq, Justus Hansenip Demokraatineersup kommunalbestyrelsimut Inatsisartunullu ilaasortap oqaatigaa.

Suliffissarsiornermi ikiorsiissutit piumanerusaraat

Allakkat oqaluuserisassamut tapiliussatut kommunalbestyrelsimi ilaasortanut agguaanneqartut naapertorlugit, suliffissaaleqisut siorna aasaanerani ikilisimapput ukiup ilaani suliffissaqartarnerata kinguneranik. Ukiulli sisamararterutaani suliffissarsiortut amerleriaateqaqqillutik.

Tamatumunnga atatillugu Majoriaq ilisimatitsivoq, suliffissaaleqisut suliffissaannik innersuunnissaat ilungersunartorujussuusartoq, suliffissaaleqisut sulisoriinnarneqarsinnaasanngimmata, imaluunniit suliinnarnissaannik kajumissaarnissaat ajornakusoortorujussuusarmat. Taamalu inissisimasoqarluni sulisussarsiortut amerlagaluaqisut.

- Tasiilami Majoriami misigineqartartutut, suliffissaaleqisut aningaasarsiaqarlutik sulinissaminnut taarsiullugu,suliffissarsiornermi ikiorsiissutinik toqqaasartut, tamanna aningaaqarnerminnut pitsaanerummat. Tassunga ilanngullugu, suliffimmik innersuussamik itigartitsinermi kinguneritinneqartartoq – ikiorsiissutinik qaammatip affaani ilanngaasarneq – suliffissap akuerinissaanut kajungernerulernermik kinguneqartanngitsoq, Tasiilami Majoriamit oqaatigineqarpoq.

Majoriamit isumaqartoqarpoq suliffissaaleqisut suliffissarsiortutut nalunaarsorneqarnissaminnut kajungernerusarnerannut annerusumik patsisaasoq suliffeqanngitsutut ikiorsiissutinik pisartagaqalerusuttarnerat, aamma sulilernissamut ilinniagaqalernissamulluunniit siunnersorneqarusunnatik.

Majoriamik nukittorsaanissaq

Kommuneqarfik Sermersuumi IT-kkut atortorissaarutit pisortanit ikiorsiissutinik suliffissarsiortunullu tapiissutinut atorneqartut 2025-mi atuutilersinneqarneranni unammilligassaqarluarsimavoq. 2025-mi qaammatini arfinilinni siullerni Majoriap suliffeqarnermut immikkoortoqarfiani sulisut suliffissarsiortunut tapiissutitut aningaasanik tunniussisarput. Tamatumalu kinguneranik suliniutit soorlu paasiniaanerit, sulisinnaassutsimik nalilersuinerit, iliuusissatut pilersaarutit kiisalu kajumissaarinermik siunnersortinnermullu suliniutit, suliffissaaleqisut suliffissarsinissaannut pitsaanerusumik tunngaviliisartut, akornuserneqarput.

Qarasaasiatigut ajornartorsiutaasut suli atuutiinnartut paasinarsimmat, kommunimi suliffissaqartitsinermut isumaginninnermullu immikkoortortaqarfimmit aalajangerneqarpoq, suliffissaaleqisut sukkanerusumik suliffittaarsinnaaniassammata, sulisinnaasutut nalilersorneqartarnissaat pingaarnerutinneqalissasoq.

Majoriaq 2025-mi juunimi kommuni tamakkerlugu paasiniaanissaminut piareersalerpoq, tamatumalu kingorna suliffissaaleqisut tamaasa immikkut oqaloqatigisarlugit aallartilluni suliffissaaleqisut tamarmik sulisinnaanerannik nalilersuisinnaajumalluni.

Paasissutissat naapertorlugit aamma Majoriaq – ajornartorsiummik aaqqiiniarluni – inuusuttunut 18-it 30-llu akornanni ukiulinnut suliffeqanngitsunut, ilinniagaqarsimanngitsunut suliffissaaleqisutullu nalunaarsorneqarsimanngitsunut immikkut ujartuilluni suliaqartussanngorpoq.

Suliassat pingaarnerit suliarineqaqqilernissaat naatsorsuutigineqartoq, Majoriaq ilisimatitsivoq tamannalu suliffissaaleqisut ikileriarnerannik kinguneqassasoq naatsorsuutigineqarluni.

- Majoriami sulisunik sisamanik amerlanerusunik atorfinitsitsinikkut tamanna pissaaq, taakkualu illoqarfinni tamani suliffissarsiortunut ikiorsiissutinik eqqortumik tunniussisarnermik qulakkeerinninnissaminnut akisussaatinneqarumaarput, Majoriaq taama ilisimatitsivoq.

Ineriartorneq alianartoq

Ukiorpassuarni politikeriusimasoq Justus Hansen, Demokraatit, Tasiilami najugalik isumaqarpoq pissutsit pitsaanngitsumik ineriartorsimasut.

- Suliffeqarluni akissarsiaqarnerup aamma suliffissarsiortutut ikiorsiissutisisarneq, malitsigisaanillu ikiorsiissutit soorlu ineqarnermut tapiissutit, meeqqanut tapiissutit allallu, assigiinngissutaat ima annertutigiunnaarsimatigipput inuit sulerusunnerulernerannik kinguneqarsimanani.

- Tamanna ilungersunartorujussuuvoq, Tasiilamiinnaanngitsoq aammali Nunatsinni sinerissami allarpassuarni.

- Imminut pilersorsinnaanerup ilaquttanillu pilersuisinnaanerup tulluusimaarutigineqarsinnaannginnera, ineriartornermi alianartuuvoq. Isumaqarpunga Tasiilami siunissaq ungasinnerusoq eqqarsaatigalugu ineriartortitsinissamut pilersaarusiorneq ajoraluartumik assigiinngitsutigut iluatsinngitsoorsimasoq, oqarpoq.

Justus Hansen isumaqarpoq pisortat sulisitsisut annersaattut inissisimaannarsinnaanngitsut, taamaattumillu Kommuneqarfik Sermersooq ajornartorsiummik annikillisitsiniarluni suliniutinik arlalinnik aallartitsisimasoq.

Iliuuserineqartussat

Justus Hansenip oqaatigaa, Kommuneqarfik Sermersuumi inuussutissarsiornermut immikkoortortaqarfimmit akeqanngitsumik pikkorissaaneq 12-pax-imik taaneqartoq neqeroorutigineqartoq aamma Tasiilamut, takornarialerineq taamaalilluni aallarnisarneqarniassammat, aamma najukkami takornarialerisut umiatsianik qinnuteqarsinnaapput.

Pikkorissaaneq 12-pax-imik taaneqartoq, Imarsiornermik Aqutsisoqarfik suleqatigalugu ingerlanneqartoq, umiatsiamut 15 meterit ataallugit takissusilimmut aqqaneq-marlunnillu ilaasoqarsinnaasumut angallassisinnaanissamut akuersissutaavoq. Pikkorissaaneq inummut ataatsimut 38.500 koruuninik akeqarpoq, qaammammillu ataatsimik sivisussuseqarluni.

- Qujanartumik ukiuni kingullerni marlunni umiatsiaararsortorpassuit inuussutissarsiornermik ineriartortitsinissamut tapiissutinik, ESU-mik, aalisarnermik aallartitsisinnaajumallutik periarfissaq atorluarsimavaat, tikkuaavoq.

Naalakkersuisut naalakkersuisoqatigiinnissamut isumaqatigiissutaanni allassimavoq, Tasiilami Ittoqqortoormiunilu mittarfiliornerit qinigaaffimmi matumani aallartinneqassasut.

- Naalakkersuisut Tasiilami nutaamik mittarfiliornissaat aamma neriuutigilluinnarparput, taamaalilluta takornariaqarneq aallarnisaarusussuseqarnerlu aallartissinnaaniassagatsigik. Innuttaasut sulisinnaanissamik piumaffigineqarnissaat pisariaqartinneqarpoq aamma sulilertariaqarput, oqarpoq.

Eqqiaasut nunanit allaneersut

Nunanit allanit sulisussarsiornissamik qinnuteqarnermii, Nunatsinni sulisartut piukkunnaatillit atorfinnut tamanut salliutinneqartassasut qulakkeerneqartarpoq. Pisunili Majoriaq suliffimmut inuttassarsiorneqartumut sulisussarsisinnnaanngippat, kommunip akuersissuteqarneratigut sulisussamik nunamit allameersumik atorfinitsitsisinnaavoq.

- Assersuutit alianartut ilagaat kommunip nunanit allaneersunik sulisussarsiortarnera, inuit amerlavallaat suliffeqalerusuttanngimmata.

- Atuarfimmi eqqiaasussanik ukiumi ataatsimi ujaasisoqarsimagaluarpoq, iluatsinngitsumilli. Taamaattumik Filippinerinik eqqiaasussanik atuarfimmut atorfinitsitsisoqartariaqarsimavoq, Justus Hansen oqarpoq.

Tasiilami Royal Greenlandip aalisakkerivia ukiuunerani matoqqavoq aatsaallu juunimi ammaqqittussaalluni.