Tilioq sulianik pitsaanerusumik ingerlatsinissamik suliniuteqartoq
Innarluutillit illersuisuat Tilioq pikkorissaaniarluni nunamilu sulianik suliaqartut piginnaanngorsarniarlugit ukiuni tulliuttuni marlunni illoqarfinnut tamanut angalassaaq.
Tilioq suliassaqarfinni taakkunani sulianik pitsaanerusumik ingerlatsisoqarnissaa anguniarlugu kommunini sulisut, pingaartumik sulianik suliaqartut, pikkorissarniarlugit, ulluni pingasuni pikkorissartitsinissamik pilersaarusiornikuusoq, ukiullu marluk ingerlaneranni sinerissami illoqarfinnut tamanut angalassasoq innarluutillit illersuisuat Qivioq Løvstrøm ilisimatitsivoq.
Assi: Tilioq
Sulianik
eqqunngitsumik suliarinninneq ukiut tamaasa inuit innarluutillit
ajornartorsiutiginerpaasarpaat. Tamanna Tiliup innuttaasut oqaaseqartartuminnut saaffiginnissuterpassui ukiut tamaasa misissoqqissaartaramigit misissuinerata
takutippaa.
Tamanna tunngavigalugu suliniut Ilimmarsaaneq maanna tamakkiisumik
aningaasaliiffigineqareerlunilu aallartimmat oqaaseqartartup Qivioq Løvstrømip nuannaarutigaa.
Kommunini tallimani tamani sullissisut inatsisinik malinninnermik,
pisinnaatitaaffinnik tunngavilimmik innuttaasunillu pitsaanerpaamik
ikiuinissamik qulakkeerinninniarlutik eqqortumik ilisimasaqarnissaat
piginnaaneqarnissaallu suliniummi pineqarpoq.
Kommunini sulisut tamarmik, pingaartumillu sullissisut, pilersaarummi tassani ilinniartinniarlugit ulluni pingasuni pikkorissaanermik
suliaqarniarpugut, ukiullu marluk ingerlanerini sineriammi
illoqarfinni tamani angalaniarpugut, Tilioq tusagassiuutinut nalunaarummi allappoq.
Tiliup kommuninut illoqarfinnullu tamanut ilinniartitsinermi innuttaasut innarluutillit taakkualu ilaqutaasa unammilligassaat sammineqassammata innuttaasunik, atorfilittanik soqutigisaqaqatigiinnillu
allanik ataatsimeeqateqarnissani pingaarnerpaatissavaa.
Ilimmarsaaneq Avannaata Kommuniani aallartissallunilu apriilimi maajimilu Ilulissani, Uummannami, Upernavimmi Qaanaanilu
ingerlanneqassaaq.
Tilioq Kommune Qeqertalimmi
illoqarfinnut Aasiannut, Qeqertarsuarmut, Qasigiannguanut
Kangaatsiamullu 2026-mi maajimi juunimilu tikeraassaaq.
Qeqqata Kommuniani, Kommuneqarfik Sermersuumi aamma
Kommune Kujallermi illoqarfiit 2027-mi tikinneqassapput.
