Toqutsisoqarneranik suliaq Nuummi ataasinngorpat aallartissaaq

Angutip 27-nik ukiullip Ittoqqortoormiineersup toqutsisimasutut unnerluutigineqarnerata suliarineqarnera Eqqartuussisoqarfik Sermersuumi ataasinngornermi decembarip 22-ani aallartissaaq.

Angummut 39-nik ukiulimmut augustip 30-ani unnuami nalunaaqutaq marluk sisamallu akornanni savimmik arlaleriarluni kapoorisimasutut unnerluutigineqarpoq. Angutip kapoorneqarnini kingorna toqqutigaa.

Tamanna unnerluussummi Sermitsiap pissarsiaani atuarneqarsinnaavoq.

27-nik ukiulik Eqqartuussisoqarfik Sermersuumi kingorna sassartinneqarpoq, maannalu Nuummi pineqaatissinneqarsimasunut inissiisarfimmi tigummigallarneqarluni.

Kalaallit Nunaanni Politiit suliamik misissuineranni pinerluttoqarsimatillugu misissuisartut, Københavnimi politiinit paasiniaasartut toqusullu timaannik misissueqqissaartartut ikiuukkiartortussat Danmarkimit aggersarneqarsimasut, politiit aggustip 31-ani nalunaarutigaat.

Unnerluussisussaatitaasup angut ukiuni arfineq-marlunni pineqaatissinneqarsimasunut inissiisarfimmiittussanngortinnissaa piumasaraa. Eqqartuussineq ulluni pingasuni ingerlanneqarnissaa naatsorsuutigineqarpoq.