Trump Danmarkimut suli akersuuppoq: Kalaallit Nunaat ajornartorsiuterujussuuvoq

Kalaallit Nunaannut tunngatillugu apeqqut"uagutsinnut ajornartorsiuterujussuuvoq".

USA-p præsidentia Donald Trump Ankarami pingasunngornermi ataatsimeersuarnermi oqarpoq.

- Kalaallit Nunaat uagutsinnut ajornartorsiuterujussuuvoq, ajornartorsiutillu aappaa tassaavoq (Iranimut sorsunnermi) peqataaqqullugit (nunat Nato-mi ilaasortat, aaqq.) qinnuigigatsigit tapersersorneqannginnerput.

- Piffissami sivikitsumi nunat taakku Ruslandimut illersorniarlugit dollarinik milliardilikkaanik atuinikuuvugut, naak uagutsinnut attuumassuteqanngikkaluartoq. Kisianni ajunngitsumik pineqanngilagut, Donald Trump oqarpoq.

Taamaalilluni Danmarkimut Kalaallillu Nunaannut akersuunnini, Nato-mi ataatsimeersuarnissamu peqataajartarluni marlunngornermi tikinnermini aallartitani nangeqqippaa.

Trumpip USA-p Kalaallit Nunaata "aqulernissaanik" kissaateqarnera naqissuserpaa. Taamatut piumasaqarnini pingasunngormat uteqqippaa.

- Kalaallit Nunaat USA-mut pingaaruteqartorujussuuvoq, Danmarkimulli pingaaruteqarani.

- Sorsunnersuup aappaani Danmarki nazistinit ullup ataatsip iluani tiguarneqarpoq. Hitlerip ullup ataatsip ingerlanerani ajugaaffigai tiguarlugillu. Taava Danmarkip Kalaallit Nunaat uagutsinnut isumageqquaa.

- Kalaallit Nunaat tiguarput, sianiilliorlutali utertipparput. Utertissimasussaanngikkaluarparput, Kalaallit Nunaammi illersorniarluta pisariaqartipparput. USA-muinnaanngitsoq, nunarsuarmut tamarmut, Donald Trump oqarpoq.

Ima nangippoq:

- Piginikuuarput (Kalaallit Nunaat, aaqq.). Akisussaaffiginikuuarput. Kingornalu utertillugu. Naluara sooq. Panama aamma utertissimassanngikkaluarpara, Donald Trump oqarpoq.

Nato-p generalsekretæria Mark Rutte peqatigalugu tusagassiortunik katersortitsinermi USA-p Natomik isornartorsiuinera "Ruttep paasilluaraa", Trump oqarpoq.

- Aaqqiissutissarsiumaarpugut, naapertuilluanngitsumilli pineqarpugut. Nato-mut naapertuutinngitsumik akileerujussuartarpugut, Donald Trump oqarpoq.

Taamaalilluni Kalaallit Nunaat pillugu apeqqut, Trumpip Europami nunanik illersornissamut aningaasartuutit aamma USA-p Iranimut sorsunnerani ikiuiniarnera pillugit sivisuumik isumaqatigiinngissuteqarneranut maanna tapitartuupput.

USA-lli Kalaallit Nunaata tiguarnissaa kalaallit Danmarkillu akuersiteqqaarnagit piviusunngorunnanngilaq. Ministeriunerup Mette Frederiksenip pingasunngornermi ataatsimeersuarnerminaqissuserpaa.

"Kalaallit Nunaat tuniniagaanngitsoq" tassani oqaatigaa.

Mette Frederiksen Danmark Kalaallit Nunaata sakkutooqarnikkut illersornissaanut piareersimanersoq pingasunngornermi aperineqarami ima akivoq:

- Kunngeqarfiup Danmarkip illersornissaanut soorunami piareersimavugut, Mette Frederiksen pingasunngornerup ullaavani ataatsimeersuarnermut peqataajartornermini oqapoq.

Ritzau/