Trump: Sakkutooqarnikkut Europamit tunuarsinnaaneq Kalaallit Nunaannut tunngasut aalajangissavaat

USA-p præsidentia Donald Trump pingasunngornermi unnukkut timmisartumut Air Force One-mut ilaalluni oqarpoq USA-p sakkutuui Europamiikkunnaarsinnaasut “Kalaallit Nunaat aalajangiisuulluni”.

Tusagassiortup præsidenti aperivaa sakkutuut amerlanerusut Europamit aallartinneqarnissaannik pilersaaruteqarnersoq.

- Suli aalajangersimalluinnarlunga aalajangiisimanngilanga. Kalaallit Nunaat apeqqutaasorujussuuvoq, oqarpoq nangillunilu sakkutuut tunuarnissaat eqqarsariaqassallugu „Kalaallit Nunaat pillugu pitsaasumik isumaqatigiissuteqartoqanngikkutta“.

Nutaarsiassaqartitsivik CNN taama allappoq.

Trump ulluni kingullerni Tyrkiami illoqarfimmi Ankarami NATO-p ataatsimeersuarnerani peqataavoq

Tassani uteqqippaa USA-p Kalaallit Nunaannik “aqutsilernissaa” kissaatigalugu.

- Kalaallit Nunaat USA-mut pingaaruteqartorujussuuvoq. Kalaallit Nunaalli Danmarkimut taama pingaaruteqarnani, præsidenti pingasunngormat ataatsimeersuarnermi oqarpoq.

Aamma oqarpoq isumaqarluni USA naapertuilluanngitsumik pineqartoq Natomullu akileerujussuartartoq.

Danmarkip ministeriunerata Mette Frederiksenip (Soc.) ataatsimeersuarnermi erseqqissarpaa Danmarkip Kalaallit Nunaatalu kissaatiginngilluinnaraat USA-p Kalaallit Nunaannik tiguaanissaa.

Tassani oqarpoq: „Kalaallit Nunaat tuniniagaanngilaq.“

Mette Frederiksen pingasunngornermi aperineqarami Danmark Kalaallit Nunaata sakkutooqarnikkut illersornissaanut piareersimanersoq ima akivoq:

- Soorunami Kunngeqarfik Danmark illersornissaanut piareersimavugut, Mette Frederiksen Nato-p ataatsimeersuarneranut pingasunngornermi ullaakkut isilernermini oqarpoq.

Naalakkersuisut siulittaasuat Jens-Frederik Nielsen (D) pingasunngornermi aamma uteqqippaa Kalaallit Nunaat tuniniagaanngitsoq.

- Allatut ajornartumik uteqqittariaqarpara: Kalaallit Nunaat tuniniagaanngilaq. Killeqarfiit, Nunat Tamat akornanni inatsisit uagullu namminiussuseqarnerput ataqqineqassaaq.

Danmarkip nunanut allanut ministeriata Lars Løkke Rasmussenip (M) taamanilu nunanut allanut tunngasunut naalakkersuisuusup Vivian Motzfeldtip (D) USA-p nunanut allanut ministeria Marco Rubio aamma USA-p præsidentiata tullia J. D. Vance Washington D.C.-mi januaarimi naapippaat.

Trumpip Kalaallit Nunaat pillugu arlaleriarluni nalunaaruteqareernerata kingorna ataatsimeeqatigiinneq pivoq.

Ataatsimeereernerup kingorna Løkke oqarpoq USA Danmarkilu Kalaallit Nunaat pillugu tunngaviusumik isumaqatigiinngissuteqartut, suleqatigiissitaliortoqarsimasorli.

Ritzau/