Trump: USA-p Kalaallit Nunaat aarlerisaarutitut pigissavaa — tamanna ajornanngitsoq ilungersunarnerusorluunniit aqqutigalugu isumaqatigiissutigineqarumaarpoq

Donald Trumpip erseqqissarpaa Kinap Ruslandillu nunamik tiguaannginnissaat anguniarlugu USA-p Kalaallit Nunaat pigisariaqaraa.

Foto: Kevin Lamarque/Reuters/Ritzau Scanpix

Ritzaus Bureau Ritzaus Bureau

Thomas Munk Veirum Thomas Munk Veirum Tusagassiortoq

Saqqummersinneqarpoq 9. Januaari 2026 - 20:22

Annonse

USA-p præsidentiata Donald Trumpip Kalaallit Nunaannik soqutiginninnini erseqqissaqqippaa.

Det Hvide Husimi tallimanngornermi tusagassiortunut oqarpoq USA-p nuna pigilertariaqaraa siunissami Ruslandip Kinallu tiguaaniarnissaat pinngitsoortinniarlugu.

Reuters taama allappoq.

- Rusland Kinaluunniit nunatut sanilererusunngilagut, Trump Berlingske naapertorlugu oqarpoq.

TV2 naapertorlugu Donald Trump tusagassiortunik katersortitsinermi oqarpoq USA Kalaallit Nunaannut tunngatillugu iliuuseqarumaartoq:

- Kalaallit Nunaat maannakkut iliuuseqarfigissavarput, nuannarippassuk nuannarinngippassulluunniit. Iliuuseqanngikkuttami Ruslandip Kinalluunniit Kalaallit Nunaat tiguassavaat, uagullu Rusland Kinaluunniit nunatut sanileriumanngilagut.

- Ajornanngitsumik isumaqatigiissusiorusuppugut. Tamannali pisinnaanngippat ilungersunarnerusumik iliorluta tamanna angusinnaavarput, TV2 naapertorlugu oqarpoq.

USA-p, Danmarkip Kalaallit Nunaatalu nunanut allanut ministeriisa sapaatip akunnerani tullermi ataatsimeeqatigiinnissaat sioqqullugu Trump taama nalunaaruteqarpoq.

Inatsisartuni partiit tallimat siulittaasuisa tallimanngornermi unnukkut ataatsimut nalunaarumminni naqissuserpaat Kalaallit Nunaat Namminersorlutik Oqartussanut inatsit aamma nunat tamalaat inatsisaat malillugit aqunneqartuusoq, tamannalu nunanit allanit akuliuffigineqassanngitsoq.