Trumpip iliuusaa Folketingimi ilaasortap ataqqinninnginnertut taavaa
USA-mik attaveqateqarnermi illuatungeriit ataqqeqatigiinnissaat pingaartinneqartoq Folketingimut ilaasortap Aaja Chemnitzip (IA) oqaatigaa: - Una pisoq akerlerluinnaanik iliorneruvoq. Pingaartumik Kalaallit Nunaata USA-mut ilanngunnissaa sulissutiginiarlugu oqarmat, Trumpip Kalaallit Nunaannut immikkut aallartitamik toqqaaneranut atatillugu oqarpoq.
- Uanga IA-lu assigiimmik oqariartuuteqarpugut: Kalaallit Nunaat tuniniagaanngilaq tuninialerneqarunnaranilu, taamaattumik Kalaallit Nunaata USA-mut ilanngunnissaanik pilersaarutit puigorneqartariaqarput, Aaja Chemnitz oqarpoq.
Toqqorsivimmit: Leiff Josefsen
USA-p præsidentia ukiut aappassaat juulli sioqqutilaarlugu Kalaallit Nunaat pillugu annertuumik nalunaaruteqarpoq.
Donald Trumpip Louisianami guvernøri Jeff Landry USA-p Kalaallit Nunaannut immikkut aallartitaatut toqqarpaa, Landryllu tassunga atatillugu Kalaallit Nunaata USA-mut ilanngunnissaata sulissutiginissaa qilanaarisimallugu oqarpoq.
Folketingimut ilaasortap Aaja Chemnitzip (IA) ataasinngornermi ullaakkut nutaarsiassaq qisuariarfigaa, Trumpillu nalunaarutaa ataqqinninngitsutut taallugu.
- Trumpip iliuusaa nutaaq ataqqinninnginneruvoq isumaqatigiissutigineqartullu iluaniinnani. Tamanna inuiaqatigiinni toqqissimannginnermik pilersitsivoq oqaloqatigiinnerillu ingerlanneqarsimasut akimorlugit iliuuseqarnerulluni, Facebookimi allappoq.
USA-p præsidentiata oqaaseqarnissaa piareersimaffigisimallugu Sermitsiamut itisilerpaa:
- Isumaqartuaannarnikuuvunga Kalaallit Nunaannut tunngasut sivisuumik ingerlassasut, ingerlaannarlu qaangiunnaviaratik. Taamaammat politikkitsinnik aalajangiusimanninnissarput pingaaruteqarluinnarpoq. Tassa Kalaallit Nunaat tuniniagaanngilaq, siunissarpullu nammineq aalajangertussaavarput, Aaja Chemnitz Sermitsiamut oqarpoq.
Nunamit allamit tiguagaarusunngilagut
Jeff Landryp Kalaallit Nunaata USA-mut ilanngunnissaata sulissutiginissaanut qilanaarinninnini pillugu oqaasii politikerip tigulluanngilai:
- Vivian Motzfeldt USA-llu Danmarkimi sinniisuata oqaloqatigiinnerminni illuatungeriit ataqqeqatigiinnissaat pingaartinneqartoq oqariartuutigineqarnikuuvoq, unali pisoq illuatungerluinnaraa, oqarpoq, nangipporlu:
- Kalaallit Nunaanniit erseqqissumik isummerniikuupput: Pineqartilluta ilaassaagut, aamma Kalaallit Nunaata siunissaa uagut nammineq aalajangissavarput. Amerlanerussuteqartut Amerikamut ilanngukkusunngillat, nunamit allamit tiguarneqarnissarput kissaatiginngilarput, akerlianilli nammineernerulernissarput kissaatigalugu.
Politikeri aallartitamut nutaamut tusarliussassaq tamanna pingaaruteqartoq isumaqarpoq.
- Paasisakka naapertorlugit Louisianamiissaaq, Kalaallit Nunaanulli tikeraarnissaminut tikilluaqqusaavoq. Uanga IA-lu assigiimmik oqariartuuteqarpugut: Kalaallit Nunaat tuniniagaanngilaq tuninialerneqarunnaranilu, taamaattumik Kalaallit Nunaata USA-mut ilanngunnissaanik pilersaarutit puigorneqartariaqarput, Aaja Chemnitz oqarpoq.
- Tunniutiinnarunnanngilaq
Aaja Chemnitzip Amerikamiut Kalaallit Nunaannut soqutiginninnerat pilersaarutaallu paasisaqarfiginerujumallugit ukioq manna arlaleriarluni USA-mut tikeraarpoq.
- Politikkikkut pilersaarutini tunniutiinnarfiginaviannigilai. Politikkikkullu pilersaarutit Trumpi qitiutillugit ingerlapput. Isumalioqatigiissitat politikkimillu misissueqqissaartartut assigiinngitsut oqaloqatigineranni tamanna paasinarsivoq.
- Tamanna pisortatigoortumik politikkiunngilluinnarpoq, Trumpilli politikkeraa, taannalu aalajangiusimalluinnarpaa.
