Trumpip immikkut aallartitaa: Kalaallit Nunaat pillugu isumaqatigiissut illersornissamut isumaqatigiissutitoqqanik tunngaveqarpoq
Trumpip Kalaallit Nunaannut immikkut aallartitaata, Jeff Landryp, isumaqatigiissut pillugu oqaaseqarpoq. Sukumiinerusumilli oqaaseqarsinnaanani.
Assi: Brendan Smialowski/AFP/Ritzau Scanpix
USA-p præsidentiata Donald Trumpip Kalaallit Nunaannut immikkut aallartitaa Jeff Landry, Danmarkip, Kalaallit Nunaata USA-llu akornanni pissutsinut aaqqiissutissatut sinaakkutissat pillugit isumaqatigiissuteqarnissamik suliaqarneq pillugu paasissutissiivoq.
Kalaallit Nunaannut tunngatillugu isumaqatigiissut, USA-p Danmarkillu illersornissaq pillugu 1941-mi 1951-imilu isumaqatigiissutaannik tunngavilik nanginnerigaa Jeff Landryp oqaatigaa.
New York Times-imut taama oqarpoq.
- Isumaqatigiissut USA-p Danmarkillu akornanni 1941-mi aamma 1951-imi illersornissaq pillugu isumaqatigiissutinik tunngavilik USA-p, Nato-p Kalaallit Nunaatalu isumannaatsuunerannik nukittorsaataassaaq, Atlantikullu illuatungaani ukiuni arlalinni illersornissamut pisussaaffiit uppernarsarneqassapput, tusagassiorfimmut oqarpoq.
Jeff Landry sulissutigineqartut suli inaarneqanngimmata sukumiinerusumik annertunerusumik oqaaseqarsinnaannginnerarpoq.
Isumaqatigiissutilli "Amerikamiut kiffaanngissuseqarnerulersissavai, sakkutooqarfiit attaveqaatillu nutaat tapersissagao, rakettinut illersornissamut atortunik pitsaasunik soorlu Golden Dome-mik atuinissaq ajornannginnerulersissasoq Kinamiullu Ruslandillu akeqqersimaartut sunniuteqarunnaarsinneqassapput“.
Nato-p generalsekretæriata Mark Ruttep Donald Trumpillu Davosimi Schweizimiittumi aningaasaqarneq pillugu ataatsimeersuarnermi naapeqatigiinnerisa kingorna Kalaallit Nunaannut sinaakkutissatut isumaqatigiissut eqqartorneqalerpoq.
