Trumpip Iran sianiilliorluni Hormuzip kangerluani dronenik saassussisutut unnerluutigaa

USA-p præsidentiata Donald Trumpip Iran Hormuzip kangerluani umiarsuarnut dronenik aallaasitsinikkut “sianiilliorluni” sakkulersorunnaarnermik unioqqutitsinerarlugu unnerluutigaa.

Trumpip saassussineq qanga pisimanersoq oqaatiginngilaa.

FN-illi nunani tamalaani imarsiornermik suliniaqatigiiffiata (IMO) sisamanngormat umiarsuaq saassunneqartoq pissutigalugu Persiap Kangerliumanersuani umiarsuit kigaalluttut qimarnguffissaannik pilersaarutini unitsikkallareeraalu taama nalunaaruteqartoqarpoq.

- Kunngiitsuuffiup Islamiusup Iranip dronit saassussisut minnerpaamik sisamat umiarsuarnut Hormusip Kangerliumarngani ingerlaartunut aallartippai, præsidenti Truth Social-imi tallimanngormat allappoq.

- dronit ilaasa umiarsuup assartuutip akisoorujussuup qaava eqqorpaa. Tamanna aseruatiternernik kinguneqarpoq, umiarsuarli ingerlaqqissinnaasimavoq. Dronit pingasut allat aallaallugit nakkartippagut, Trump allappoq.

- Tamanna sakkulersorunnaarnermik isumaqatigiissummik sianiilliorluni unioqqutitsineruvoq erseqqissoq, Trump allappoq.

Sisamanngornermi saassussisoqaraluartoq kangerliumaneq aqqusaarlugu umiarsuarnik tallimanngornermi angalasoqartuarpoq, nutaarsiassaqartitsivik AFP paasissutissat umiarsuarnut tunngasut tunngavigalugit allappoq. Kiiannili pisoq sioqqullugu pingasunngornermisut angalasoqartiginngilaq.

Iranip umiarsuarnut aqqutit allat, soorlu aqqutit Iranimit akuerisaanngitsut, atorneqassanngitsut sisamanngornermi mianersoqqussutigaa.

/ritzau/