Trumpip isummaminik allanngortitsinerata kingorna EU-mi politikerit USA-mik isumaqatigiissut sulissutigeqqilerpaat
USA-p EU-mi naalagaaffiit killigi “ataqqippagit”, EU-mi politikerit isumaqatigiissummik sulinerat sukkanerussaaq.
Trump isummaminik allanngorartitsitsereertorlu EU-p inatsisartuisa USA-mik niuernikkut isumaqatigiissut akueriniartussanngorpaat. (Assi toqqorsivimmit).
Assi: Saul Loeb/Ritzau Scanpix
EU-p inatsisartuini politikerit USA-mik niuernikkut isumaqatigiissuteqaqqinnissaq sulissutigeqqissallugu pingasunngornermi aalajangerput.
Taama EU-p inatsisartuini nunat tamalaat niueqatigiinnermut ataatsimiititaliaanni siulittaasoq Bernd Lange tusagassiuutitigut nalunaarummi allappoq.
EU-mi qinikkat ataatsimiinnerat USA-p præsidentiata Donald Trumpip Danmark Europamilu nunat arlallit Kalaallit Nunaat pillugu akitsuusiinermik pillarniarlugit sioorasaarmagit unitsinneqarpoq.
Kingornali Trumpip sioorasaarinini tunuartippaa.
Maanna EU-p inatsisartuisa suliaq ingerlateqqissavaat.
- Niuernermut ataatsimiititaliami ilaasortat inatsisissatut siunnersuutit marluk ingerlaannaq suliarinissaat piareersimaffigaat, USA-p EU-p nunallu ilaasortaasut ataqatigiinnerat namminersornerallu ataqqippagit, Lange tusagassiuutitigut nalunaarummi oqarpoq.
EU-p USA-llu 2025-mi aasakkut niuernikkut isumaqatigiissutaat naapertorlugu, EU-mit nioqqutissat amerlasuut USA-mut eqqunneqartartut 15 procentimik akitsuuserneqassapput.
Tamannali EU-p inatsisartuinit suli akuerineqanngilaq.
Kalaallit Nunaat pillugu pissutsit januaarip ingerlanerani pissutigalugit niuernikkut isumaqatigiinnginneq ingatsikkiartorpoq, Davosimi Schweizimiittumi ataatsimeersuarnermi Trumpip akitsuutinik qaffaanissamik pilersaarutimi taamaatitsiinnarnissaata tungaanut.
Aamma sakkutooqarnikkut pissaaneq atorlugu Kalaallit Nunaat tinguarniarnagu oqaatigaa. Siusinnerusukkulli sakkuut atorlugit tinguaasinnaaneq tunuarsimaarfiginnginnerarnikuuaa.
Nutaarsiassaqartitsivik AFP naapertorlugu Lange isumaqatigiissut "siunissami EU-p nunataasa ilaat ulorianartorsiortinneqarpata unitsitsinissamut tunngavissanik“ ilaneqarumaartoq oqarpoq.
- Washingtonimut oqariartuut ersarippoq: Europap nunanik oqartussaaneranik ataqqinninneq aamma EU-p USA-llu isumaqatigiissutaannik Skotlandimit malinninneq isumaqatiginninniutaasinnaanngilaq, oqarpoq.
/ritzau/
