Trumpip Kalaallit Nunaat piumasaralugulu sakkutuut Europamit angerlartinniarlugit sioorasaarivoq

Kalaallit Nunaat Danmarkimit pinnani USA-mit aqunneqartariaqartoq USA-p præsidentiata Donald Trumpip erseqqissaqqippaa.

Tamanna Tyrkiap præsidentia Recep Tayyip Erdogan, NATO-p nunami illoqarfiit pingaarnersaanni Ankarami marlunngornermi pingasunngornermilu ataatsimeersuartitsinerani, ataatsimeeqatigitillugu pivoq.

Nutaarsiassaqartitsivik Reuters taama allappoq.

USA-p præsidentia naapertorlugu Danmarkip Kalaallit Nunaat naammattumik aningaasaliiffigisimanngilaa.

- Kalaallit Nunaata Danmark ikiunngilaa. Danmarkip Kalaallit Nunaata ikiornissaanut aningaasanik naammattunik atuinngilaq, tamannali USA-mut pingaaruteqarpoq, Trump oqarpoq.

Kalaallit Nunaat „Kinamiunit Ruslandimillu umiarsuarnit unguneqarsimasoq“ oqaaseqaatini uteqqippaa.

Danmarkip Kalaallit Nunaata Amerikamiutut inissisimalernissaa “akueriumanngikkaa” Trump oqarpoq.

- Ruslandimut ikiuinermut aningaasat atukkagut tamaasa eqqarsaatigalugit... aningaasanik atuisariaqanngikkaluarpugut... sakkutuugut tamaasa Europamit angerlartissinnaavagut, taanna oqarpoq.

- Soorlu malugisimassagissi Europa ukiut 20-t matuma siornatigumut sanilliullugu allaanerulluinnarpoq. Allaanerulluinnarpoq. Mianersortariaqarpullu – nunasisunut nukissiuutinullu tunngatillugu. Taakku eqqumaffiginngippatigut Europa suujunnaarsinnaavoq, Trump oqarpoq.

Danmarkip, Kalaallit Nunaata Amerikallu suleqatigiissitaanni januaarimiilli isumaqatigiinniartoqarnerani ukiup naannginnerani aaqqiissuteqartoqarumaartoq Nunanut allanut ministeri Lars Løkke Rasmussen (M) juunip naanerani Politikenimit apersorneqarluni oqarpoq.

Nunatta isumannaatsuunissaa eqqarsaatigalugu Kalaallit Nunaat naalagaaffeqatigiinnermut ilaasoq pigiumagitsik Trumpip arlaleriarluni oqareernerata kingorna USA-p Kalaallit Nunaatalu aamma USA-p Danmarkillu akornanni pissutsit ilungersunarput.

Danskit nunanut allanut ministeriata aamma taamanikkut Kalaallit Nunaata nunanut allanut ministeriata Vivian Motzfeldtip USA-p vicepræsidentia J.D. Vance aamma nunanut allanut ministeri Marco Rubio Washington D.C.-mi ataatsimeeqatigereeraat Kalaallit Nunaat, USA Danmarkilu suleqatigiissitaliornissamik januaarimi isumaqatigiissuteqarput.

RITZAU