Trumpip USA-p Canadallu akornanni ikaartarfik matuniarlugu sioorasaarutigaa
Trumpip USA tamakkiisumik taarsiiffigineqanngippat Michiganimut ikaartarfiup ammarnissaa akuersissutigiunnarnagu, allappoq.
Trump ikaartarfiup ammarnissaanik unitsitsiniarluni Truth Socialikkut ataasinngornermi sioorasaarivoq.
Assi: Carlos Osorio/Reuters
USA-p præsidentiata Donald Trumpip USA-p Canadallu akornanni ikaartarfiup ammarneqarnissaa unitsinniarlugu ataasinngornermi sioorasaarivoq.
Gordie Howe International Bridgep Canadami Ontariomiit USA-mi Michiganimut ikaartarfiup suli sanaartorneqartup minnerpaamik affaa USA-miit pigineqartariaqaraluartoq Trump isumaqarpoq.
- USA-p (Canadamut, aaqq.) tunniussai tamakkerlugit taarserneqanngippata ikaartarfiup ammarnissaa akuerinavianngilara, aamma Canada USA-mut naapertuilluartumik ataqqinnittumillu pissusilersorfigineqarnissatsituut pilinngippatigut ammarnavianngilara, Trump inuit attaveqaqatigiittarfianni Truth Socialimi allappoq.
- Isumaqatiginninniarnerit ingerlaannaq aallartissavavut, allappoq.
Ikaartarfik, Canadami inunngorsimasup National Hockey Leaguertartup tusaamasap Gordie Howep aqqanik taaguutilimmik sanaartorneq, 2018-imi aallartinneqarpoq.
4,7 milliardit dollarinik akeqarpoq - 29,5 milliardit krouunit - ukiorlu manna kingusinnerusukkut ammarneqarnissaa naatsorsuutigineqarluni.
Trumpip republikaaneriusup allakkamini aamma Canadap ikaartarfiup illuatungaaniittut pigigai, Amerikamiullu atortuinik kiffartuussinerilluunniit ikaartarfiliornermi atorneqarsimanngitsut isornartorsiorpaa.
- Maannalu, tamatuma saniatigut, ministeriuneq Carney (Mark Carney, aaqq.) Kinamut isumaqatigiissuteqarusuppoq — taakku Canadamiut suutinnavianngilaat. Sinnikui piinnassavagut! Tamaattoqarsinnaanngilaq, Trump allappoq.
Carney qaammammi kingullermi Beijingimut tikeraareerluni nunalu taanna niuernikkut isumaqatigiissutaagallartumik isumaqatigiissuteqareersorlu USA-p Canada 100 procentimik akitsuuserniarlugu sioorasaarpaa.
Trumpip Canadami ishockeymik unammisarnerit tamaasa Kinap unitsinnissaat aamma Amerikap Avannaani ishockeymik unammiuaarnerni NHL-imi pissartanngorniuttoqartarunnaarnissaa pilersaarutigigaa allakkamini uteqqippaa.
Trumpip 2025-mi januaarimi præsidentitut ivertinneqarmi kingorna Canada immikkut ittumik niuerneq pillugu aaqqiagiinngissutigisalerpaa. USA-p Canada tiguartariaqaraa siusinnerusukkut aamma kaammattuutiginikuuaa.
Canadap Trumpip Gordie Howe International Bridge pillugu allaaserisaa suli qisuariarfiginngilaa.
/ritzau/AFP
