Trumpip USA-p Natomit aninissaa eqqarsaatigigaa

USA-p præsidentiata Donald Trumpip USA illersornissamut peqatigiiffimmit Natomit anissasoq eqqarsaatigaa.

Tamanna tuluit aviisianni The Telegraph-imi pingasunngornermi apersorneqarnermini oqaatigaa.

Iranimut sorsunnerup kingorna USA-p ilaasortaanerata allanngortinnissaanik eqqarsaatiginnikkumanersoq aperineqarami “eqqarsaatigeqqittariaqanngitsoq” akivoq.

- Nato upperilluinnarsimanngisaannarpara. Tiigeri pappiaraasoq nalunngittuaannarpara, Putinillu aamma nalunngilaa, taanna tusagassiuutinut taama oqarpoq.

Tiigeri pappiaraasoq tassaavoq inuk suliffeqarfilluunniit ulorianarpasikkaluarluni uloriananngitsoq.

Tuluit Nunaata ministeriunerata Keir Starmerip Trumpip oqaasii tusaatillugit Nato "sakkutuut suleqatigiinnerattut silarsuarmi takuneqarsimasut sunniuteqarluarnerpaatut" taavaa.

- Nato ukiuni qulikkuutaani isumannaatsuussutigaarput, Natomullu tamakkiisumik pisussaaffeqarpugut, Starmer nutaarsiassaqartitsivik AFP naapertorlugu pingasunngornermi tusagassiortunik katersortitsinermi oqarpoq.

USA-p illersornissamut isumaqatigiissummut attaveqarnertik Iranimi sorsunneq naammassippat nalilersortariaqaraa USA-p nunanut allanut ministeriata Marco Rubiop erseqqissareeraalu Trump taama nalunaaruteqarpoq.

Aamma tv-qarfimmit Fox Newsimit pingasunngornermi apersorneqarluni taama oqarpoq.

- Ajoraluartumik akerleriittoqareeraangat pissutsit nalilersortariaqartut qularutissaanngilaq, Rubio oqarpoq.

USA-p Israelillu Iran februaarip 28-anili sorsuffigaat.

Trumpip Europami NATO-mut ilaasortaasut USA-mik sakkutooqarnermik tapersersuiumannginnerat naammaginngikkini taamanimiilli arlaleriarluni oqaatigaa.

Ilaatigut Hormusip kangerliumarngani, uuliamik gassimillu avammut tunisinermi aqqutigineqartumi pingaarutilimmi, sakkutooqarnikkut isumannaallisaanissamut ikiuiniarluni aallartitsisoqassaaq.

Sapaatit-akunnerini kingullerni kangerliumaneq aqqusaarlugu umiarsuarnik angallassisoqarpianngilaq, tamatumalu kingunerisaanik nukissiuutit akitsoraluttuinnarput.

Europami nunat arlallit — ilaatigut Tuluit Nunaat, Frankrigi, Tyskland Danmarkilu — Hormusip kangerliumarngani isumannaallisaanermut peqataaniarlutik nalunaarsimapput.

Nunalli taakku suli aalajangersimasunik neriorsuuteqarsimanngillat.

/ritzau/