Tusagassiivik: Norge immap naqqani aatsitassarsiorunnaarniarpoq
Immap naqqani aatsitassarsiorneq avatangiisinik illersuiniaqatigiiffinnit isornartorsiorneqangaarpoq, Norgelu immap naqqani aatsitassanik piiaalerpat Kalaallit Nunaanni immami uumassusilinnut qanoq sunniutissanersoq amerlasuut sivisuumik ernummatigaat.
Greenpeacemit akerliussutsimik takutitsisut suliffeqarfik The Metals Company Mexicop avataani Manerassuarmi immap itinerani aatsitassarsiorfiusoq pillugu 2022-mi 2023-milu akerliussutsimik takutitsipput.
Assi: Gustavo Graf Maldonado/Reuters/Ritzau Scanpix
Norgep immap naqqani aatsitassarsiornissamik pilersaarutai inuppassuarnit, ilaatigut Verdensnaturfondenimit (WWF), Greenpeacemit aamma Inuit Circumpolar Counciliminit (ICC) ernumagineqarput, taakkualu nipiliorneq, qaamanermik mingutsitsineq, isugutat toqunartut aamma pujoralaat immap biokemiskiusumik oqimaaqatigiissaarinerisa — Norgemiinnaanngitsoq aammali Kalaallit Nunaanni - allanngortitsinissaat ernummatigaat.
Maannali oqiliallassinnaanngorput — sivikitsumik. Norgemi naalakkersuisut immap naqqani aatsitassarsiornissamik pilersaarutitik maannakkut naalakkersuisuunerminni taamaatiinnartariaqarsimavaat. Taamaanngippat partiit tapersersortaasa aningaasanut inatsit akueriumanngilaat.
Politiken taama allappoq.
- Naalakkersuinikkut allanngorluinnartutut isigaara. Naalakkersuisut oqaluttuap illuatungaaniillutik paasilersimavaat, Kaja Lønne Fjærtoft, WWF-ip Norgemi immikkoortortaqarfiani siunnersortiusoq, tusagassiutinut oqarpoq
Naalakkersuisut siunissami suliniut aallarteqqinniarunikku aningaasaliisussarsiornissaat ajornakusuussasoq taanna naliliivoq.
Norgep saffiugassat assigiinngitsut soorlu kobolt, kanngussak, nikkeli aatsitassallu qaqutigoortut immap naqqani sumiiffinni assigiinngitsuni 200 meterit ataallugit ititigisuni – ilaatigut Kalaallit Nunaata eqqaani – nassaarerusuttorujussuuai.
Tamannali ajornaatsuinnaanngilaq. Immammi naqqani sananeqaatit peerneqarpata immap naqqani imermilu uumassusillit sunnerneqarsinnaallutillu taamaalilluni immami uumassusillit assigiinngissitaarnerat allanngortinneqarsinnaavoq.
Naalakkersuisoq imaani aatsitassarsiornermik inerteqquteqarniartoq
Naalakkersuisoq imaani aatsitassarsiornermik inerteqquteqarniartoq
Kalaallit Nunaanni immap naqqani 200 meterit inorlugit ititigisumi maannakkut aamma uuliasiortoqarsinnaavoq.
Immap naqqani aatsitassarsiorneq inerteqqutaalersinniarlugu Inatsisartut inatsisaat allanngortinneqartariaqarpoq, tamannalu inuussutissarsiornermut, aatsitassanut, nukissiuuteqarnermut, inatsisinik atortitsinermut naligiissitaanermullu naalakkersuisup Naaja H. Nathanielsenip (IA) innersuussutigaa.
– Naatsorsuutigaara qinigaaffimmi matumani immami itisuumi aatsitassarsiornerup inerteqqutaalernissaanik siunnersuuteqassallunga. Imaani aatsitassarsiorsinnaanerit tamakkiisumik inerteqqutaalissappat ajornartorsiutaassaaq, tamannami aamma sermip aanneraneersut sioqqat qajuusaasat, sioqqanillu qalluinermut sunniuteqarnerlussinnaammat.
- Kisianni imaani itisuumi aatsitassarsiornerup akuerineqaannarnissaanut tunngavissaqanngitsutut isigaara. Ilaatigut mianersornissamut tunngavissaqarpugut, taamaalillutami aatsitassarsiornikkut suut aserortersinnaanerlutigit nalugatsigu. Ilaatigut nunami suliassarpassuaqaraluarpugut taamaattumillu immap itinerani suliaqarnissaq pisariaqartinngilarput, taanna ullualuit matuma siorna Sermitsiamut taama oqarpoq.
