Tusagassiorfiit nunanit allaneersut Inatsisartuni malinnaasut

Tusagassiorfiit nunanit tamalaaneersut Nuummi suli takussaaqaat, pisarnermillu amerlanerusut malinnaanerat periutsinik allannguisoqarneranik kinguneqartoq Inatsisartoqarfimmit nassuiaatigaat.

Inatsisartuni tusagassiortut suliffigisartagaat inugasaarpoq.

Assiliisoq: Oscar Scott Carl

Arnaq Nielsen Arnaq Nielsen Tusagassiortoq

Saqqummersinneqarpoq 2. Februaari 2026 - 13:54

Annonse

Tusagassiortut nunanit allaneersut Nuummi takussaanerat nalinginnaaleraluttuinnarpoq. Inatsisartullu ullumi immikkut ittumik ataatsimiinneranni tusagassiortut nunat allamiut aamma takussaapput.

Tusagassiorfinni sulisut nunatsinneersut avataaneersullu 15-it missaaniittut Inatsisartut ataatsimiillutik aallartimmata malinnaapput.

Nunatsinni tusagassiorfiit Sermitsiap KNR-illu saniatigut danskit tusagassiorfii DR TV2-lu ulluinnarni takussaajualernikuupput. Inatsisartulli ataatsimiinneranni ullumi tusagassiorfinnik Naalagaaffeqatigiit avataaneersunit aamma allanik malinnaasoqarpoq.

Tusagassiorfiit pisarnermit amerlanerulernerat allannguinermik kinguneqarpoq. Inatsisartut ataatsimiittarfiata eqqaani tusagassiortut suliffigisartagaanni nerriviit pisarnermit anginerusut takussaapput, malitassallu ilaat allanngortinneqarsimallutik.

Sillimaniarneq ilaatigut peqqutigalugu sukannernerusunik malitassaqalersimanera maluginiagassanut ilaavoq, assersuutigalugu tusagassiorfinni sulisut kavaajatik kavaajaartarfinnut parnaartartunut ileqqaarlugit isertalernissaat piumasaqaatigineqalersimasoq Inatsisartoqarfimmit nassuiaatigaat.