Tusarfiit: Ursula von der Leyen Kalaallit Nunaannukarnissaminik pilersaaruteqarpoq
EU-mi kommissionip siulittaasua marsimi Kalaallit Nunaannukarluni ikiorsiissutinik nalunaaruteqarniartoq tusarfiit tusagassiuutinut oqarput.
EU-Kommissionip siulittaasua Ursula von der Leyen Münchenimi isumannaallisaanermut tunngasunik sapaatip-akunnerata siuliani ataatsimeersuarnermi oqalugiartoq. Taanna marsimi Kalaallit Nunaannukassasoq Bloombergip tusarfii oqarput.
Assi: Alexandra Beier/Ritzau Scanpix
EU-p kommissioniata siulittaasua Ursula von der Leyen Kalaallit Nunaannut tikeraarnissaminik pilersaaruteqarpoq.
Tusarfiup kinaassutsiminik isertuussisup suliaq pillgu ilisimasallip tamanna oqaatigigaa, tusagassiorfik Bloomberg pingasunngornermi kingusissukkut allappoq.
Tusagassiorfik naapertorlugu marsimi tikeraassaaq. Tikeraarnissamut tunngasut, ilaatigut qaqugu pissanersoq, sui inissinneqanngitsut, tusarfimmit oqaatigineqarpoq.
Von der Leyenip tikeraarnermini Kalaallit Nunaannut tapiissuteqarnissaq saqqummiutissagaa, Bloombergip tusarfia oqarpoq.
Atorfillit allat aamma tikeraaqataassasut oqaatigineqarpoq, kikkuunersulli paasissutissiissutigineqarani.
Tikeraarnissaq pisortatigoortumik suli uppernarsarneqanngilaq. EU-mi kommissionip oqaaseqartartuata tamanna pillugu Bloombergimit oqaaseqarusunngilaq.
Nutaarsiassaqartitsivik Reuters nalunaarut taanna uppernarsarneqarsinnaanngitsoq allappoq.
Kalaallit Nunaat nunanit tamalaanit ukiup aallartinnerani sammineqangaatsiarpoq. Amerikap præsidentiata Donald Trumpip qeqertap pigerusunnera tassani uteqattaarpaa.
Trumpip Danmarkip qeqertaq Ruslandip Kinallu soqutigisaannut illersorsinnaaneraa aamma qularalugu oqaaseqaqattaarpoq.
Schweizimi Davosimi nunarsuaq tamakkerlugu aningaasaqarnermut januaariimiataatsimeersuarnermi Trumpip Natop generalsekretærianut Mark Ruttemut Issittumi isumannaallisaanerup NATO-mit annertusarneqarnissaa isumaqatigiissutigaa.
Ursula von der Leyen Issittumi isumannaallisaanerup nukittorsarnissaanut EU suliniuteqartoq EU-p inatsisartuini januaarimi oqalugiarnermini oqarpoq.
Europamiut Kalaallit Nunaata aningaasaqarneranut attaveqaasersuutaanullu tapersersuiniarlutik annertuumik aningaasalinerujartornissaat siullertut alloriarnerussasoq oqaatigineqarpoq.
EU-p Issittumi isumannaallisaanerup nukittorsarneqarnissaanik USA suleqatigisartakkanilu allat tamaasa aamma suleqatigiumaarai, von der Leyen oqarpoq.
Kalaallit Nunaannut siornatigut aamma tikeraarnikuuvoq, EU-p allaffia Nuummi 2024-mi marsimi ammarpaa.
Kunngi Frederik Kalaallit Nunaannut ulluni makkunani tikeraarpoq, pilersaarutit naapertorlugit tallimanngorpat angerlassaaq.
