Tusassip OneWeb-imut antennit ajoqusersimasut nalunaarutigai

Tusassip Tasiilami eqqaanilu attaveqaatit ajoquteqartut ilisimatitsissutigaa. OneWebimut antennit sapaatip-akunnerata siuliani piterarmat ajoqusingaatsiarsimapput.

Attaveqaatit aaqqineqarnissaasa tungaanut GreenSAT-imut attaviliisoqartoq, Tusass sapaatip-akunnerata naanerani tusagassiuutitigut nalunaarummi allappoq.

"Tasiilami teknikereqarpugut, pissutsillu pillugit tamakkiisumik paasisaqaluarniarluta sullippugut. Attaveqaatit iluarsissappata antennit aserorsimasut iluarsineqaqqaartariaqassapput," IT-mik Sullissinermi Pilersuinermullu pisortaq Thomas Hansen oqarpoq, nangipporlu:

"Iluarsaattuunneratalu nalaani qaammataasatigut attaveqaatit GreenSAT-imut nuunneqassapput, taamatullu innuttaasut internetimut suli attaveqarsinnaassallutik."

Suliffeqarfiit amerlanngitsut, Tasiilami aamma nunaqarfinni Isortumi, Kuummiuni, Sermiligaami, Tiilerilaami Kulusummilu atuisut ataasiakkaat internetimut attavillit eqqugaasunut ilaasut, Tusassimiit paasissutississutigineqarpoq.

Tusass iluarsaassinerup qanoq sivisutiginissaa paasinarsippat paasissutisseeqqiissaaq. Ingerlatsineq pillugu paasissutissat suliffeqarfiup nittartagaani malinnaavigineqarsinnaapput:

Ingerlatsineq pillugu paasissutissat - Atuisunik sullissivik - Tusass