Umiarsualivinni qulingiluani immami uuttuinerit aallartinneqartut

Angallannermi isumannaallisaaneq nukittorsarniarlugu kiisalu assartuineq, pilersuineq inuussutissarsiornerlu pillugit pitsaanerusunik sinaakkusiisoqassappat maannakkut umiarsualivinni qulingiluanik immap itissusaata uuttortarneqarnissaa aallartinneqalerpoq.

Naalakkersuisut tusagassiuutinut nalunaarummi taama paasissutissiipput.

Ineqarnermut, Attaveqaqatigiinnermut, Nunaqarfinnut Avatangiisinullu Naalakkersuisoqarfiup Asiaq uuttortaanissamik, umiarsualivinni toqqakkani itissutsinik paasissutissanik nutarterneqartartunik eqqorluartunillu pissarsinissamut isumaqatigiissuteqarfigaa.

Naalakkersuisut naapertorlugit paasissutissat Geodatastyrelsenimut nassiunneqassallutillu Kalaallit Nunaanni umiarsualiviit allattorsimaffiannut ilanngunneqassapput.

Kalaallit Nunaanni umiartortut nalunaarsorsimaffiat tamanit nalunaarsuiffigineqarsinnaavoq, tassanilu umiartortut umiarsualivippassuarni itissutsit pillugit paasissutissanik pissarsisinnaallutillu nnalunaarsuivik Geodatastyrelsenimit nakkutigineqarpoq.

Naalakkersuisoq: Innuttaasunik isumannaallisaanermut aningaasaliineq

Naalakkersuisup Iddimanngiiu Jensen Biancop suliniut nuannaarutigaa:

“Umiarsualiviit pitsaasut isumannaatsullu illoqarfinni anginerusuni nunaqarfinnilu isorliunerusuni ulluinnarni inuunermut pingaaruteqarput. Immap naqqanik uuttuinerit nutarterneqarnissaannut aningaasaliigaangatta innuttaasut toqqissisimanerat, inuussutissarsiorneq pilersuinerlu patajaatsoq toqqaannartumik aningaasaliiffigisarpagut", Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoq. Iddimanngiiu Jeensen Bianco (IA) oqarpoq.

Umiarsualiviit uku qulingiluat uuttortarneqassapput:

• Qeqertarsuatsiaat

•  Kapisillit

• Kangerlussuaq

• Atammik

• Napasoq

• Kangaamiut

• Sarfannguit

• Itilleq

• Sisimiut