Kommuneqarfik Sermersuumi pisortaasimasumut suliaq sisamanngornermi ualisoq ulluni pingasungajanni ingerlareersimalerpoq, illuatungeriillu naggataarutaasumik oqaaseqarnissaannut piareerluta.
- Pissutsit tamaasa ataatsimut isigissagaanni angut taanna "iluatsippat iluatsikkumaarpumik" iliuuseqartarnera ersarippoq, unnerluussisoq Henrik Uhl Pedersen oqarpoq.
Kommuneqarfik Sermersuumi pisortaasimasumut suliaq sisamanngornermi ualisoq ulluni pingasungajanni ingerlareersimalerpoq, illuatungeriillu naggataarutaasumik oqaaseqarnissaannut piareerluta.
- Pissutsit tamaasa ataatsimut isigissagaanni angut taanna "iluatsippat iluatsikkumaarpumik" iliuuseqartarnera ersarippoq, unnerluussisoq Henrik Uhl Pedersen oqarpoq.
Unnerluussisup angut unnerluutigineqartoq peqquserluttuliorsimasutut oqartussaassutsimillu atornerluisimasutut unnerluussutini arlalinni pisuutinneqarsinnaanera tunngavilersorpaa. Pisortani atuuffeqarneri iliuutsini sisamani ingasattumik atornernerluinerit, unnerluussisussaatitaasoq isumaqarpoq.
Pisimasut pingasut siulliit tassaapput 10.800 koruunit nalinganut (eqqartuussinerup ingerlanerani aningaasat ikilisinneqartut) kortimik pisineq angalanerillu kommunimit akilerneqartut, ilaatigut ilaqutariittut feeriarneq.
SERMERSUUMI PEQQUSERLUNNERMUT SULIAQ
Kommuneqarfik Sermersuumi pisortaasimasoq 55-inik ukiulik peqquserlussimasutut, oqartussaassutsimik atornerluisimasutut paasissutissanillu peqquserluttuliortutut Sermersuup Eqqartuussiviani unnerluutigineqarpoq.
Angut 2019-imiit 2022-mut pinerlunnerit assigiinngitsut sisamat pillugit unnerluutigineqarpoq:
1. Kommunip akiliutaa atorlugu nammineq 23.550 koruunit nalinganut pisineq. (aningaasat 10.800 koruuninngortinneqarpoq, aaqq.).
2. Ilaqutariittut feeriarnermut 23.195 koruuninik akeqartumut kommunimit akiliisitsisoqarsimanera.
3. Qatanngutimi angalanerata kommunimit akilerneqarsimanera (nalinga paasissutissiissutigineqanngilaq).
4. Inatsisit unioqqutillugit kommunimi suliariumannittussarsiuussinermi angutip qatanngutaata ningaavatalu suliffeqarfiutaata iluanaaruteqarnissaanik siunertaqarluni sunniiniartoqarnera.
Qatanngutigiit taakku 3-mi 4-milu eqqaaneqartut immikkoorput.
Unnerluutigineqartoq unnerluussutini sisamani tamani pinngitsuunerarpoq.
- Peqquserluttoqarnera ersarippoq. Kommunip aningaasaatai nammineq kontotut atorneqarnerat atornerluineruvoq, unnerluussisoq oqarpoq.
Unnerluutigineqartup qatanngummi coronap nalaani Kalaallit Nunaannukarnissaanut pisinnaatitaanani ikiorsimanera unnerluussisusup uppernarsarsimallugu aamma isumaqarpoq, tassa kommunimi sulisuunerarsimagamiuk. Ilaqutariinni toqusoornermi taama pisoqarpoq.
– Inuttut qisuariarnertut taaneqarsinnaavoq, aammali ilaquttap Kalaallit Nunaannit allanit pitsaanertut iliuuseqarfiginera oqartussaanermik ingasattumik atornerluineruvoq.
Suliap immikkoortuisa sisamaat immikkut pingaaruteqarpoq: Angut eqqiaasartussanik suliariumannittussarsiornermi akuliussimasutut, taamaalilluni qatanngummi ningaamilu eqqiaanermut suliffeqarfiutaat toqqarneqarneranik kinguneqarneranut unnerluutigineqarpoq.
- Unnerluutigineqartup neqeroortitsinermi maleruagassat malinngilluinnarpai. Malittarisassat suliap ingerlanerani allanngortinneqarput, unnerluussisup tikkuarpaa.
Unnerluussisup ilaatigut ilisimannittup Kommuneqarfik Sermersuumi ataatsimeeqataasup oqaasii tunngavilersuutigai. Ilisimannittoq taanna suliariumannittussarsiornerup ingerlanerani suleqataavoq, tassani angutip unnerluutigineqartup pinerlulluni sunniisimaneranut unnerluutigineqarfiani.
- Unnerluutigineqartoq suliamit tunuarsimassagaluarpoq, kisiannili nalunngiulluinnarlugu sulerinerluni akuliuppoq. Suliami pineqartunut qanigisaavallaarpoq inatsisinillu unioqqutitsilluni. Uppernarsaatissaqarluarpoq.
Unnerluussisup aamma suliaq sivisuumik suliarineqarsimasoq nassuerutigaa. Pisut 2019-imiit 2022-mut pineqarput. Taamaattumik unnerluussummi ukiumik ataatsimik pineqaatissinneqarsimasunut inissiisarfimmiittussanngortitsinissaq pillugu piumasaqaat, siusinnerusukkut eqqaaneqartoq, allanngortippaa. Suliat ukiualuit suliarineqarsimatillugit pineqaatissiissutit sakkukinnerulersarnerat nalinginnaavoq.
Pineqaatissiinneqarsimasunut sivikinnerusumik inissiisarfimmiittussargortitsineq, pinerluuteqaqqissagaluarpat pineqaatissinneqarnissa imaluunniit inuiaqatigiinnik kiffartuussisunngortinneqarneq. Periarfissarli kingulleq unnerluussisup sakkukippallaarsoraa.
Illersuisup akissutai
Eqqartuussissuserisoq Vilhelm Dickmeiss illersuivoq, taassumalu sullitaa unnerluutigineqartuni tamani pisuunnginnerarpoq.
Illersuisup unnerluussisussaatitaasoq unnerluutigineqartut akuerunneri isornartorsiorpai, tassa unnerluutigineqartut immikkoortillugit pinngimmagit.
- Piffissaq sivisuvoq, taamalu sivisutigisumik pasineqarneq nanertuutaallunilu sakkortuvoq, illersuisoq oqarpoq.
Vilhelm Dickmeiss suliap sivisuallaamik suliarineqarnera pissutigalugu pisuni pingasuni 2019-imeersuni pinngitsuutinneqartariaqartoq isumaqarpoq. Sullitaalu pisuusutut nalilerneqassagaluarpat pinerluuteqaqqissagaluaruni aatsaat pineqaatissinneqassasoq taanna isumaqarpoq.
Taamaakkaluartoq unnerluussisup uppernarsaatai naammanngitsut illersuisoq isumaqarpoq. Unnerluutigineqartoq akiligassanut kortimik peqquserluttuliorsimanera tunngavilersorneqarsinnaanngitsoq taanna isumaqarpoq.
Vilhelm Dickmeiss sulinngiffeqarnermi akiuliunneqarluni angalaneq utertinneqarsimasoq aamma isumaqarpoq, taamanikkut kommunimi pisortaasoq tamanna pissutissaqarluartoq isumaqarsimammat, kommunimmi sulinngiffeqarnissaq ataaseq taamaatissimammagu. Qatanngutigisap angalanera paatsoorneqaruvoq, unnerluutigineqartullu tamanna iluaqutigisinnaallugu.
- (Unnerluutigisap aqqa) pisuuneranut uppernarsaatissaqanngilaq.
Suliariumannittussarsiornermi qatanngutaata suliffeqarfiutaata iluaqutigisimaneqarneranut illersuisoq ima oqarpoq:
- Kommunip pitsaasumik ataavartumillu isumaqatigiissusiornissaa siunertarineqarpoq, naak immaqa neqeroortitsinermut malittarisassat malinneqaqqissaanngikkaluartut. Ippinnartoqarsimanngitsoq ilisimannittunit aamma tusarparput, Vilhelm Dickmeiss oqarpoq.
– Kommuni pitsaanerpaamik isumaqatigiissusiornissaa suliassaraa, tamannalu iluatsissimallugu. Atornerluisimanngilaq imaluunniit suliassiissummik unioqqutitsisimanngilaq allatigulluunniit. Suliassap naammassineqarnissaanut pisariaqartut qulakkeersimavai, tamannalu naammagittaalliuutigineqanngilaq, Vilhelm Dickmeiss oqarpoq.
- Illoqarfimmi mikisumi Nuummitut ittumi soqutigisat akuliussinnaasarnerat avaqqunneqarsinnaanngilaq, oqarpoq.
Pisarneq malillugu unnerluutigineqartoq naggataarutaasumik oqaaseqarnissaminut periarfissaqartarpoq, oqaaseqaqqannissaminulli ilassutissaqarani.
Eqqartuussut aalajangerniarneqartussanngorpoq. Eqqartuussisoq eqqartuussut piffissap ilaani, immaqa ullut 14-it tikillugit, aalajangerniarneqarsinnaasoq oqarpoq.
