Upalungaarsimanermut ilinniarfeqalilertoq

Kalaallit Nunaanni Politiit nutaanik suleqateqalernikkut oqilisaaffigineqartalissapput. Politiinut ikiortut nunaqavissut ilinniarfigisinnaasaannik pilersitsinissaq pilersaarutigineqarpoq.

Kalaallit Nunaanni Politiini pisortaq Bjørn Tegner Bay oqarpoq. Dansk Politip nittartagaanni atuarneqarsinnaavoq.

- Naalagaaffiup politiivi suleqatigalugit upalungaarsimanermut tunngasunik ilinniarfimmik nutaamik pilersitsivugut, oqarpoq nangipporlu:

- Inuusuttut soqutiginnilersikkusuppavut, taamaattumik Danmarkimi politiinut ikiortitut ilinniarfik isumassiorsiorfigalugu aallartitsinissaput pilersaarutigaarput. Kisianni qallunaat politiinut ikiortinngornianut ilinniartitsissutigineqartartut Kalaallit Nunaanni naammanngillat. Politiinut ikiortigut aamma ornigussinnaasussaapput, namminnerlu iliuuseqarsinnaaqqullugit suliassanillu ajornannginnerusunik suliaqarsinnaaqqullugit politiitut pisinnaatitaaffeqassallutik.

Ilinniarfik suli pilersaarusiorneqarpoq, politiinngorniarnermili semesterip siulliup assipajaarissavaa.

Bjørn Tegner Bayip 2028-mi siullermik upalungaarsimasunik ilinniartitsisoqartalernissaa, ukiumullu upalungaarsimasunut qulit 15-illu akornanni amerlassuseqartunik ilinniartitsisoqartalissasoq neriuutigaa.

Oqaatsit akornutaasut atorunnaarsinneqassasut

AAMMA ATUARUK

Kalaallit politiit 64 procentiisa inuunerminnik navianartorsiortinneqarneq misiginikuuaat

Kalaallit Nunaanni oqaatsit tungaatigut unammilligassat ilaat aaqqinniarnissaat ilinniarfimmi nutaami siunertat ilagigaat Bjørn Tegner Bay aamma oqarpoq. Kalaallit Nunaanni Politiini sulisut ilarpassui Danmarkimit ikiorneqartarput. Politiit taamaallaat 50 procentii kalaallisut oqalussinnaapput.

- Innuttaasut oqaloqatigisinnaanngikkutsigik ajornartorsiuterujussuuvoq, politiillu ataasiakkaat inunnik oqaloqateqarsinnaannginnamik nuanniilliorsinnaapput, Bjørn Tegner Bay oqarpoq.

Politiit inuiaqatigiit pisariaqartitaannik tunniussisinnaanissamik suleqataasinnaasut amerlanerussasut neriuutigaa.

Ilinniarfik immaqa Nuummi Politiit Ilinniarfianniissaaq, Bjørn Tegner Bay oqaluttuarpoq, ilisimatitsissutigalugulu ilinniartut inissarsinissaannut ikiorneqarumaartut.

Politiit kattuffiannit ilinniarfimmik nutaamik pilersitsinissaq tapersersorneqarpoq.

- Kalaallit Nunaanni upalungaarsimasunut ilinniarfik nutaaq isumassarsiaavoq pitsaasoq. Kalaallit Nunaanni suleqatit amerlanerusut pisariaqartinneqarput, tassanilu ilinniarneq tunngaviusumik ilinniakkamut taartaalluarsinnaavoq, aamma atorfinitsitsinissamut periarfissatut sunniuteqarsinnaavoq, Politiforbundetip siulittaasua Heino Kegel oqarpoq.

Siulittaasoq nutaamik ilinniagaqarneq sinerissami suleqatinik amerlanerusunik, immaqa sumiiffinni taakkunani ikiuutaasinnaasunik, kajungilersitsisinnaanerusoq oqarpoq.