Upernavimmi kigutit nakorsaat amigaatigineqarpoq

Peqqinnissaqarfik sulisussarsiorniarluni ilungersoraluaqisoq Upernavimmi kigutit nakorsiartarfianni suli aalajangersimasumik kigutilerisoqanngilaq.Kisianni nunaqarfimmi nakorsaat Upernaviup eqqaani nunaqarfinnut angalasarlutik kigutit nakorsiartarfiini atortunik angallattakkanik atuisarput pissutsit aaqqinniarlugit.

Kigutit nakorsanik amigaateqarneq pingaartumik nunaqarfinnut eqquivoq, Kullorsuarmi nunaqarfiup aqutsisuisa siulittaasuat oqarpoq.

Atorfik suli inuttassarsiuinneqartoq

Kigutinut nakorsamik ataatsimik aalajangersimasumik Upernavimmi kigutileriffimmut ukiuni arlalinngortuni ukiumut pingasoriarluni suliartortoqartartoq taannalu nunap immikkoortuani tassani sivikitsumik tassa qaammatit pingasukkuutaapajaarlugit sulisartoq, Kalaallit Nunaanni Peqqinnissaqarfimmit Ilisimatitsissutigineqartoq, Peqqinnissamut Innarluutilinnullu Naalakkersuisup Anna Wanngenheimip nalunaarutigaa.

Anna Wangenheim naapertorlugu kigutit nakorsaata atorfia inuttalerneqartuaannarsimanngilaq, kisiannili kigutilerisut aalajangersimasumik sulisussarsiuunneqartarput. Taassuma ilisimatitsissutigaa ataavartumik sulisussarsiorneq ingerlanneqartartoq, Peqqinnissaqarfiulli erseqqissumik maannangaaq oqaatigisinnaanngilaa, atorfik qaqugu inuttalerneqassanersoq.

Kigutileriffimmi sulisoq ataaseq

Bentiaraq Ottosenip Upernavimmi kigutileriffimmi qanoq maanna sulisoqartiginera aamma apeqqutigaa, Upernavimmilu kigutileriffimmi kigutilerinermut ikiortimik ataatsimik sulisoqartoq Peqqissutsimut Naalakkersuisup akissuteqarpoq.

- Kigutileriffimmi tassani kigutigissaasutut atorfik maannakkorpiaq inuttaqanngilaq, inuttalerneqarnissaalu Nunatsinni Kigutileriveqarfimmit sulissutigineqaleruttorluni, Anna Wangenheim ilisimatitsivoq.

- Tassani kigutigissaanermik suliassat kigutigissaasumit nunap immikkoortuanit allameersumit isumagineqartassapput, kigutigissaasumik atorfinitsitsisoqarnissaata tungaanut. Aammattaaq kigutigissaanermi ikiortitut imaluunniit kigutileriffimmi ikiortitut atorfinittussarsiortoqaleruttorpoq. Anna Wangenheim paasissutissiivoq.

Kigutileriffiup atortui angallattakkat aaqqiissutissallu utaqqiisaasut

Bentiaraq Ottosenimut akissummi ilaatigut allassimavoq meeqqat inuusuttullu pingasut kigutileritinnissamik pisariaqartitsisut, meeqqallu inuusuttullu arfineq-marluk misissortinnissamik aamma pisariaqartitsisut.

Anna Wangenheimip aamma paasissutissiissutigaa meeqqat inuusuttullu kigutilerisut pillugit inatsisit atuuttut naapertorlugit pingaarnersiuinerit pisariusut, aamma misissortinnissamut kigutileritinnissamullu aggersarneqartuaannartut.

Aammattaaq nunap immikkoortuini peqqissaasut aalajangersimasumik angalasarput kigutit nakorsaasa atortui angallattakkat atorlugit.

- Erngertumik kigutileritinnissamik pisariaqartitsisut salliunneqarluinnarlutillu

misissorneranni naliliinerit aallaavigalugit isumagineqartarput. Upernavimmi

Peqqissaavik nunaqarfiinilu peqqissaavinni sulisut kigutimikkut qanermikkullu

peqqissutsikkut ajornartorsiutilinnik kigutilerinermut taakkuninngalu malittareqqiinermut tunngasuni suleqatigineqarputtaaq.

- Upernavimmi kigutilerisup atorfiata inuttalerneqarnissaanut utaqqiisaasumik aaqqiissuteqarnikkut ingerlatsineq ingerlaannassaaq, ilaatigut piffissami sivikitsumi sulisut atorlugit, kigutit nakorsaat angalasartut periarfissaqaraangat kigutigissaaffimmiillu allamit ikiortissarsiornikkut, Anna Wangenheim oqarpoq.

Aammattaaq ilisimatitsivoq suliniutit ataavartunik ingerlanneqartut nalinginnaasumik ingerlatsinermut ilaatillugit, erseqqissarlugulu atorfiup qaqugu inuttalerneqarfissaa, oqaatigineqarsinnaanngitsoq.

Peqqissutsimut isumaqatigiissut

Peqqissutsimut Innarluutilinnut Naalakkersuisoq Bentiaraq Ottosenimut paasissutissiivoq Naalakkersuisunut peqqinnissaqarfimmik patajaatsumik, ataavartumik ataqatigiissumillu pilersitsinissaq anguniarneqartoq.

- Naalakkersuisut Inatsisartuni partit tamarmik peqqissutsimut

tunngatillugu annertusisamik isumaqatigiissusiornissaq pillugu oqaloqatigisarpaat. Kalaallit Nunaanni Peqqinnissaqarfimmi inerisaanerup paaseqatigiinnermik tunngaveqaqqullugu tamatumanilu siunissaq ungasinnerusoq eqqarsaatigalugu anguniakkap qinigaaffinni tamani aalaakkaasuuinnarsinnaaqqullugu, politikkikkut ingerlatsinermut tunngasutigut tunuliaqqutsiilluarnissamut qulakkeerinninnissaq siunertaavoq.

- Kigutissaanermik ilinniarsimasunik sulisussaaleqineq kigutileriffinni sulisussaaleqiuartuarsinnarnerup ajornartorsiutaaneranut pissutaalluinnarpoq. Anna Wangenheim oqarpoq.

Taassuma tikkuarpaa kigutit nakorsaatut ilinniagallit Kalaallit Nunaanniittut amerlassusaat killeqartut.

- Tamanna tamatumani sulisussarsiorniarnerup nunatsinni tamarmi

ingammillu isorliunerusuni ajornartorsiutaaneranik kinguneqarpoq, oqarpoq.

Kalaallit Nunaanni Peqqinnissaqarfik kigutigissaanermut tunngasutigut ilinniarsimasunik nunatsinnut, tamatumani aamma isorliunerusunut, sulisussarsiornermik sulisooreersunillu attassiniarnermik ataavartumik sulissuteqartuuvoq, Bentiaraq Ottosenimut akissummi allassimavoq.

Nunaqarfinni ajornartorsiut annertooq

Timotheus Petersen, Siumut, Kullorsuarmi nunaqarfinni aqutsisuni siulittaasuuvoq. Kullorsuaq 400-t missaanni innuttaqarluni Kalaallit Nunaanni aalisartut piniartullu nunaqarfiisa annersaraat, Upernavimmiillu avannamut 300 kilometerit missaannik ungasitsigisumiippoq.

Taanna naapertorlugu nunaqarfimmut kigutilerisumik tikeraartoqartarnera qaqutigoortorujussuuvoq, taamaattumillu nunaqarfinni najugallit amerlanertigut Upernavimmut namminneq angalasariaqartarput.

- Kigutit nakorsaanik amigaateqarneq inersimasunut kisimik eqquinngilaq, aammali meeqqanut sunniuteqarpoq.

- Taamaattumik peqqinnissaqarfiup ajornartorsiummut ilungersunartunut aaqqiissutissamik piaartumik nassaarnissaa pingaaruteqarpoq. oqarpoq.

Timotheus Petersen oqaluttuarpoq kigutini pussugutinik nammineq peertariaqarsimallugu, kigutinili peerniartillugu qupivoq taamaattumillu Upernavimmut angalasariaqarsimalluni.