Upernavimmiu: Tinikkaangat eqqagassat kisimik nuisarput

Upernavimmi eqqakkat eqqaavissuarmiittut arrortinneqarsinnaasut arrortikkuminaatsullu amerlaqaat. Tamakkuli nunap sinnerani innuttaasunit, aammalu qinikkanit, takuneqartariaqalertut, Upernavimmi innuttaasoq, Lars Eskildsen isumaqarpoq. Taamaattumik taassuma assilisani Facebookkikkut siammarpai.

- Mianerigaluarakku assileriarlugit kikkut tamarmi takusinnaasaannik taamatut assinik ikkussissallunga, kisianni piviusoq aamma takuneqartariaqartoq isumaqarpunga, taanna Sermitsiamut oqarpoq.

Lars Eskildsen Upernaviup mittarfiani, Greenland Airportsimi, ingerlatsinermut aqutsisuuvoq.

Taassuma oqaluttuai naapertorlugit eqqakkat ima amerlatigilerput allaat imaq tinikkaangat qaarsumik nunamilluunniit nuisoqarani eqqakkanik nuisoqartarluni.

- Nunniugaasarsuanngorput kiisa tamakkua. Nuna taama portutiginngilaq, eqqakkanuku qaleriiaarneqarnerisa kinguneranik taama isikkoqalertoq. Tinikkaangat ingitaannaat nuisarput, nunamik nuisoqarneq ajorpoq. 

- Illutoqarsuit eriagisat eqqagarsuit angoqqinnaartarpaat teqqaaffigalugillu, Lars Eskildsen oqarpoq.

Peqqissutsimut ernumasoq

Eqqakkat imaannarmi qaleriaaginnarput. Taakkua malunnaatilimmik ikiliartunngillat.

- 58-nik ukioqarpunga, eqqagarsuit tamakkua immaqa 30-illi missaannik ukioqartunga qaleriilerput taamatut. Meeraaninni taama eqqagassaqartiginikuunngilaq. Ukiut nutaanngoriartorfiini, atortorissaarfiup nalaani, taamattoqarnera tujorminarpoq, Upernavimmiu oqarpoq.

Tamanna inuit uumasullu peqqissussaannik aarlerilernermik kinguneqarpoq.

- Mitit tamaani ukiisalernikuupput, allaat eqqaavissuup eqqaaniittarput. Nerlerit eqqaavissuup sanerpiaaniipput. Aalisakkat immamiipput, taamaattumik peqqinnanngitsunik nerisaqartarnissarput aarlerinaateqarpoq. Nerisareqatigiiaarnikkut uumasoqatiminnut siammarterisinnaapput. Uagullu inuit tamakkuninnga aamma nerisaqartuulluta, Lars Eskildsen oqarpoq.

Niviugappassuit akisussaasullu oqaaseqarnianngitsut

Upernavimmi pissutsit taama innerat pitsaanerusariaqarsorineqarpoq. 

- Iliuuseqartoqarnissaa kissaatiginaqaaq, peqqinnissarput eqqarsaatigalugu. Aputaarlunilu aasarmat niviugappassuaqalerporaasiit maannakkut, Lars Eskildsen oqarpoq.

Avannaata Kommunia Upernavimmi eqqagassalerinermut akisussaasuuvoq. Sermitsiap Avannaata Kommuniani kommunalbestyrelsimut ilaasortaq, aamma teknikkimut ataatsimiititalimi siulittaasoq, Sakio Fleischer (S), Upernavimmi innuttaasup iliuuseqartoqarnissaanik kissaateqarnera pillugu attaveqarfigaa. Taassumali suliaq maanna oqaaseqarfiginianngilaa. 

Sakio Fleischer Naalakkersuisunut ammasumik qanittukkut allagaqarpoq. Tassani Avannaata Kommuniata eqqaavissuini eqqakkat ikuallanneqarsinnaalernissaat piaartumik akuerineqassasoq qinnutigaa.

Sakio Fleischer ammasumik allakkamini kommuni eqqagassalerinermut pilersaaruteqartoq allappoq. Pilersaarulli tamakkerlugu piviusunngortinneqassappat suli suliassat amerlasuut naammassineqartariaqarput.