POLITIIT ULLOQ UNNUARLU NALUNAARUTAAT

Upernaviup eqqaaniittoq Tasiusaq attaveeruttoorpoq

Tallimanngornermi unnukkiartornerani Tasiusaq Upernaviup eqqaaniittoq innaallagiaaruppoq tamatumalu kingunerisaanik attaveqaatitigut attaveeruttoorluni. Kalaallit Nunaanni Politiit satellitsikkut attaveqalersitsipput, taamaalilluni nunaqarfimmiit politiit upalungaarsimasullu attaveqarfigisinnaassagaat qulakkeerneqarluni.

Kalaallit Nunaanni politiit Tasiusaq satellitikkut attaveqaateqalerpaat, taamaalillutillu nunaqarfimmiut oqartussaasunut pisariaqartitsissagunik attaveqarsinnaalersinneqarput. - Ajoraluartumilli, pisariaqartitsinngillat attaveqarnissamut uagutsinnut, strømimik attaveerunneq aammalu attaveqaqatigiinnermut kipisaqattaarneq nalaanni, oqaluttuarpoq vagtchef Thomas Jeppesen Kalaallit Nunaanni politiinit.

Foto: Oscar Scott Carl

Jensine Berthelsen Jensine Berthelsen Jensine Berthelsen Tusagassiortoq

Saqqummersinneqarpoq 22. Novembari 2025 - 11:17

Annonse

Inuit 250-t missaanniittut, Tasiusami Upernaviup eqqaaniittumi nunaqarfiata innuttaasut, sapaatip akunnerata naalernerani tallimanngornermi ualikkut kingusissukkut innaallagiaarupput, taamaalillunilu aamma avammut attaveerullutik.

Kalaallit Nunaanni Politiit paasiniariaramillu nunaqarfik attaveeruttoq, satellitsikkut attaveqalersippaat, taamaalillutillu innuttaasut pisariaqartitsissagunik oqartussanut attaveqarsinnaalersillugit oqartussaasullu ikiuiartorlutik ornigussinnaaniassammata:

- Kalaallit Nunaanni Politiinut pingaaruteqarpoq qulakkeersimassallugu tamatigut oqartussanut attaveqarsinnaanissaq, politiit, qatserisartut imaluunniit peqqinnissaqarfik attavigineqarsinnaajuaannarsinnaassammata.

- Taamaattumik erngerluta nunaqarfik satellitsikkut attaveqalersipparput paasigatsigu innaallagiaqanngitsoq, tamatumalu kingunerisaanik attaveqaatit/Internet attaveqanngitsut, Kalaallit Nunaanni Politiini nakkutilliisuutitat pisortaat, Thomas Jeppesen oqarpoq.

Tusassip ingerlatsinermut paasissutissiineranut naapertuutillugu Tasiusaq suli attaveqanngilaq, Sermitsiamiillu Tasiusap innuttaasa normui arlallit sianerfiginiarsarigaluarpai iluatsinngitsumik. Taamatuttaaq Sermitsiamit aamma Nukissiorfinnut attaveqarniaraluarpugut, Nukissiorfiit nittartagaanni pilersaarutaasumik innaallagiaarutsitsinissamik nalunaaruteqartoqareernerata kingorna Tasiusami innaallagianeqqissimanersut Nukissiorfiit nittartagaatigut suli nalunaarutigineqanngimmat.